Yesaya 51 - Mawu a Mulluku

Mawu owaallipiha murima a o Yerusalemu

¹ Apwiya enallota wi, “Nyu munapaalla ovulluwa, kaapelleni maaru, nyu munapaalla wi kuukavihereni. Ngaganizerani dda nlluku nko mwasemiweenyuwo, o nddalla namalluku mwakatiweenyuwo.

² Ngaganizani dda Abrahamu nikhollo nanyu attiitthaanyu ni Sara oyo uuyarilleni, kamwiithaneemi Abrahamu, khaarina mwaana koma kaamudalisa, kahoonjerera edduullu ddaye.

³ Mi Apwiya kineeromukhurumusa murima Ziyoni, oyo enakhalla mu matepaaye. Naari ellapwaaye eri echipululu, kineeroyitthattusa wonanko Edeni. Naari ellapwaaye eri nihaka, kineeroyitthattusa wonanko emata ya Apwiya. Wenko athu eneerohakallalla ni ottaphuwa, eneerewiipa machipo ookititimiha ni ookitthamalla.

⁴ Nyu anaaka, ngiiwani, nyu mutundwaaka, apellani maaru. Malamulo enaavenyere wa miyaano, echilungamwaaka eneerewaamolleella.

⁵ Kineeroowa mwawaakuva wi kiwoopolle athwaaka, enthawaaka yawaavullusa eri vakhuviru vawi meekhaaka kineerolamulella mitundu ddittheddene dda athu. Ellapo ddawoorekama ddinimakitiyera wi kiwe, enakitiyerella moororomella wi kaavulluse.

⁶ Tukhullellani miitthwaanyu oddullu, wehani va ellapo yavatthi. Oddullu oneerorimeella wonanko mwiisi, ellapo yavatthi eneeromalla wonanko yoowara, athwiiwa attheene eneerokhwa wonanko engwillihi. Koma ovullusa waka onaakhalle wa enthawi yoohimalla, woopolla waka wa enthawi ddittheddene.

⁷ Nyu oodduwella echilungamo, ngiiwani, nyu oosunga malamulwaaka m'murimani. Muhoove athu yaawuuhumullullakani, muhitathille murima yaawuunyaambusakani.

⁸ Athu yaalla eneeromalla wonanko ekuwo yoochiwa ni enjenjete, wonanko nthoche noochiwa ni miingu. Koma ovullusa waka onaakhalle wa enthawi yoohimalla, woopolla waka wa enthawi ddittheddene.”

⁹ Nyu Apwiya, venyani, venyani, llipani murima! Venyani wonanko mu mallapo akhalle, enthawi ya mibado ddakhalle. Ethiyo khe nyuwaano mwamuphanddephanndde Rahabu oyo ahomille enama yawoopiha ya mu enyanja?

¹⁰ Ethiyo khe nyuwaano mummihalle Enyanja Yuullupalli, maaddi oowallamellesesa. Ethiyo khe nyuwaano mwapangille ettilla vamaaddini, wi alle mwaavullusalleenyu ellapuwe vawumma?

¹¹ Ayo mwawooponlleenyu eneerohokollowa, eneerophiya o Ziyoni nchipo niri vayanoni, othapella woohimalla eneerewooneya va ekhove ddiwa. Eneerokhalla ni ehakallallo ni ottaphuwa, ethakaraka ni wiipullella ddineeromalla.

¹² Apwiya enallota wi, miyaano meekhaaka sika kinuukhurumusani murima. Ethiyo nyu ttaani wi mumooveke muthu oyo anaakhwe, mwaana a muthu ookhalla enthawi yooyeva wonanko manasi?

¹³ Ethiyo nyu ttaani wi mwaatiwalleke Apwiya, Oophatusaanyu ayo yaanddellellille ddooddullu, yakeraatthihalle matthipello a ellapo yavatthi? Ethiyo nyuwaano ttaani wi enthawi ddittheddene mooveke owalli wa athu awuuhoosani, ayo yoopaalliiwa tti owoonongani? Ethiyo vano owalli wa athu awuuhoosanaayo ori wuuwi?

¹⁴ Oomakiwa eneerewaattaphulla venevaveneva, khekhwa, khevollowa mu mahame, yoocha khewa yaarama naari vang'ono.

¹⁵ “Mi sika Apwiya Mullukwaanyu, oyo anaviddulla enyanja wi mafundiiwa onyakulla, nnddina naka tti Apwiya Amasiva Mattheene.

¹⁶ Kaahiya mawaaka muwano mwanyu, kahuutetezani ni nnatta naka. Kahaanddellella ddooddullu, kaakeraatthiha matthipello a ellapo yavatthi. Kahaalleella athu a o Ziyoni wi, ‘Muri athwaaka.’ ”

Omalla wa ddoohoosa dda Yerusalemu

¹⁷ We Yerusalemu, venya, venya, imella! Woomuwirya kapu oollaka oyo Apwiya yawinnyalliiwa eshille murima, kapu oohaharereyiha waamuwirya muttheene.

¹⁸ Khaavo mmodda awuuhoollella mwa anamwani waayarilleewe, khaavo naari mmodda awuuphara nnatta mwa anamwani waallenlleewe.

¹⁹ Ddoohoosa piilli ddohuumorella, ellapwaawo yoomora ni woonongeya, athwaawo aatthollowa ni ettalla ni ekhoto. Ttaani anaaweerelle echifundo? Ttaani anuukhurumuse murima?

²⁰ Anaawo aakomowa, eri millumillu va misewu ddittheddene wonanko mphoyo ookoliwa munthavini. Wohaamorella osha murima wa Apwiya, ohumullulla wa Mullukwiiwa.

²¹ We oohoosiwa, oolezela koma ohimuwinrye vinyo, sika vano iwa nndda.

²² Apwiya, Apwiyaawo, Mullukwaawo, ayo enuutetezella enallota wi, “Ngoona, koowaakha kapu oohahareyiha, kapu oyo kawinnyalleemini kishille murima khamuwa mumuwiryattho.

²³ Kinaamuvelleelle wa awuuhoosa ayo yuulleelle wi, ‘Konaatthi niweete vamutthanani.’ Mutthanaawo yaweesille vatthi voonyingallavo, yaweesille musewu waweetavo.”