Yesaya 39 - Mawu a Mulluku

Amithenga oovenyera o Babiloni

¹ Enthawi yeeyo Merodaki Baladani mwaana a Baladani mwene a o Babiloni, ahaarumiha amithenga awinnyera makalata ni emphaso wi yavelleelle wa Hezekiya vawi ahiiwa wi aamavoriiwa nave aachira.

² Hezekiya aawaakhella athwaayo nave aawooniha enyumba yoosungellamo ddeko ddaye monga siliva, golide, makhura awunkhella oowallamella mutengo, makhura aphaama, ezida ddittheddene ddakhoto ni ddittheddene addisungeeye. Khamwaahanlle ello munyumbanimmo ni mu omwenaaye muttheene eyo ahiwoonihalleeye.

³ Vano namallotella Yesaya aaya wa mwene Hezekiya amukoha wi, “Ethiyo athwaalle yuulleelleni ddawiidde nave yavenyenre wuuwi?” Hezekiya ahaakhulla wi, “Yavenyenre o ellapo yawoorekama, o Babiloni.”

⁴ Yesaya aakohattho wi, “Ethiyo mu enyumba mwanyummo yoonilleemo tini?” Hezekiya ahaakhulla wi, “Ahoona ddittheddene dda mu enyumba mwaka. Kheyiivo naari emodda eyo kihiwoonihalleemi mu enyumba ddaka ddoosungellamo eyuuma.”

⁵ Vaavo Yesaya aamulleella Hezekiya wi, “Apwiya Amasiva Mattheene enallota wi,

⁶ ‘Enthawi eneerophiya mvo ddittheddene dda mu enyumba mwanyu ni ddittheddene nnddo makhollwaanyu yadditthukumanihalliiwa ophiyera ollello eneerowaakhani oyaana o Babiloni. Khavikhallattho ello naari emodda.

⁷ Ddimodda mwa edduullu ddanyu ddineneerophariwa nave ddineerotthattusiwa allupa mutteko oohulliwa* wi yarumeyelleke o enyumba yoomwene o Babiloni.’ ”

⁸ Sika Hezekiya aamulleella Yesaya wi, “Mawu a Apwiya ollotilleewaalla tti aphaama.” Voollotani ddenndda aallota m'murimani mwaye wi, “Vineerokhalla murendelle ni omaalleya mallapo mattheene a okumaaka.”