Yesaya 56 - Mawu a Mulluku

¹ Apwiya enallota wi, “Vawi ovullusa waka wohaatamella echilungamwaaka eneerewooneya naanweene vaava.

² Oodala tti muthu oyo aneera ddenndda, anallipihella oddeera, anasunga nllapo na Sabata oohiiripiha ni wiihiiha ddoonanara.”

³ Muthu a mutundu mmodda oyo iipataanihalle ni Apwiya ahillote wi, “Muhikayikelle erive ello vawi Apwiya eneerokivenyihavo variyari va athwiiwa.” Oohulliwa* ahillote wi, “Mi sika kiri awumma wonanko ekhuni.”

⁴ Vawi Apwiya enallota wi, “Oohulliwa ayo enavaha olemu masabata ayo eneera ddookiddivella miyaano ni osunga echipanganwaaka moororomelleya,

⁵ kineerewaavaha mu enyumbaaka ni muwari mwa esiri ddaka yawuupuwelliha ni nnddina nookhwaranya anamwani aallopwana ni aatthiyana. Kineerewaavaha nnddina noohimalla nno khaniwa nivenyihiwavo.”

⁶ Nave Apwiya ennavirellella ollota wa athu amitundu ddimodda ayo eniipataaniha ni Apwiya ophiyera waapharella mutteko, waakonda ni waarumeyella, ayottho enavaha olemu masabata, oohiniripiha, enasunga echipanganwiiwa wi

⁷ “Kineerewaaphiyiha o Ziyoni, mwaangwaaka wootthoolliwa. Kineerewaavaha ehakallallo mu enyumbaaka yamavekello. Mikutho ddiwa ddawoosa ni mikutho ddiwa ddimodda kineeroddaakhella va nikuwa naka. Valle enyumbaaka eneeroromolliwa enyumba yoovekellamo athu a mitundu ddittheddene.”

⁸ Apwiya Mulluku ayo enaatthukumaniha Aisraele oopallalleya enallota wi, “Kineerewaatthukumaniha athu amodda woonjerera va ayo yatthukumanille khalle.”

Ohumullulliwa wa oohoollella a o Israele

⁹ Apwiya enaalleella athu a mitundu ddimodda wi ewe wonanko enama ddamuhakani wi yaattakhune athwiiwa.

¹⁰ Alliwa enallota wi, “Oohoollella attheene a Israele tti oohoona, attheenaayo khenna ezeru. Tti wonanko anapwa ookarangeya, oohiwora wuuwa koma enakhallella olloha, okonaatthi ni oddivelliwa ekhove.

¹¹ Tti wonanko anapwa. Naari abusa khenna ezeru vawi arive muthu aneera eneeta ettilla ddaye nave anapaalla ddoomuddivella yeekha.

¹² Oolezela awi ddiiddaalla enallota wi, ‘Hankoni nimuwirye vinyo, hankoni niwirye ddoowirya ddoowalli ophiyera nivone. Osiisello onaakhalle wonanko ollello apaalle ttuuriya okhwaranya ollellova.’ ”