Yesaya 48 - Mawu a Mulluku

Apwiya sika Mulluku a Muhoollo

¹ Nyu a nibanja na Yakobo, ngiiwani nndda, nyu munaromolliwa ni nnddina na Israele, nyu edduullu dda Yuda. Munnallupella vamiitthoni va Apwiya, munavekella wa Mulluku a Israele, koma moohiroromelleya ni moohilungama.

² Komave munniiromolla ni nnddina na muzinda wawella, munnaashave nikavihero wa Mulluku a Israele oyo nnddina naye tti Apwiya Amasiva Mattheene.

³ Apwiya enamulleella Israele wi, “Nnddo ddeereyille vawaamba kaavallallella ollota, ddaakhuma muwano mwaka nave kaaddillalleya. Moorurumusa kaheeravo ello, ddawoona, ddahooneya.

⁴ Kaadduwella wi weyaano tti awumma murima, awummiha nikohi wonanko mukoko.

⁵ Kahuulleella ddamuhoollo khalleve, ddihineereye kaallalleyella wa weyaano, wi ohiganizeke ddawi nifano nawo sika neerille ddenndda, nifano nawo apaalle mwanamullukwaawo aheeriha ddenndda.

⁶ Ddittheenenndda waaddiiwa sika vano onneesesa phaama, ethiyo khoddaakhullella? Ovenyera ollello ophiyera muhoollo, kinuulleella ddeko ddanaanweene, ddeko ddawiipittheya nnddo wahiddidduwenlleewe.

⁷ Ddeko nndda ddinaphatusiwa venevaveneva, ohiri khallekhalle. Ophiyera ollello waari ohinaddiiwe, woova wi onaalloteke wi, ‘Ddenndda kaaddidduwella khalle.’

⁸ Koma eyariwellwaawo khonaddiiweke, eyariwellwaawo khawaaddidduwenlle, waambeella khalle maarwaawo kheyaahulliwe, vawi kaadduwella wi ori namasikita, wi waambeella enamwanaawo yahuuromolla oohiroromelleya.

⁹ Kineeroselliha osha murima waka ekaamba ya nnddina naka kineerohokollosa osha murima waka ekaamba ya ntitimiho naka.

¹⁰ Kaaweelliha koma ohiri wonanko siliva, kaaweesa mu eng'anjo ya ddoohoosa.

¹¹ Ekaamba ya miyaano, meeneve kinneera ddittheddene. Nnddina naka nivevulliwe mwawiidde? Ntitimiho naka ngiwa kikawana ni mmodda.”

Kirusi oohoollella ootthoolliwa ni Apwiya

¹² Apwiya enallota wi, “Nyu Yakobo ni Israele, kaapelleni maaru, nyuwaano ayo kiwiithanilleemini. Miyaano sika Mulluku, kiri awaambeella ni oomallihella.

¹³ Mattaaka yaakeraatthiha matthipello a ellapo yavatthi, nnattanatta naka nahaanddellella oddullu. Kiithana ellapo yavatthi ni yooddullu, ddittheddenennddo ddinnatthukumana vamodda.

¹⁴ Tthukumanani attheenenyu nave mwiiwe! Ttaani mwa asimilluku allotenlle khalleve ddenndda? Ookondiwa ni Apwiya aneereweera ddoopaalla ddiwa va Babiloni, ni nnatta niwa namasiva eneerollipana ni Akaldeya.

¹⁵ Miyaano sika kallotille ni omwiithana, kimuwiillena tti miyaano, ddittheddene ddineeromweetella phaama.

¹⁶ Vano Waani vakhuviru, iwani nnddo kineereemi killote. Ovenyera vawaamba ngaallotille vaweella, enthawi eyo ddennddo ddeereyiiwa, miyaano sika kiri vaavo.” Sika vano Apwiya Mulluku Amasiva Mattheene aakiruma moohoollelliwa ni munepiiwa.

Yoolinga ya Apwiya va athwiiwa

¹⁷ Apwiya, Oowoopollaawo, Aweella a Israele enallota wi, “Mi tti Apwiya Mullukwaawo, ayo enuuhuddiha wi ddeko ddiweetelleke phaama, ayo enuuhoollella va ettilla yoophwanella oyithwara.

¹⁸ Wiiwellenlleke malamulwaaka, murendellaawo weerokhalla wonanko muhinje, echilungamo wonanko ephevo ya va enyanja.

¹⁹ Anaawo yeerewaata wonanko mihava, edduullu ddawo wonanko nthupi. Nnddina niwa khanaavenyihiwe vamiitthoni vaka, khanaamwaramwasiwe.”

²⁰ Khumani mu ellapo ya Babiloni, thawani mu ellapo ya Akaldeya. Mullalleye ni okhuwa wunchichi ophiya o makomello a ellapo yavatthi, voollotani wi, “Apwiya ennamoopolla Yakobo, oorumeyelliiwa.”

²¹ Yaahoollelliiwa athwiiwa mu echipululu, alliwa kheyaavolliwalle nthona, yahaavaha maaddi ookhuma vanllukuni, yaatthalla nllukunno nave mwaakhuma maaddi.

²² “Khaviri murendelle wa oochimwa,” Apwiya sika enallota.