Yesaya 43 - Mawu a Mulluku

Apwiya enalonjeza waavullusa athwiiwa

¹ Koma vano Apwiya ayo yuuphatusalle we Yakobo ayo yawoopille we Israele enallota wi, “Ohoove kaambiiwa kaawoopolla, kaawiithana ni nnddina nawo, we tti aaka.

² Voollapuwani enyanja kineerokhalla ni weyaano, voovirani m'muhinjeni khokwekweresiwa. Vaweetani vamunlloni khosha, mallumi amunllo kheyuushellelliha.

³ Mi tti Apwiya Mullukwaawo, Aweella a Israele, Oovullusaawo. Kinamvelleella Iguputo voowoopollani weyaano, kinamvelleella Kushi ni Seba munipuroni mwa weyaano.

⁴ Ekaamba yawi ori oowallamella mutengo vamiitthoni vaka, ekaamba yawi ori ooriiheya nave kinnuukonda, kinnavelleella mitundu ddimodda dda athu wi kiwoopolle.

⁵ Ohoove vawi kiri ni weyaano. Kineerohokollosa edduullu ddawo ovenyera wookhuma nndduwa, kineerodditthukumaniha ddittheddene ovenyera woovollowa nndduwa.

⁶ Kineerewaalleella oompoto wi, ‘Ahiyeni!’ Kineerewaalamula oomwera wi, ‘Muhaawanddeellelle!’ Anaaka aallopwana ehokollowe ovenyera o ellapo ddawoorekama, anaaka aatthiyana ewe ovenyera wookomella ellapo yavatthi,

⁷ arive muthu oyo anadduwelliwa ni nnddina naka, oyo kamphatusalleemi ekaamba ya ntitimiho naka, oyo kamoopilleemi ni ompanga.”

Aisraele tti amboni a Apwiya

⁸ Apwiya enallota wi, “Wiithaneni athwaaka o nthato namillatu. Miittho aakhallana koma khenoona, maaru aakhallana koma kheniiwa.

⁹ Mitundu ddittheddene dda athu dditthukumane, athu a o ellapo ddittheddene ekhallevo vamullatunimvo. Ttaani mwa alliwa atthopoollille ddenndda? Ttaani allotenlle ddamuhoollo wa hiyaano? Eweena amboniiwa esimikize mawiiwaayo wi athu amodda yiiwe ni ollota wi tti ddawoona.

¹⁰ Nyu Aisraele, muri ambonaaka, muri oorumeyellaaka ayo kuutthoollilleemini wi mukidduwelle ni okiroromella, mwiiwesese wi meekhave sika Mulluku. Kihinakhallewo khavaari mulluku mmodda, vatulli vaka khaviwa vikhallattho mmodda.

¹¹ Miyaano sika Apwiyave, Oovullusaanyu tti meekhave.

¹² Tti miyaano kallotenlle ddenndda, tti miyaano kuuvullusalleni. Khe mulluku mmodda eelleto oyo addeerille variyari vanyu. Nyuwaano sika ambonaaka, mi Apwiya koollota.

¹³ Mi tti Mulluku nave kineerokhallavove, khaavo anaawore othawa m'mattani mwaka apaalle orukunusa mitteko ddaka.”

Aisraele eneerovenyawo o Babiloni

¹⁴ Apwiya, Oowoopollanaanyu, Aweella a Israele enallota wi, “Kineeroruma mulloko wa akhoto wallipane ni Babiloni wi kuuvulluseni. Kineerokumulla millako dda muzindooyo, ohakallalla wa athu oneerotthattuwa winlla.

¹⁵ Mi tti Apwiya, Aweella, Oophatusa a Israele, mwenaanyu.”

¹⁶ Khalle Apwiya yaapanga musewu va enyanja, ettilla variyari va maaddi amasiva.

¹⁷ Yaatthukumaniha magareta ni akavalo, mulloko wakhoto ni akhoto amasiva. Attheenaayo yaahiikuha oohivenyattho, yaathiimihiwa ni omalla wonanko ntthupu.

¹⁸ Apwiya enallota wi, “Muhikeraattheye mu ddakhalle apaalle oganizera ddeko ddeereyille khalle.

¹⁹ Kineera ddeko ddanaanweene, ddohaamba khalle wooneya, ethiyo khamunoona? Kinallima musewu muchipululuni, kineetiya mihinje mu ellapo yawumma.

²⁰ Enama ddamuhakani ddineerokiriiha, akhatwe ni anthiwatiwa eneerokititimiha, kaambiiwa kineereweetiha maaddi muchipululuni, mihinje mu ellapo yawumma wi kaavahe maaddi athwaaka ootthoolliwa.

²¹ Yaayo tti athu kiiphatuselleemi, ekiipelleke machipo ookititimiha.”

Machimo a Israele

²² Apwiya enallota wi, “Koma we Yakobo, khawaavekenlle wa miyaano, we Israele, waatopa ni miyaano.

²³ Khawaavelleelle wa miyaano enkhosa wi ddikhalle ddoovelleella ddooshellelliha, khawaakititimihalle ni mikutho ddawo. Nguullemenlle vawuuvekani ddoovelleella ddawo, nguutopihalle vawuuvekani lubani.*

²⁴ Khawakikullenlle ddeko ddawunkhella, khawaakikwakhwanihelle ni makhura a mikutho ddanyu. Koma munipuroni mwene wookillemella ni machimwaawo, wookitopiha ni ddoolakwa ddawo.

²⁵ Miyaano, ddawoona miyaano, tti oyo anakhululukella machimwaawo ekaamba ya ntitimiho naka nguupuwellaka machimwaawo.

²⁶ Okuupuse ddakhalle, hanko vano nillote mullatwaawo, kitthopoollelle mullatwaawo wi kholakwille.

²⁷ Nikhollo nawo nawaamba naachimwa, oohoollellaawo yaakilakwella,

²⁸ mamwenaanyu yaaripiha nipuro naka naweella. Ekaamba ya yeella kahaakhullella wi Yakobo oonongiwe, Israele avevulliwe.”