Yesaya 52 - Mawu a Mulluku

Woopolliwa wa Yerusalemu

¹ We Ziyoni, venya venya, llipa murima. We Yerusalemu, muzinda waweella, wara ddoowara ddawo ddaphaama, athu oohiphaddiwa ni ooripihiwa khewa evollowattho va millako ddawo.

² We Yerusalemu oophariwa ittatthe nthupi, venya, Nyu oomakiwa a o Ziyoni, phaddani onyolo munikohini mwanyu.

³ Apwiya enallota wi, “Khamwaakullihiwe ni ello sika munoopolliwe oohivelleella makobiri.

⁴ Khalle nyu athwaaka mwaaya o Iguputo mwakhalla wenko monga alleto nave Aasiriya yuuhooselleni nivuddo.

⁵ Vano mi Apwiya kineere tini vawoona wi athwaakanyu yahuupharani okaporo oohivelleellavo ello? Awuulamulani ennakhuwa moonyindulla ni okillotella epewe moohihiyerera.

⁶ Sika nyuwaano athwaaka muneerokidduwella, enthawi yeeyo muneerodduwella wi miyaano sika kinallota. Ddawoona tti miyaano.”

⁷ Tti woohakallalliha owa wa oollalleya othenga waphaama, voomoonani eetaka m'miyaangoni, allalleyaka dda murendelle, awaakana epilli yaphaama, allalleyaka ovullusa, aalleellaka athu a o Ziyoni wi, “Mullukwaanyu tti mwene!”

⁸ Ngiiwani, alondaanyu ennawelliha mawu, eniipa vamodda moohakallalla vawi ennoona ni miitthwiiwa Apwiya ehokollweellaka o Ziyoni.

⁹ Nyu matepe a Yerusalemu, khuwani moohakallalla, Apwiya ahaakhurumusa murima athwiiwa, aamoopolla Yerusalemu.

¹⁰ Apwiya aaphariha mutteko masiviiwa aweella vamiitthoni va mitundu dda athu ddittheddene. Ellapo ettheene yavatthi ophiya o makomello wiwa eneerewoona ovullusa wa Mullukwaahu.

¹¹ Khumani, khumani, venyaniwoni mwawaakuva o Babiloninko, muhittannye ello yooripihiwa! Nyu ootukhulla eziwiya ddoopatulelliwa Apwiya, khumani, ddeelliheni.

¹² Koma olendoolla khamutimulla mwawaakuva, khamutimulla moothawa. Apwiya eneeteke vahoollo vanyu, Mulluku a Israele aneereke wuutetezani otulli wanyu.

Oorumeyella oohoosiwa a Apwiya

¹³ Apwiya enallota wi, “Oorumeyellaaka aneeropambana va muttekwaaye, aneerowellihiwa ni otitimihiwa, aneerovahiwa olemu wunchichi.

¹⁴ Anchichi voomoonani eneerorurumuwa ekaamba yawi ekhovaaye yaari enyenyeyille, vawi khaakhallattho wonanko muthu, mooneyellwaaye kheyaarittho wonanko a muthu.

¹⁵ Emoddamoddavettho athu a mitundu ddittheddene eneerottikhina, naari mamwene eneerorama yoollota, vawi ddeko ehinalleelliwekiiwa eneeroddoona, ddeko ehiniiwekiiwa eneeroddiiwesesa.”