Yesaya 41 - Mawu a Mulluku

Mulluku anaallipiha murima Aisraele

¹ Mulluku anallota wi, “Nyu ellapo mukhwipi mwa enyanja, Erani ellapo tuu wi mukiiwesese, athu a mitundu ddittheddene ekhalle ni masiva anaanweene, waakhullelleni wi ellote, hankoni nitthukumane vamodda wi eneeruze.

² Ethiyo ttaani amuwiillena oogonjihoolle oovenyera wookhuma nndduwa, olle opambana orive weko anayeeyewo. Ethiyo ttaani anamukavihera wi aapambaneke athu a mitundu ddimodda ni waagonjiha mamwene? Nsupada naye ninnatthattusa athu okhalla nthupi, muuraaye onnaamwara wonanko mallulla.

³ Annaathwara nngu eetaka moohikatamiha, muttillani mmo manyallwaaye khenanyingallekemo.

⁴ Ethiyo ttaani eerille ddenndda ophiyera omalliha, ohiri oyo aambihalle mitundu ddittheddene dda athu? Mi Apwiya tti awaambella ni oomallihella, miyaano meekha tti olliyooyo.

⁵ Athu a ellapo dda mukhwipi mwa enyanja yohoona nnddo keerilleemi nave ahoopopiheya. Athu a omamallihello wa ellapo yavatthi ennatthukumella, ennasusella vakhuviru, ennawa.

⁶ Arive muthu annamukavihera mukhwaaye, anamulleella wi, ‘Llipa murima.’

⁷ Eeruso ya matabwa annamullipiha murima oomweeka golide, oopotokosa nifano ni hamala annamullipiha murima ootthatta vanllukuni noohanella, ollota dda oowooserera enallota wi, ‘Ddookhalla phaama.’ Vatulli viwa annanikhomella nifanonno wi nihimore.

⁸ Koma we Israele oorumiwaaka, we Yakobo ootthoolliwaaka tti edduullu ya Abrahamu mukhwaaka.

⁹ Kuukusalle ovenyera omamallihello wa ellapo yavatthi, kaawiithana ovenyera o makona awoorekama a ellapo. Kahuulleella wi, ‘We tti oorumiwaaka, kahuutthoolla ngaawukhootille.’

¹⁰ Ohoove kaambiiwa mi kiri ni weyaano, ohitathille murima vawi mi tti Mullukwaawo. Kineerewuuvaha masiva, kineerewuukavihera, kineerewuuteteza ni nnattanatta naka noogonjiha.

¹¹ Ngoona, attheene ayo enuushella murima eneerowulliwa muru ni okhwa mullakallaka. Ayo enuuvaanyiha weyaano enaakhalle wonanko etthiru, eneerokhwa.

¹² Oneerowaashaasha ayo yallipana ni weyaano koma khuwaaphwanya. Ayo yawana ni weyaano khekhalla ello.

¹³ Mi Apwiya Mullukwaawo kinnuuphara nnatta, kinuulleella wi, ‘Ohoopopiheye, kineerewuukavihera.’ ”

¹⁴ We Yakobo, oofooka wonanko enyambo, ohoove, we Israele, ohoopopiheye, oovullusaawo tti miyaano, Aweella a Israele.

¹⁵ Kineerewuutthattusa magareta awuuputhella tirigu, anaanweene ni amiino awiisha. Oneerewuuputha miyaango ni oddinyenyanyenya, asimiyaango oneerewaatthattusa mallulla.

¹⁶ Oneerewaaveettha ni waavaviha ni ephevo, eneeromwareya ni namondwe. Koma weyaano oneerohakallalla ekaamba yawi miyaano tti Mullukwaawo. Oneerophwanya ntitimiho ekaamba ya miyaano Aweella a Israele.

¹⁷ Oopaneya ni oohoowa vawaashaashani maaddi, koma oohaaphwanya nave ommilloni wiwa wohumma, mi Apwiya kineerewaakhulla ovekella wiwa, miyaano Mulluku a Israele ngiwa kaahiya.

¹⁸ Kineereweetiha mihinje variyari va asimiyaango awumma, aneetuutu eneerokhuma m'mataponi. Kineerotthattusa echipululu okhalla nthiya na maaddi, ellapo yawumma okhalla aneetuutu.

¹⁹ Muchipululuni kineeromellihamo mukunguza, kesha, muchisu ni muteekho wa olivi. Mu ellapo yawumma kineerewaallamo miteekho dda paini dda mitundu miraru.

²⁰ Sika athu eneerewoona ni odduwella, eneerodduwellesesa ni wiiwesesa wi mi Apwiya sika kenre ddenndda, wi Aweella a Israele sika addikeraatthihalle.

Apwiya enahumullulla milluku ddawoottha

²¹ Apwiya enalleella milluku wi, “Vano tthopoollani mullatwaanyu.” Apwiya mwene a Yakobo eni, “Velleellani ombonaanyu.

²² Muwe wuno munilleelle ddamuhoollo, mutthopoolleelle nthato ddakhallekhalle wi niddiganizere ni odduwella ddoothwarellella ddiwa apaalle munilleelle ddamuhoollo.

²³ Nilleelleni nnddo ddineereye muhoollo wi nidduwelle wi muri millukulluku. Muweena madaliso apaalle otulli wi munittikhinihe ni onoopopiha.

²⁴ Nyuwaano khemuri ello, ddaweera ddanyu kheddinna mutteko, awuutthoollani ennakinanara.

²⁵ Koomuvenyiha muthu mmodda ompoto nave olliye, muthooyo anavenyera wookhuma nndduwa, olliye anniithana nnddina naka. Annaavota oolamulella wonanko matokwi, wonanko awoopa epalli anavotelleeye olloko.

²⁶ Ttaani uupullunlle khalleve ddenndda wi hiyaano nidduwelle? Ttaani anilleelle khalleve ddenndda ddihineereye wi tti ddawoona? Khaavo naari mmodda addillotille, khaavo naari mmodda allalleyille apaalle iiwalle mawaanyu.

²⁷ Mi Apwiya sika kaambille omulleella Ziyoni wi, ‘Athwaawo enimawa! Enimawa owaani!’ Miyaano sika kamurumihalle oollalleya othenga waphaama o Yerusalemu.

²⁸ Koma kaweha khaavo naari mmodda, khaavo oowora olangiza, khaavo oowora waakhulla makohwaaka.

²⁹ Ddawoona, milluku ddenndda khe ello, ddaweera ddiwa khaddinna mutteko.”