Yesaya 4 - Mawu a Mulluku

¹ Enthawi yeeyo atthiyana atthanu ni eelli eneeromwaakanella mullopwana mmodda ni ollota wi, “Hi niniichiheke ni wiiwariha weekhiihu, weyaano weeremoona onaakhullella wi neeriweke awariyo wi nihiye owulliwa muru.”

Yerusalemu aneeromakiwattho

² Enthawi yeeyo enthambi ya Apwiya enaakhalle yaphaama wunchichi ni yooreera. Nave echipaso ya ellapo ya Israele eneerewaakotiha ni waariiha attheene oohalla.

³ Vano oohalla o Ziyoni, ootthoolliwa ni Mulluku wi ekhalle ni okumi o Yerusalemu, eneeroromolliwa oopatuleya.

⁴ Vaavo Apwiya enaakhalle yaahapihalle athu a o Ziyoni ni ovenyihavo ddoonanara ddiwa nave enaakhalle ehuwalle nikhame nno nahelliwe mu Yerusalemu. Eneere ddenndda ni munepa waweeruza ni waweelliha ni munllo.

⁵ Sika Apwiya eneerohuruwella mwaango muttheene wa Ziyoni ni athwiiwa ni murapo otthaana ni mwiisi owaaka munllo woowala mahiiyu.

⁶ Ntitimiho niwa ninaakhalle muuthuuchi woothawellamo oviha wa otthaana nave ninaakhalle nipuro noomuthawellamo namondwe ni murimu.