Yesaya 44 - Mawu a Mulluku

Apwiya sika Mulluku mmoddave

¹ Apwiya enallota wi, “We Yakobo, oorumeyellaaka, we Israele, ootthoolliwaaka, apella maaru!

² Mi tti Apwiya ayo yuuphatusalle, ni yawoopille m'mirimani mwa amaayo ayottho enuukavihera. We Yakobo, oorumeyellaaka, we Yeshuruni, ootthoolliwaaka, ohoove.

³ Kineerohella maaddi veellaponi yawumma, kineereweetiha mihinje muchipululuni. Kineerewaarumihella anaawo munepaaka, kineerokitthiha madaliswaaka va edduullu ddawo.

⁴ Alliwa eneeromella wonanko manasi oohellelliwa phaama, wonanko nnjalle mukhwipi mwa muhinje.

⁵ Mmodda aneerollota wi, ‘Miyaano kiri a Apwiya,’ mmoddattho aneeroddeesa a athu a Yakobo, mmoddattho aneerolemba va nnatta naye wi, ‘A Apwiya,’ aneerewiiromolla a athu a Israele.”

⁶ Apwiya, Mwene ni Oowoopolla a Israele, Apwiya Amasiva Mattheene enallota wi, “Mi tti awaambeella ni oomallihella, khaavottho Mulluku mmodda koma meekhave.

⁷ Ttaani vano anallikana ni miyaano? Iimelle, allote nave akitthopoollelle. Ttaani allotenlle khalleve ddamuhoollo? Vano anilleelle nnddo ddinaaweereye.

⁸ Muhitathille murima, muhoove. Ethiyo ovenyera khallekhalle nguulleelleni ni wuusimikizellani ddenndda? Nyuwaano muri ambonaaka. Ethiyo ookhallavottho Mulluku mmodda okihiya miyaano? Iyaayi, khaniivottho nlluku nimodda, nginadduwella naarimi nirivo nimodda.”

Ovevulliwa wa oopanga mafano

⁹ Attheene oopanga mafano tti oohikhalla ni mutteko, milluku nnddo enaddivahiiwa olemu tti ddoohikhalla ni mphuro. Amboni a milluku ddenndda tti oohoona ni oohidduwella ello, sika eneerowullihiwa muru.

¹⁰ Ttaani anapanga nifano apaalle mwanamulluku oohikhalla ni mphuro?

¹¹ Attheene oollapella nifanonno eneerowullihiwa muru vawi oopanga mafano tti athu shisha. Attheene oopanga mafano etthukumane o nthato namillatu eneerewoopopiheya ni owulliwa muru.

¹² Eeruso ya mikoko anakusa mukoko awuhiya viikho. Ni nnatta naye namasiva annawuhana voowuuphwinyani ni hamala. Vatulli viwa annavolliwa ettalla ni omalla masiva nave aahiwirya maaddi annafooka.

¹³ Eeruso yamatabwa annawulinga muteekho ni mukwe. Annajambulavo echithunzi ni epesulo, ayisemasema phaama ni ezida ddaye. Vatulli viwa annayipotokosa wonanko muthu ooreera wi ehiyiwe mu enyumba ya mavekello.

¹⁴ Annuuha miteekho ddamukunguza apaalle anatthoolla muteekho wa paini apaalle wa muthundu wi wunnuweke muutthakoni apaalle annaalla miteekho ddimodda dda paini wi ddinnuweke ni murimu.

¹⁵ Embali emodda ya muteekhooyo muthu annayootha nave annayaapeyella buledi. Embali emodda annayipangella nifano wi anillapelleke apaalle mwanamulluku wi amukokhorelleke.

¹⁶ Embali emodda ennoosellavo enama eyo enayicheeye ophiyera ovona. Ennawoothattho munllooyo enallota wi, “Aha! Nginoona oriirya, munlloolla onnaddiva!”

¹⁷ Embali yoohalleeyo annayipangella nifano naye apaalle mwanamullukwaaye anallapella ni okokhorella anavekella wi, “Kivulluse vawi weyaano tti mullukwaaka!”

¹⁸ Athu awi ddiidda khenadduwella ello nave kheniiwesesa naari vang'ono. Miitthwiiwa yoomarelliwa wi ehoonena. Khenna ezeru wi ehiiweseseke.

¹⁹ Khaavo anaganiza phaama, khaavo eezeru apaalle awiiwesesa oowora oollota wi, “Embali emodda ya muteekho kaayootha, va mankhalliiwa kaamwaapeyavo buledi nave kahoosavo enama kicha. Vano embali yoohalleella kaapangella ello yoonanara. Ethiyo mi killapelleke muteekho?”

²⁰ Muthooyo anakhalla wonanko anacha ntuura, maganizwaaye ookarangeya ennamuhollosa wawi khaworattho ovullusa okumaaye. Khaworattho wiikoha yeekha wi, “Ethiyo ello eri m'mattani mwakammu khehiyo yawoottha?”

Apwiya, Oophatusa ni Oovullusa

²¹ Apwiya enallota wi, “We Yakobo, upuwella nndda vawi weyaano tti oorumeyellaaka, we Israele. Kahuuphatusa, weyaano tti oorumeyellaaka, we Israele ngiwa kuutiwalla.

²² Kooddivenyihavo ddoolakwa ddawo wonanko murapo, machimwaawo wonanko ethapo, hokollowella wa miyaano vawi koowoopolla.”

²³ Nyu ddamuddullu, ipani moohakallalla vawi Apwiya aaphara mutteko. Nyu mapuro oowallamella a ellapo yavatthi, khuwani! Nyu miyaango, ambeellani machipo! We otthako ni miteekho ddawo ddittheddene. Ipani kaambiiwa Apwiya aamoopolla Yakobo, yohooniha ntitimiho niwa mwa Israele.

²⁴ Apwiya Oovullusaawo, ayo yuupangille m'mirimani mwa amaayo, enallota wi, “Mi tti Apwiya ayo yapangille ddeko ddittheddene, kaanddellelleemi ddooddullu, kaari meekha. Kaphatuseemi ellapo yavatthi ethiyo ookhallavo oyo akikaviherille?

²⁵ Miyaano sika kinnalepheliha ezizindikiro dda amasenga kinaakarangeyiha athu awoombesa makhanga. Miyaano sika kinaahumullulla mawu a athu eezeru, kinnooniha wi ezeru ddiwa tti ddookarangeya.

²⁶ Miyaano sika kinasimikiza mawu a oorumeyellaaka, kinakwakhwanihera nnddo amithengaaka yallotenlliiwa. Miyaano sika kinallota dda Yerusalemu wi athu eneerokhallattho wenko, dda mizinda dda o Yuda wi ddineeromakiwattho, kineerovenyihattho mapurwiiwa yakumulliwe.

²⁷ Miyaano sika kinalleella Enyanja Yuullupalli wi, ‘Umma nave mihinje ddawottho kineeroddummiha.’

²⁸ Mi sika kinallota dda Kirusi wi ‘Olliye tti mbusaaka, aneereweera ddittheddene kinapaalleemi. Aneerolamula wi Yerusalemu amakiwettho, wi matthipello a enyumbaaka ekeraatthihiwe.’ ”