Yesaya 38 - Mawu a Mulluku

Ovoriiwa ni ochira wa mwene Hezekiya

¹ Enthawi yeeyo Hezekiya aavoriiwa nave aari vakhuviru okhwa. Namallotella Yesaya mwaana a Amozi aaya wi amoone nave aamulleella wi Apwiya enallota wi, “Opotokose ddeko ddawo ddittheddene phaama vawi onimakhwa, khochira.”

² Vano Hezekiya aarukunuwella osirini nave aavekella wa Apwiya wi,

³ “Nyu Apwiya, upuwellani wi kaanuurumeyellani moororomelleya ni mwawiivelleella nave kaaneera ddawuuddivellani.” Eerille ddiiddo ahaamba winlla moovoreyiwa murima.

⁴ Vano mawu a Apwiya yaawa wa Yesaya wi,

⁵ “Hokollowa, wamulleelle Hezekiya wi, ‘Mi Apwiya Mulluku a nikhollo nawo Davide kohiiwa ovekella wawo nave kooddoona miitthori ddawo. Sika kineerowaanjerera miyakha khumi ni mitthanu mu okumaawo.

⁶ Kineerowaakihera weyaano ni muzinda yoolla wa mwene a o Asiriya nave muzindoolla kineerekowuuteteza.’ ”

⁷ Vano Yesaya aamulleella Hezekiya wi, “Apwiya eneerowoonihellani echizindikiro osimikizella wi eneerosunga lonjezo niwa.

⁸ Alliwa enallota, ‘Kineerewuuhokollosella mutulli ni masitepe khumi muuthuuchi oyo nndduwa nineerihiiwa va makwelelo a Ahazi.’ ” Nave muuthuuchooyo waahokollweella mutulli ni masitepe khumi.

Nchipo noothokoza na Hezekiya

⁹ Nna sika nchipo noothokoza alembille Hezekiya valle avoriiwalleeye ni ochira.

¹⁰ Kaanaganiza wi kiri musombwe mukitthikitthi, kineerotthaamella o ellapo ya ookhwa, kineeromallihella wenko miyakha ddaka ddoohalla.

¹¹ Kaanaganiza wi va ellapo ya ookumeella ngiwa kiwoonattho Apwiya, ngiwa kaahellattho miittho athu a vatthimva.

¹² Okumaaka wohaakhiwa ni ovenyihiwavo, wonanko musasa wookumulliwa, wonanko ekuwo yoovillikiwa, wonanko ekuwo yoophaddiwa ni matchini, ovenyera mahiiyu ophiyera otthaana mwaanakikokholla.

¹³ Mahiiyu mattheene ophiyera ohinase kaaninlla ni ovoreya, Mwaanapwesa m'makhuvani mwaka mutthemwene, wonanko oneerella mukango, ovenyera mahiiyu ophiyera ohinase mwaanakikokholla.

¹⁴ Kaaninlla wonanko neenkhaare oopaneya, kaaniipullella wonanko ekhunda yookhupanya. Miitthwaaka yaatopa ni oweha oddullu. Nyu Apwiya, kinnahoosiwa, waawoni mukaakihe.

¹⁵ Ethiyo vano kinaallote tini? Apwiya aallota ni miyaano, nave alliwa sika yeerille ddenndda. Va okumaaka muttheene kaawerohoowa, ekaamba ya ovoreya wa murimaaka.

¹⁶ Nyu Apwiya, ekaamba ya nyu athu ennakhalla ni okumi, ekaamba ya yeella munepaaka onnakhallattho ni okumi, mwaakichiriha nave mwaakihokollosella okumi.

¹⁷ Ngoonani, kahoona ovoreya wi kikhalle phaama, moovullusa okumaaka o mahame, mohaatathillella machimwaaka mattheene otulli wanyu.

¹⁸ A o ellapo ya ookhwa khewora wuuthokozani, ookhwa khewora wuutitimihani, ookitthella mu mahame khewora wuuroromellani.

¹⁹ Ookumi, ookumive ennuutitimihani, wonanko kineerelleemimmu. Attiitthi ennaalleella aniiwa dda ororomelleya wanyu.

²⁰ Apwiya sika yakivullusalle, nineerewaatitimiha ni magitala mu enyumbiiwa okumaahu muttheene.

²¹ Sika Yesaya aallota wi, “Athu emukuse namukuyu emmare va yawiipa nave mwene Hezekiya aneerochira.”

²² Vano Hezekiya aakoha wi, “Ethiyo echizindikirweene ttiivi yoosimikizella wi kineeroyattho o enyumba ya Apwiya?”