Yesaya 53 - Mawu a Mulluku

¹ “Ttaani akhulupililalle othengaahu? Ethiyo ttaani uupullullelliwe masiva a Apwiya?

² Vallethi oorumeyellaaye ahunnuwa wonanko yoophuwa vamiitthoni va Apwiya, wonanko musisi mu ethaya yawumma. Olliye khaarina mooneyello aphaama wi hiyaano ttuumuweha, khaareere wi ttuukuseyana murima.

³ Olliye aavevulliwa ni aakhootiwa ni athu, muthu addoovoreya, ooddollweella ddoowaawa. Aanyaambusiwa wonanko owiipitthihelliwa ekhove ni athu, hiyaano khenaamweesille wonanko muthumuthu.

⁴ Ddawoona, olliye yeekha aatukhulla ethakaraka ddahu, ni wiireya ereta ddahu. Koma khenaamweesa wi tti oollakiwa, awuukuthiwa ni oohoosiwa ni Mulluku.

⁵ Yaamuhoma ekaamba ya machimwaahu, yaamuphinyulla ekaamba ya ddoolakwa ddahu. Ollaka nko wamumorenlle olliye woonivaha hi murendelle, makhwataaye aanichiriha.

⁶ Attheene naahollowa wonanko enkhosa, arive muthu mwa hi eetella ddaaye, koma Apwiya yaamureya olliye machimwaahu.

⁷ Athu yaamuhoosa ni omupana, koma olliye khaallotille ello. Wonanko enkhosa yookusiwa wi yiiphiwe, wonanko mwaanaankhosa oomaalleya voomuchemani, olliye khaawakhunlle ello.

⁸ Aaphariwa nave khaaweruziwe mwa echilungamo, khaavo apwathille. Okumaaye waakusiwa mwa olliye va ellapo yavatthi ekaamba ya machimo a athwaaka ahuukuthiwa.

⁹ Yaahiya mahamaaye variyari va anamasikita, yaamuhiya mu mahame variyari va athu eeyuuma. Olliye kheerille nirive nichimo, muwano mwaye khamwaavenyenre erive yawoottha.”

¹⁰ Komave Apwiya yaapaalla wi emunyenye ni omuhoosa. Olliye aavelleella okumaaye wi okhalle mukutho wookhululukella machimo. Sika aneerewoona edduullu ddaye, aneerokhalla ni okumi woorekama, opaalla wa Apwiya oneereweereya mwa olliye.

¹¹ Wamalla ohoowa wayenko, aneerokwakhwanihiwa ni mphurwaaye. Mweezeru, oorumeyellaaka oolungama aneerewiireya machimo a athu attheene wi anchichi eneerolungamihiwa.

¹² Sika kineeromuvaha nipuro variyari va attekweene. Aneerokawana ddawaakha ni amasiva vawi aavelleella okumaaye ophiyera okhwa, aheesiwa wonanko mmodda a athu oohithwara malamulo. Ahiireya machimo a athu anchichi, ahaavekella oochimwa wi ekhululukiwe.