Yesaya 40 - Mawu a Mulluku

Mawu ookhurumusa murima

¹ “Akhurumuseni murima, akhurumuseni murima athwaaka,” Mullukwaanyu oollota.

² “Mullote mwawiithalla ni athu a o Yerusalemu, mwaalleelle wi enthawi ya ddoohoosa ddiwa yoomalla, machimwiiwa aakhululukiwa. Kohaallaka wunchichi ekaamba ya machimwiiwa.”

³ Onniiweya okhuwa wawi, “Potokosani musewu wa Apwiya muhakani, okollani ettilla ya Mullukwaahu muchipululuni.

⁴ Nirive ntapo nivuhellelliwe, orive mwaango ni mwanamwaango okumulliwe. Ellapo yookateyakateya eyimwaramwarelle mapuro oowella yaatthattuse ookittha.

⁵ Vano ntitimiho na Apwiya nineerewooneya, athu attheene eneerewoona, vawi Apwiya sika ellotille ddenndda ni eyanwiiwa.”

⁶ Wahiiweya okhuwa wawi, “Llalleya othenga!” Kaakoha wi, “Killalleye tini?” Okhuwa wulle waari wi, “Ollalleye wi athu attheene tti wonanko manasi, oreera wiwa tti wonanko malluwa oohakani.

⁷ Manasi ennumma, malluwa ennanyaalla, Apwiya yaviddellella mpweyiiwa. Ddawoona, athu ennaphwanaphwana ni manasi.

⁸ Manasi ennumma, malluwa ennanyaalla koma mawu a Mullukwaahu tti oohimalla.”

⁹ We oollalleya othenga waphaama o Yerusalemu, wella va mwaango woorekama. We oollalleya othenga waphaama o Ziyoni, khuwa mwamasiva. Welliha mawu, ohoove, olleelle mizinda dda o Yuda wi, “Olla sika Mullukwaanyu!”

¹⁰ Ddawoona, Apwiya Mulluku enimawa wi elamulelle mwamasiva, olamulello ori m'mattani mwiwa. Enawa ni mallivellwiiwa, aahoolliha yoothuviiwa.

¹¹ Eneeropwatha enkhosa ddiwa wonanko mbusa, eneerewaatthukumaniha anamwanankhosa ni waakhupaarella, eneeroddihoollella phaama enkhosa ddawaamwiha.

Mulluku Amasiva Mattheene a Israele

¹² Ethiyo ttaani eesille waata wa maaddi a mu enyanja ni nnatta naye apaalle orekama wa muddullu ni muwonwaaye? Ethiyo ttaani eesille ethaya ettheene ya ellapo yavatthi ni mutaanga apaalle ollemella wa miyaango ni asimiyaango vasikeloni?

¹³ “Ethiyo analamulella maganizo a Apwiya ttaani? Ethiyo ttaani anaawore omulangiza?

¹⁴ Ethiyo Apwiya yavekilleke ezeru wa aani wi edduwelle ddeko apaalle ttaani aahuddihalle weeruza moolungama apaalle aahuddihalle odduwella ddeko apaallettho owoonihella ettilla ya wiiwesesa?

¹⁵ Mitundu dda athu ddiri wonanko nidontho na maaddi m'munoni, wonanko nthupi shisha vasikoloni. M'mattani mwa Apwiya ezilumba tti ddoovevuwa wonanko nthupi.

¹⁶ Otthako wa o Lebanoni khokwakhwanihella ekhuni ddookharihella munllo, enama dda mwemmo khaddikwakhwanella ovelleella mukutho wawoosa.

¹⁷ Mitundu ddittheddene dda athu khe ello vamiitthoni va Apwiya, alliwa enaddeesa ddashisha ni ddoohikhalla ni mutteko.

¹⁸ Ethiyo Mulluku ttuumphwanaphwanihella ni aani apaalle ttuumullikanihella ni tini?

¹⁹ Olliye khe nifano noopangiwa ni muthu eeruso, noohuruwelliwa ni golide, noopangelliwa ogufu wa siliva ni eeruso mmodda.

²⁰ Oohoowa annatthoolla ovelleella muteekho woohunttellavo, annamwaashaasha eeruso wi ampangelle nifano noohimora.

²¹ Ethiyo khamwaadduwella? Ethiyo khamwiiwalle? Ethiyo khamwaalleelliwe vawaamba apaalle khamwiiwesese ovenyera mvo etthipellelliwe ellapo yavatthi?

²² Ellapo yavatthi yaphatusiwe ni olliye, oyo anakhalla va mpandwaaye woomwene oddullu, anawoona athu a vatthimva wonanko middope, anaanddellella mirapo wonanko ekuwo, wonanko musasa wookhallamo.

²³ Olliye annaakitthiha mamwene amasiva, annatthattusa oolamulella ellapo oohikhalla ni mutteko.

²⁴ Alliwa tti wonanko mmiddo wawaalliwa wene, apaalle woomiddiwa wene wawaambella otthipella misisi. Apwiya yoopihellavo ephevo mmiddooyo onnumma, namangalle annawuvaviha wonanko mallulla.”

²⁵ Aweella anallota wi, “Ethiyo ttuukiphwanaphwanihella ni aani apaalle ttuukillikanihella ni tini?

²⁶ Tukhullellani miitthwaanyu muwehe muddullu! Ethiyo ttaani aphatusalle etheneeri munooneenyunndda? Olliye sika anaddihoollella wonanko mulloko wakhoto, erive etheneeri annayiithana nnddina niwa. Vawi ekophollo ni masivaaye tti dduullupalli, kheyiivo naari emodda enaramavo.”

²⁷ We Yakobo, we Israele, onallotellati wi, “Apwiya khenadduwella ddoohoosa ddaka, khenapwatha dda miyaano?”

²⁸ Ethiyo khawaadduwella? Ethiyo khawiiwalle? Apwiya sika Mulluku oohimalla, oophatusa a ellapo yavatthi ettheene, khenatopa apaalle ofooka, khaavo aniiwesesa ezeru ddiwa.

²⁹ Ennaallipiha ootopa, ennawoonjerera masiva oofooka.

³⁰ Naari esombwe ennavelleveddeya ni ofooka, naari eesombwe ennakwakwatuwa ni wiikuha.

³¹ Koma ayo enaaroromella Apwiya, eneerewaakhella masiva anaanweene, eneerovava wonanko mpungu. Eneerekothamaka koma oohitopa, eneerekeweeta koma oohivelleveddeya.