Yesaya 54 - Mawu a Mulluku

Ddaphaama ddamuhoollo dda Yerusalemu

¹ Apwiya enallota wi, We mutthiyana oohiyara, ipa moohakallalla, we ohinooneke ovoreya wa oyara, khuwa ni woopa ellullu. Vawi mutthiyana oohiyiwa aneerokhalla ni anamwani awaata omukhwaranya mutthiyana ootthelliwa.

² Wunnuwihe nipuro nootthipellavo musasaawo, ottaphuruse wunchichi ekuwo ddene. Ohilephele, orekamihe mikwe ddene, ollipihe ekhomo ddene.

³ Vawi eneerewaatamanihella maliriiwa nngu ni nngu, edduullu ddawo ddineerewaakha mapuro a mitundu dda athu ddimodda, ddineeroddalla mizinda nnddo ddahiyiwe.

⁴ Ohoove kaambiiwa khewa yuunyaambusattho, ohitathille murima vawi khewa yuuvevullattho. Oneerotiwalla nnddo dduuwulliha muru va esombwaawo, owulliwa muru wa onaamukhwellaawo khowuupuwellattho.

⁵ Oophatusaawo ari wonanko mamuno, Apwiya Amasiva Mattheene sika nnddina naye. Aweelloolle a Israele sika Oowoopollaawo, nnddina naye tti Mulluku a ellapo yavatthi ettheene.

⁶ We Israele, Apwiya aawiithanattho. Tti wonanko namwalli oohiyiwa, ooddalla ni ethakaraka m'murimani mwaye, wonanko mutthiyana aveesombweni oyo iikarihiwe. Mullukwaawo anallota wi,

⁷ “Kahuuhiya va enthawi yooyeva, koma kineerewuukusattho ni echikondi yoowallamella.

⁸ Kahuuhiya va enthawi yooyeva, kishille murima wunchichi koma ni echikondaaka yoohisintheya wa enthawi yoohimalla kineerewuumorella ethakaraka.” Apwiya, Oovullusaawo, sika enallota.

⁹ “Vawi wa miyaano ddenndda ddiri wonanko mallapo a Nowa, kallupellelleemi wi ngiwa koonongattho ellapo yavatthi ni echigumula, Emoddamoddavettho kinimallupellattho wi ngiwa kuushellattho murima, ngiwa kuuhumullullattho.

¹⁰ Miyaango ttuususeya, asimiyaango ttuutikheya koma echikondaaka yoohisintheya va weyaano khewa emalla, Echipanganwaaka yamurendelle kineeroyisunga murendelle wa enthawi yoohimalla.” Apwiya ayo enaweerella echifundo sika enallota ddenndda.

Yerusalemu a muhoollo

¹¹ “We muzinda woohoosiwa, woorama nikavihero, woohikhalla ni awuukhurumusa murima, kineeroweeriha mallukwaawo, kineeromakattho matthipellwaawo ni malluku oowallamella mutengo a Safire.

¹² Kineeromaka mattatthaawo ni malluku oofiira, kineeromaka mpandaawo ni malluku a berulo.

¹³ Anaawo attheene eneerohuddihiwa ni mi Apwiya, kineerewaadalisa ni waavaha murendelle munchichi.

¹⁴ Oneerokeraattheya mu echilungamo, khowattho onyingallelliwa, ddawoona, khowattho woova, Khuwa woopopihiwa kaambiiwa ddeko ddawoopiha khaddiwaatamella.

¹⁵ Mmodda uullikani, khe miyaano keerihalle. Oollipana ni weyaano aneerolephela vawi oneeromugonjiha.

¹⁶ Ngoonani, miyaano sika kamphatusalle oohana mikoko oyo anaviddeella munllo wamankhalla wi ahanelle ezida, miyaanottho sika kamphatusalle oopasula wi oononge.

¹⁷ Koma kheyiivo echida yoohanelliwa weyaano enuuvoreye, attheene awuullotella ddoonanara oneerewaavaanya. Ella sika yoohallana ya oorumeyellaaka, miyaano sika kinaalungamiha.” Apwiya sika enallota.