Yesaya 42 - Mawu a Mulluku

Oorumeyella a Apwiya

¹ Apwiya enallota wi, “Olla tti oorumeyellaaka oyo kamuthoollilleemi, kinamukondeemi ni ohakallallana wunchichi. Kineeromwinnya munepaaka aneeroweeruza athu a mitundu ddittheddene mweechilungamo.

² Khakhuwa apaalle owelliha mawu, mawaaye kheyiiweya m'musewuni.

³ Khawa inttaka epango yookhoromana, khawuthiimiha munllo woollova, aneerowaana echilungamo moororomelleya.

⁴ Khafookella apaalle otathilla murima ophiyera ekeraatthihalle echilungamo va ellapo yavatthi, ellapo ddawoorekama ddinatiyerella malamulwaaye.”

⁵ Mulluku Apwiya aaphatusa ni waanddellella ddooddullu, aaphatusa ellapo yavatthi ni ddittheddene ddiri mwemmo, aavaha okumi ni mpweya wa athu ookhalla mwiillaponimmo. Olliye anallota wi,

⁶ “Mi Apwiya koowiithana wi okeraatthihe echilungamo. Kohuuphara nnatta ni wuusunga, kohuutthoolla wi okhalle echipangano wa athu, okhalle owala wa athu a mitundu ddimodda.

⁷ Oneerewaahulla miittho athu oohoona, oneerewaattaphulla oomakiwa, oneerewaakhumiha ookhalla mwiipiphini.

⁸ Mi tti Apwiya, nnddina naka tti nenno khaavo kinakawaneemina ntitimiho naka nginakawana ntitimiho naka ni mafano.

⁹ Ngoonani, ddeko kallotenlleeminndde ddoheereya, sika kineerewuulleellani ddeko ddanaanweene, kineerewuulleellani khalleve ddinooneye.”

Nchipo nowaatitimiha Apwiya

¹⁰ Muwiipelle Apwiya nchipo nanaanweene! Nyu ookhalla mu ellapo yavatthi ettheene, atitimiheni! Nyu ddoophatusiwa ddittheddene dda mu enyanja, ariiheni. Nyu ellapo ddawaatamella attheene ookhalla wenko wiipelleni.

¹¹ Echipululu ni mizinda ddiwa ddaatitimihe Apwiya, mizi dda Akedara ddaariihe. Ookhalla mu muzinda wa Shela ewiipelle moohakallalla, ekhuwe vaddullu va miyaango.

¹² Yaatthamalle Apwiya, ellalleye olemwiiwa o ellapo ddawaatamella enyanja.

¹³ Apwiya enaya okhotoni wonanko amasiva, ennanyanyulla owalliiwa wonanko muthu akhoto Ennakhuwa, ennakhuwa mwakhoto, ennooniha masiviiwa vawaakhwaranyani adaniiwa.

Apwiya enalonjeza waakavihera athwiiwa

¹⁴ Apwiya enallota wi, Tti khalle keerelleemi ellapo tuu, kakhurumuwalleemi oohillota ello. Koma vano kiniipullella wonanko mutthiyana va enthawi yoomuyara mwaana, kinnavumella muddullu.

¹⁵ Kineerewoononga miyaango ni asimiyaango, kineerewummiha manasi ni miteekho ddene wenko. Kineerotthattusa mihinje wi ddiwe mitunda, kineerewummiha mathiya.

¹⁶ “Kineerewaahoollella oohoona m'misewuni ehiddidduwenlliiwa, kineerewaavelleella va ettilla nnddo ehinavirekiiwa. Kineerotthattusa epiphi eri vahoollo viwa wi ekhalle owala, kineeromwaramwara phaama nipuro nookateyakateya. Nndda sika kinaaweerelleemi, ngaakhoota alliwa.

¹⁷ Attheene oororomella mafano, enallota wa mafanwaayo wi, ‘Muri milluku ddahu,’ eneerovevulliwa ni owullihiwa muru.”

Ohihuddiheya wa Aisraele

¹⁸ Apwiya enallota wi, “Oohiiwanyu, ngiiwani! Oohoonanyu, ngawehani ni woona!

¹⁹ Ttaani ari oohoona koma ari oorumeyellaaka? Ttaani ari oohiiwa koma ari amithengaka kinamurumeemi? Ttaani ari oohoona koma kakeraatthihana echipangano? Ttaani ari oohiiwa koma tti oorumeyella a Apwiya?

²⁰ Wohoona ddinchichi koma khonaddipwatha, Maarwaawo tti oohulla koma khoniiwa.”

²¹ Ekaamba ya echilungamwiiwa Apwiya yaapaallesesa wi malamulwiiwa ekhalle avaddullu ni oolemu.

²² Koma vano athu yaalla ahiiyeriwa ni waakhiwa ddeko ddiwa. Attheenaayo aamorella munllitini aavitthiwa mundende. Ahaakhiwa oohikhallavo mmodda owaavullusa, ahiiyeriwa oohikhallavo mmodda oollota wi, “Hokollosani!”

²³ Ttaani mwa nyuwaano oyo aniiwesese ddenndda, oyo anaapelle maaru ni opwatha muhoollommu?

²⁴ Ttaani amuvelleelle Yakobo wa awaakha nave Israele wa allupaawiiya? Ethiyo eneera ddenndda khe Apwiya? Valle nahaachimwella, khanaathwarille ettilla ddiwa, khanaawiiwellelle malamulwiiwa.

²⁵ Sika yaanishella murima wunchichi, yaanihoosa ni ekhoto. Yaahella munllo virive veko voonaapheella, koma hiyaano oohiiwesesa. Munllo waanishellelliha, koma hiyaano oohihudderavo ello.