Yesaya 45 - Mawu a Mulluku

Apwiya enamutthoolla Kirusi

¹ Apwiya enallota ni oozoziwiiwa* Kirusi oyo yamphareelliwa onnattanatta wi agonjihe mitundu ddimodda dda athu, aamallihe masiva mamwene ni ohulla machiwi wi millako ddihiwalleye wi,

² “Kineerewuuhoollella ni ollima musewaawo, omwaramwarella miyaango ni asimiyaango. Kineeronyenyanyenya machiwi amikuwa, kineerokothollakotholla ddoowallella ddiwa ddamikoko.

³ Kineerewuuvaha eyuuma yawiipittheya, ddoowallamella mutengo munipuroni noovittheya sika oneerodduwella wi mi tti Apwiya Mulluku a Israele oyo kinawiithana ni nnddina nawo.

⁴ Koowiithana ni nnddina nawo ekaamba ya oorumeyellaaka Yakobo ni ootthoolliwaaka Israele. Kohuuvaha nnddina nooriiheya wunchichi naari weyaano ohikidduwellaka.

⁵ Mi sika Apwiya, khaavottho mmodda, opatula mi khaavottho mulluku mmodda. Kineerewuuvaha masiva naari ohikidduwellaka.

⁶ Kineereweera ddenndda wi ovenyera wookhuma nndduwa ophiyera woovollowa nndduwa arive muthu adduwelle wi khaavo mmodda koma miyaanove. Mi sika Apwiya, khaavottho mmodda.

⁷ Kinnaphatusa owala ni epiphi, kinnawiiha madaliso ni otulli. Mi Apwiya kinneera ddittheddenenndda.

⁸ We murapo, murupihe murimu ovenyera oddullu, mirapo ddiithe echilungamo. Ellapo yavatthi ehulleye wi vikhume ovullusa, wi vimelle echilungamo. Mi Apwiya sika kinaphatusa ddenndda.”

Apwiya Oophatusa ni Awookollella ddittheddene

⁹ Otulli wa oyo anakangana ni Oophatusaaye vawi ari wonanko nivalli shisha variyari va mavalli makhwaaye. Ethiyo olloko ttuumukoha awoopa wi, “Ethiyo onoopa tini?” Apaalle ollota wi, “Awoopawe, khonna eruso!”

¹⁰ Otulli wa oyo anaakoha attiitthinnya wi, “Ethiyo muyarille tini?” Apaalle anaakoha amennya wi, “Ethiyo muyarille tini?”

¹¹ Apwiya Aweella a Israele ni Oophatusaaye enallota wi, “Ethiyo we ttuukikoha dda anaaka apaalle okilamulella va mitteko dda mattaaka?

¹² Mi sika kaphatusalle ellapo yavatthi ni omuphatusa muthu wi akhallekemo. Kahaanddellella ddooddullu ni mattaaka, kinnalamulella ddittheddene ddooddullu.

¹³ Mi sika kamuvenyihalle Kirusi wi echilungamo yooneye, kineerewookolla orive musewu onaavireewemo. Aneeromakattho muzindaaka wa Yerusalemu ni waattaphulla athwaaka ayo eri muukaporoni, oohivelleella makobiri apaalle ddamukaphwani. Mi Apwiya Mulluku koollota.”

¹⁴ Apwiya enamulleella Israele wi, “Eyuuma ya o Iguputo ni malonda a o Kushi ddinaakhalle ddaanyu. Athu oorekama a o Saba eneeroowa wa nyuwaano eneerokhalla akaporwaanyu, eneerekewuuthwarani emakiwa ni onyolo. Eneerekokokhora ni ollota wi, ‘Mulluku ari ni nyuwaanove, khaavottho mmodda, Omupatula olliye khaavo mulluku mmodda.

¹⁵ Ddawoona, mookhalla ni Mulluku ooddiipitthiha, Mulluku a Israele, Oovullusa.

¹⁶ Attheene ayo enapanga mafano aneerewaawulliha muru ni waavevulla, eneeromwareya yaapheelle muru.

¹⁷ Koma Israele anavullusiwa ni Apwiya, ovullusiwa waye oneerokhallavo wa enthawi yoohimalla. Athwaaye khewa ewulliha muru, khewa evevulliwa.’ ”

¹⁸ Apwiya ayo yaphatusalle ddooddullu, Mulluku oyo oopille ni ophatusa ellapo yavatthi, ayikeraatthiha mwamasiva, khaayipangille wi muhikhalle ello koma wi ekhalle nipuro nookhallamo athu, enallota wi, “Mi sika Apwiya, khaavottho mmodda.

¹⁹ Ngaallotille mwawiipitthiha vanipuroni noovittheya mu ellapo yeepiphi. Ngaaddilleelle edduullu dda Yakobo wi ddikaashaasheke o ellapo yoohikhalliwa. Mi Apwiya kinallota ddawoona, kinallalleya ddoolungama.”

Apwiya sika Mulluku a attheene

²⁰ Apwiya enallota wi, “Tthukumanani vamodda nave muwe. Nyu attheene mwavulluwalle wa athu a mitundu ddimodda, susellani vakhuviru. Khenna ezeru athu ayo enatukhulla mafano amiteekho, enavekella wa milluku ddoohivullusa.

²¹ Hankoni mutthopoolle mullatwaanyu, mwiiwanane emodda. Ttaani allotenlle khalleve ddamuhoollo apaalle addillotenlle ddennddo khallekhalle? Ethiyo khe mi Apwiya? Ddawoona, opatula miyaano, khaavo mulluku mmodda, Mulluku oolungama ni oovullusa, khaavottho mmodda opatula miyaano.

²² Nyu athu a va ellapo yavatthi, rukunuwellani wa miyaano wi muvulluwe. Valle miyaano sika Mulluku, khaavottho mmodda.

²³ Killupenlle mu nnddina naakave, eyanwaaka ellotille ddawoona, mawu oohisintheya awi, ‘Nirive nikuttha nineerokikokhorella, athu attheene eneerollupella vooromollani nnddina naka.’

²⁴ Eneerollota dda miyaano wi, ‘Echilungamo ni masiva ddiri mwa Apwiyave.’ Attheene ayo yakiwukilalle eneerowulliwa muru nave eneeroowa wa miyaano.

²⁵ Mwa mi Apwiya edduullu dda Israele ddineerolungamihiwa ni ohakallallihiwa.”