Yesaya 46 - Mawu a Mulluku

Milluku ddawoottha dda Babiloni

¹ Beli ootthettemana, Nebo oowarama! Mafano yaalla a Babiloni ehiyiwe vaabuluni ni vang'ombeni. Ddeko nnddo khalle mwadditukhulleenyu voollapellani, vano munaddeesa katundu oollemella vamutthanani wa enama ddootopa.

² Ennatthettemana, ennawarama, khenawora wiivullusa vawi enaya wuukaporoni.

³ “Nyu edduullu dda Yakobo, kiiwellelleni, nyu attheene oohalla a mu nibanja ya Israele. Kohuupwathani ovenyera eyariwellwaanyu, kahuutukhullani waambeella m'mirimani mwa ameenyu.

⁴ Va wuulluvalla wanyu kinaakhalleve yoolle, naari voomellani embwi kineerovirellella wuupwathani, kineerewuutukhullani ni kineerewuuvullusani.

⁵ Ethiyo mi ttuukiphwanaphwanihella ni aani, apaalle ttuukaatamanihella ni aani? Ethiyo ttuukillikanihella ni aani wi miyaano ni olliyooyo nikhalle oollikana?

⁶ Amodda ennamukhumiha golide m'mathumbani mwiwa, ennamulinga siliviiwa vasikeloni. Ennamulemba eeruso yoomuhana golide, olliye annaapangella mwanamulluku, ennakokhora ni omullapella.

⁷ Enniireya vamathurini viwa, ennamuhiya vamapuroni vaye immella vaavo, khanawora osusavo. Mmodda avekella wa khamwaakhulla apaalle omuvullusa o ddoohoosa.

⁸ Nyu oochimwa, upuwellani yeella, ganizerani ni odduupusattho.

⁹ Muupuwelle ddakhallenndde, miyaano sika Mulluku, khaavottho mmodda. Ddawoona, Mulluku tti miyaano, khaavottho mmodda wonanko miyaano.

¹⁰ Khalle kaavallallella ollota ddeko nnddo ddihineereye, kahuupullulla khalleve nnddo ddaari ddihinooneye. Kaallota wi, ‘Maganizwaaka khelephela, kineereweera ddoopaalla ddaka ddittheddene.’

¹¹ Kiniithana mpungu ovenyera wookhuma nndduwa, sika wi muthu oovenyera o ellapo yawoorekama oyo anaakwakhwanihelle nnddo kinapaalleemi weera. Nnddo killotilleemi kineeroddikwakhwanihella, nnddo kisimikizalleemi kineeroddeera.

¹² Nyu athu awumma mirima, kiiwellelleni, nyu oorekamellana ni ovullusa.

¹³ Kinnasusella vakhuviru ni ovullusa waka, kohaatamella, ngiselliwa wuuvullusani. Kineeromuvullusa Ziyoni, kineeroyiriiha ellapo ya Israele.”