Yesaya 49 - Mawu a Mulluku

Israele, oorumeyella a Apwiya

¹ Nyu athu a o ellapo dda mukhwipi mwa enyanja, iwani, nyu athu awoorekama, apellani maaru. Apwiya yaakiithana kihinayariwe, yaakiromolla nnddina kiri m'mirimani mwa amoowaaka.

² Aakitthattusa vayanoni vaka wi vikhalle wonanko nsupada nawiisha. Aakiteteza ni nnatta niwa aakihana wonanko mpaamba wootthokowa, aakiipitthiha munigoneloni mwiwa.

³ Aakilleella wi, “We Israele ori oorumeyellaaka, athu eneerokititimiha ekaamba ya weyaano.”

⁴ Koma kaallota wi, “Kipharille mutteko woohillivelliwa, kitathillelle masivaaka nivuddove.” Komave ddookiphwanella ddiri m'mattani mwa Apwiya, yoothuviwaaka eri mwa Mullukwaaka.

⁵ Apwiya sika yakoopille m'mirimani mwa amoowaaka wi kikhalle oorumeyelliiwa, wi kihokolloselle nlloko na Yakobo wa alliwa, wi kaatthukumanihe Aisraele vakhuviru ni alliwa. Sika kinnavahiwa olemu vamiitthoni va Apwiya, kinnaphwanya masiva mwa Mullukwaaka.

⁶ Apwiya enallota wi, “Tti ello yoovevuwa wi okhalle oorumeyellaaka, wi waavenyihe malloko a Yakobo, waahokollosella owaniwa Aisraele oohalla. Kineeroweerani wi mukhalle owala wa mitundu ddimodda dda athu, wi ovullusa waka ophiye o makomello a ellapo yavatthi.”

⁷ Apwiya, Aneerewoopolla ni Aweella a Israele, enallota wa oovevulliwa wunchichi, awiitiwa ni mitundu ddimodda dda athu, kaporo a mamwene eekuku wi, “Mamwene eneerewiimella moolemu voowoonani, naari enduna ddineeropopheya ekhove ddiwa.” Ddenndda ddineereye ekaamba ya Apwiya oororomelleya, Aweella a Israele ayo yuutthoollille.

Ohokolloselliwattho wa Israele

⁸ Apwiya enallota wi, “Enthawi kinaaganizeemi ddawuukondella kineerowaakhulla, nllapo na ovullusa kineerewuukavihera. Kineerewuusunga wi okhalle echipangano wa athu wi kiyihokolloselle mwakhalle ellapo, oyikawakawa yoohallana yawoonongeya.

⁹ Kineerewaalleella a mundende wi ekhume, a mwiipiphini wi yooneyelle vaweella. Eneerophwanya yoocha mukhwipi mwa musewu, eneerophwanya munyepu mu asimiyaango,

¹⁰ khevolliwa ettalla apaalle nthona. Ephevo yooviha apaalle nndduwa khaddiwoosa kaambiiwa oyo anaweerella echifundo aneerewaahoollella ni waavelleella o aneetuutu.

¹¹ Miyaango ddaka ddittheddene kineerodditthattusa ettilla, misewu ddaka dduullupalli kineeroddillima.

¹² Ngoonani, athwaaka eneerovenyera woorekama, amodda ompoto, amodda woovollowa nndduwa, amoddattho o Asuwani, omwera.”

¹³ We oddullu, ipa moohakallalla, we ellapo yavatthi, thapella! Nyu miyaango, ambani nchipo! Apwiya ahaakhurumusa murima athwiiwa, aaweerella echifundo athwiiwa oohoowa.

¹⁴ Koma athu a o Ziyoni yaallota wi, “Apwiya aanihiya, Apwiya aanitiwalla hiyaano.”

¹⁵ Apwiya yahaakhulla wi, “Ethiyo mutthiyana ttuumutiwalla mwanaye awaamwa apaalle oohimweerella echifundo mwaana oomuyara yeekha? Naari amutiwanlle mwanaye, miyaano, ngiwa kuutiwallani.

¹⁶ We Yerusalemu, kohuulemba m'mattani mwaka, esiri ddawo kinnaddoona erive enthawi.

¹⁷ Eeruso oowuumakattho enimawa mwawaakuva, oowuupasula ni oowoononga eneerewuuvenyeravo.

¹⁸ Owehe vawaapheellani, woone nnddo ddineereya. Athwaawo attheene enimatthukumana, enawa wa weyaano. Kinimallupella vamiitthoni vaka, athwaawo enaakhalle ello yawuureeriha oneerewaakotella wonanko mutthiyana ootthelliwa.

¹⁹ Ddawoona, wootthattuwa ntepe, oyo wahiyiwe ni opallallesiwa, Koma vano ookhalla mwa weyaano eneerewaata, weyaano oneeroyeva, athu yawoonongillaalle eneerewuurekamella.

²⁰ Anaawo ooyariwa va enthawi ya ethakaraka eneerewuullotellattho vamiitthoni vawo wi, ‘Ellapo ennaniyevella, noonjerereni nipuro wi nikhallekemo.’

²¹ Vano weyaano oneerewiikoha wi, ‘Ethiyo ttaani akiyarelle anamwanaalla? Anaaka attheene yaakhwa, kahumma, kaari wuukaporoni, kaatiwalleya. Ethiyo ttaani aallenlle anamwanaalla? Vawi ngoonani, miyaano kahanlle meekha. Ethiyo anamwanaalla evenyenre wuuwi?’ ”

²² Apwiya Mulluku enallota wi, “Kineerowuuvella matta mitundu dda athu ddimodda, kineerowiimesella embendela wi ewe. Sika eneerowaana anaawo aallopwana yaatukhullenlle m'miwononi, anaawo aatthiyana yiireyille vamathurini.

²³ Mamwene enaakhalle wonanko attiitthi awuullellani, mamweene aatthiyana enaakhalle wonanko amoowe oowaamwihani. Eneeromoriha ekhove ddiwa ni wuukokhorellani, eneerollanndda nthupi na m'manyalloni mwanyu mwawiiyeviha. Vaavo muneerodduwella wi mi tti Apwiya oyo anakiroromella miyaano khawa awulliwa muru.”

²⁴ Ethiyo ttuuwora owaakha akhoto nnddo yaakhilliiwa apaalle waavullusa oophariwa wa muthu eekuku?

²⁵ Apwiya enaakhulla wi, “Ddawoona, akhoto eneerewaakhiwa oophariwiiwa, eekuku aneerewaakhiwa nnddo aakhilleeye. Kineerollipana ni ayo enallipana ni nyuwaano, kineerewaavullusa aniinyu.

²⁶ Kineerewaawatihera awuuhoosani wi eche muhehiiwa eneerolezela ni nikhame niwa wonanko ni vinyo anaanweene. Sika athu attheene eneerodduwella wi Mi tti Apwiya, Oovullusaanyu, Oowoopollaanyu, Amasiva a Yakobo.”