Yesaya 5 - Mawu a Mulluku

Nchipo na emata yampesa

¹ Kimwiipelle ookondiwaaka nchipo na ookondiwaaka ni emataaye yampesa. Ookondiwaaka aakhalla ni emata yampesa, va ethaya yaphaama.

² Aayillima phaama, avenyihamo malluku, aallamo mpesa ddaphaama wunchichi. Aamaka nttattha variyari va emateeyo, aasema moovotellamo mpesa muwarimmo. Aatiyerella wi emateeyo yimme mpesa waphaama koma wimmalle mpesa woonanara.

³ Sika vano ookondiwaaka anallota wi, “Nyu athu ookhalla o Yerusalemu ni o Yuda, kinuuvekani wi mweeruze variyari va miyaano ni emataaka yampesa.

⁴ Ethiyo ehanllettho tti tini kiheerenlleemi emataaka yampesa? Ethiyo kaambiiwa tti tini vootiyerellani wi yimme mpesa waphaama, yimmalliiwa mpesa ddoonanara?”

⁵ “Vano imellani kuulleelleni nnddo kineerelleemi emata yampeseeyo. Kineerokumulla mpandiiwa nave enama ddineerochamo. Kineerokumullattho esiri ddiwa nave enama ddineeronyingallellamo.

⁶ Kineeroyitthattusa emateeyo ntthalla, enaakhalle yoohiphadderiwa ni yoohikoholliwa nave muneeromella kakande ni miiwa ddimodda. Kineerolamulellattho mirapo wi ddihimurupihe murimu.

⁷ Israele sika emata yampesa ya Apwiya Amasiva Mattheene Yuda sika mpesaaye woohakallalliha. Apwiya yaatiyerella ddaphaama koma yoonille wiiphanana. Alliwa yaatiyerella echilungamo koma yiiwalle winlla wa oohoosiwa.”

Ddoonanara dda athu

⁸ Otulli wa athu ayo enoonjerera okulla enyumba ni emata ddittheddene ophiyera waakha mapuro mattheene wi ellapo ekhalle yayiwayayiwa.

⁹ Kohiiwa Apwiya Amasiva Mattheene ellupellaka wi, “Ddawoona, enyumba ddinchichinnddo ddineerotthattuwa matepe, enyumba dduullupalli ddooreeranddo khamukhallaka athu.

¹⁰ Emata yampesa ya mahekitala khumi, vinywaaye anaaddalle muno mmoddave. Nave omidda mitaanga khumi a mmiddo, ddoohata ddene ddinaaddalle nidengu nimoddave.”

¹¹ Otulli wa athu ayo enavenya ohinase enathamakella yoowirya yoolezeliha, ayo enawirya ophiyera mahiiyu nave ophiyera elezenle wunchichi.

¹² Enakhallella wiipa azeze, magitala, ekoma ni ezitoliro, enamuwirya vinyo va machellellwiiwa. Koma khenapwatha apaalle woona mitteko dda matta a Apwiya.

¹³ Sika athwaaka eneerophariwa okaporo ekaamba yoohiiwesesa ddeko. Oohoollelliiwa oovahiwa olemu eneerokhwa ni ettalla nave athu shisha anchichi eneerokhwa ni nthona.

¹⁴ Ekaamba ya yeella o ellapo ya ookhwa khonavona, onnaatthama wi omwaakhelle arive muthu. Athu oovuwa a mu Yerusalemu ni athu shisha anchichi eneeromorellamo ni olezela wiwanko.

¹⁵ Arive muthu aneerokitthihiwa, attheene eneerovevulliwa nave awiitukhulla eneerowullihiwa muru.

¹⁶ Koma Apwiya Amasiva Mattheene aneerotitimihiwa ekaamba ya echilungamwiiwa. Mulluku Aweella aneerewooniha weella waye vaweerani ddoolungama.

¹⁷ Sika anamwanankhosa eneerocha vaavo wonanko vabusani viwa nave asaanaapuri eneerocha m'matepeni.

¹⁸ Otulli wa athu ayo eniimakellella ni machimo wonanko mikwe ni woottha wiwa, ayo ehinawora wiittaphulla o machimwiiwa.

¹⁹ Alliwa enallota wi, “Apwiya yaakuve, ephare muttekwiiwa moohiselliwa wi noone. Nnddo ddinapaalla weera Aweella a Israele ddeereye wi niddidduwelle.”

²⁰ Otulli wa athu ayo enaddeesa ddoonanara wi tti ddaphaama nave ddaphaama wi tti ddoonanara, ayo eneesa epiphi wi tti owala nave owala wi tti epiphi ayo eneesa ddoowaawa wi tti ddooddiva nave ddooddiva wi tti ddoowaawa.

²¹ Otulli wa athu ayo enaddeesa wi tti eezeru ni oochenjeresesa.

²² Otulli wa athu oolezela ayo enahiya murimiiwa va ottheka, ayo ehinoova naari vang'ono ottakanyihera ddoowirya ddoowalli.

²³ Otulli wa athu ayo enamulungamiha muthu oochimwa ekaamba ya ddamukaphwani nave enananariha mullatu wa muthu oohichimwa.

²⁴ Sika wonanko munllo onoonongelliiwa muttatthi ni manasi, emoddamoddave yeeyo musisiiwa oneerewunta nave malluwiiwa eneeronyaalla ni ovava wonanko nthupi kaambiiwa yaakhoota malamulo a Apwiya Amasiva Mattheene nave yaavevulla mawu a Aweella a Israele.

²⁵ Ekaamba ya yeella Apwiya ahaashella murima nave ahaattaphurusella athwaayo nnatta wi ewiiphe. Miyaango ddootikheya nave mitembo dda athwiiwa ddiri millumillu wonanko ekattha variyari va misewu. Koma naari Mulluku eerille ddennddo, osha murima waye khonamalle vawi nnatta naye nirive noottaphurusa.

²⁶ Apwiya eneerewiimesa embendera wiithana mutundu wa athu oovenyera woorekama. Eneerowiithana athwaayo ni mutturu wi ewe ovenyera woomallihella wa ellapo yavatthi ettheene nave alliwa eneeroowa moothamaka wunchichi.

²⁷ Khaavo naari mmodda anaatope anaakwakwatuwe, anaakwindime apaalle anaakone. Khaavo laamba anaattaphuwe nave khawiivo mukwe wa esapato onaaphaddeye.

²⁸ Mipaamba tti ddootthokowa nave miira ddiwa ddookhozeka. Manyallo a akavalwiiwa tti oollipa wonanko nlluku nave magaretiiwa tti oothamaka wunchichi wonanko ephevo ya namangalle.

²⁹ Okhuwa wiwa tti wonanko othuruma wa mikango apaalle misote nnddo ddininlla mwawoopiha voopharani enama nave ddinarowana oohikhallavo naari mmodda awaakihera.

³⁰ Nllapo nenno eneerothuruma wonanko enyanja. Nave mmodda voowehani ellapweeyo anoone epiphive ni ddookatamiha vawi naari owala oneerotthattuwa epiphi ekaamba ya mirapo.