Yesaya 47 - Mawu a Mulluku

Weeruziwa wa Babiloni

¹ Apwiya enallota wi, “We namwalli, Babiloni, kittha okeraatthi vanthupini. We namwalli, Babiloni, keraatthi vatthi voohikhalla mpando woomwene, vawi kheyuuromollattho awoollowa ni ooreera.

² Kusa nsillo wi osille othu, khunuulla ekuwaawo owiitthoni. Kwinya ddoowara ddawo, oniha akasambaraawo, llapuwa mihinje.

³ Epwillimwinddaawo enaakhalle vaweella, oneerowulliwa muru wunchichi, kineerohokollosella ddoonanara, khaavo anaakihiihe.”

⁴ Aweella a Israele sika Oonoopollaahu, nnddina naye tti Apwiya Amasiva Mattheene.

⁵ Anamulleella Babiloni wi, “We namwalli Babiloni, era ellapo tuu ni ovollowa mwiipiphini, khewa yuuromollattho mwene aamutthiyana a moomwene.

⁶ Kahaashella murima athwaaka, kahaahambulla wonanko khe yoohallanaaka. Kahaavelleella m'mattani mwawo, weyaano khewaaweerelle echifundo waawummella murima naari awuulluvalla.

⁷ Waganiza wi enthawi ddittheddene onaakhalle mwene aamutthiyana, mwawi ddeko ddenndda khewaaddipwathille m'murimani mwawo, khewaaganizerettho mmo ddinaamallelliiwa.

⁸ We ooddivelliwa ddoohakallalliha, iwesesa nndda, we ookhalla vamurendelleni, oollota m'murimani mwawo wi, ‘Tti meeneve, khaavottho mmodda opatula miyaano, ngiwa kikhalla naamukhwelle, anaaka khewa ekhwa.’

⁹ Koma mu enthawi yooyeva nllapo nimodda, ddeko piilli ddineerewuumorella, anaawo attheene eneerokhwa, oneerotthattuwa naamukhwelle, ddenndda ddineerewuumorella, naari ori ni masenga manchichi ni manyaka ddamasiva.

¹⁰ Waaniitukhulla ni onanara wawo, waganiza wi khaavo awoona. Owaraalla wawo ni ezeru ddawo ddahuuhollosa, m'murimani mwawo waallota wi, ‘Tti meeneve, khaavottho mmodda okipatula miyaano.’

¹¹ Otulli oneerewuumorella, khowora owurapella ni masengaawo. Mullilli woohithaweya oneerewuuphiyera, woononga woohitiyerella aneerewuuphwanya moorurumusa.

¹² Halla ni manyakaawo ni masengaawo vawi wookhalla opharihaka mutteko waambeella enamwanaawo. Apaalle ttuuwuukavihera, apaalle ttuuwoopopihana adanaawo.

¹³ Wiitopihelle nivuddove voovekani malangizo oohiyanahiyana, vano ewettho awuulangizaawo wi yuuvulluse. Ewe athu oohuddera ddamuddullu, oomolleella dda etheneeri, oollotella ddamuhoollo mweeri waawalaka.

¹⁴ Ngoona, athwaalla tti wonanko mittatthi, eneeroosha ni munllo, Khewora wiivullusa weekhiiwa o masiva a mallumi amunllo. Munllweene tti woohootheya tti woohaatamelleya.

¹⁵ Mmo sika enuukaviherelliiwa athu ayo waphareewena mutteko, weetiheewena malonda waambeella enamwanaawo. Attheenaayo eneeropallalleya, khavihalla naari mmodda wi uuvulluse.”