Yesaya 37 - Mawu a Mulluku

Hezekiya anakoha malangizo wa Yesaya

¹ Hezekiya iiwalleeye ddenndda, ahaahulla ddoowara ddaye mwathakaraka nave aawara echiguduli avollowa mu enyumba ya Apwiya.

² Nave aamuruma Eliyakimu muullupalli oowehera enyumba yoomwene, Shebina namalembella ni muullupalli a allupa mukutho, attheene ewarille eziguduli wi eye wa namallotella Yesaya, mwaana a Amozi.

³ Alliwaayo yaamulleella Yesaya mawu a Hezekiya awi, “Ollello tti nllapo na ddoohoosa na ollaka ni noowulliwa muru. Niri wonanko mutthiyana eerukullu oyo ari vakhuviru omuyara mwaana koma khanna masiva ooyarella.

⁴ Mwene a o Asiriya endunaaye wi emuvevulle Mulluku Ookumi. Apaalle Apwiya Mullukwaanyu ahiiwa ovevullanngu nave eneerewaallaka athu yaavevullallaayo. Sika mwaavekellelle athu oohalla ayo eri ni okumi.”

⁵ Yesaya iiwalleeye mawu a mwene Hezekiya,

⁶ aallota wi, “Khaweni mwamulleelle pwiinyu mawu a Apwiya awi, ‘Ohinatathilla murima ekaamba ya mawu oovevulla a oorumeyella a mwene a o Asiriya.

⁷ Kineerohiya m'murimani mwa mwene maganizo mamodda awi iiwa ephevove aneerowatiheriwa ohokollweella o ellapwaaye nave mi kineeromwiiphiha owaniwa wenko.’ ”

Aasiriya enoopopiha waneepiilli

⁸ Enduneelle yiiwalliiwa wi mwene a o Asiriya aavenyawo o Lakishi nave anawana ekhoto ni muzinda wa Libina yaaya wenko.

⁹ Vano mwene a o Asiriya iiwalleeye wi mwene Tirihaka a o Kushi animawa wi awanena ekhoto, ahaarumihattho amithenga wa Hezekiya ni mawu awi,

¹⁰ “Mullukwaawo onamuroromelleewe ahuulleke vawuulonjezani wi Yerusalemu khamorella m'mattani mwa mi mwene a o Asiriya.

¹¹ Wohiiwa nnddo mamwene a o Asiriya yeerenlliiwa ellapo ddimodda ddittheddene wi yaadditthollosa. Ethiyo vano we ttuuvulluwa?

¹² Makhollwaaka yahoononga mizinda dda Gozani, Harani ni Rezefe. Nave yaawiipha athu a o Edeni ayo yakhalla o Telasara. Ethiyo milluku dda athu a mitundu ddimoddannddo ddahaavullusa?

¹³ Apaalle mamwene a m'mizindani dda Hamati, Aripadi, Sefaravaimu, Hena ni Iva eri wuuwi?”

¹⁴ Hezekiya aamwaakhella kalata ovenyera wa amithengaalle nave aamweerenga. Vaavo aaya o enyumba ya Apwiya amuhiya kalatooyo mwemmo vamiitthoni va Apwiya

¹⁵ nave aavekella wi,

¹⁶ “Nyu Apwiya Amasiva Mattheene, Mulluku a Israele, munakhalla vampandwaanyu woomwene va akerubi,* nyookhave tti Mulluku oolamulella moomwene mattheene a ellapo yavatthi. Mwaaphatusa ellapo yooddullu ni ellapo yavatthi.

¹⁷ Sika nyu Apwiya, apellani maaru mwiiwe. Nyu Apwiya khunuullani miittho wi moone. Mwiiwe mawu mattheene ayo Senakeribu allotilleeye awuuvevullani nyu Mulluku Ookumi.

¹⁸ Nyu Apwiya, ddawoona mamwene a o Asiriya yahoononga mitundu dda athu ddittheddene, etthattusa ellapo ddiwannddo echipululu.

¹⁹ Yahoosa milluku ddiwa nnddo ddihiri millukulluku koma mafano amiteekho ni amalluku oopangiwa ni athu sika ekaambiiwa yaddoonongilliiwa.

²⁰ Sika nyu Apwiya Mullukwaahu, munivulluse wa muthu yoolla wi mitundu ddittheddene dda va ellapo yavatthi ddidduwelle wi nyuwaano nyookha tti Apwiya.”

Apwiya enaakhulla ovekella wa Hezekiya

²¹ Vano Yesaya mwaana a Amozi aarumiha othenga wa Hezekiya wawi, Apwiya Mulluku a Israele enallota wi, “Ekaamba yawi waavekella wa miyaano dda Senakeribu mwene a o Asiriya,

²² kinallota dda olliye wi, ‘We Senakeribu, Ziyoni annuuvevulla ni wuuttheya, Yerusalemu annapukusa muru otulli wawo moohinyulla.

²³ Ethiyo we okhanlle omuvevullaka ni omullotella epewe? Ethiyo ttaani omukhuwenlleewe ni omuweha mwawiitukhulla? Khe mmodda koma Aweelloolle a Israele!

²⁴ Wahaaruma amithengaawo wi ekinyaambuse voollollotani wi, Ni magaretaaka awaata kaawella miyaango ddoorekama, kaaphiya vaddullu va miyaango dda Lebanoni. Kaakakatha miteekho ddiwa ddamukunguza ddoorekamesesa, navettho miteekho ddiwa dda paini ddooreera wunchichi, kaavollowattho muwariwari mwiwa, muutthakoni mwiwa moophipesesa,

²⁵ kaakata ehime o ellapo ddeelleto ni owiryamo maaddi ni manyallwaaka kaanyingalla ni wummiha mihinje dda o Iguputo.’ ”

²⁶ “Koma mi Apwiya kinallota wi, ‘Ethiyo khoniiwekevo wi ddenndda kaaddisimikiza khalleve? Kaaddisimikiza mallapo akhallekhalle nave kineeroddeera ddenndda. Mi kahaakhullella wi waakumulla mizinda ddamipanda ni odditthattusa ntepe.

²⁷ Athu ayo yakhalla wenko kheyaarina masiva yaatathilla murima nave yaapallalleya muru. Yaari wonanko mmiddo m'matani, manasi makitthi apaalle manasi oomella vaddullu va enyumba ayo enaavuwa ehinannuwe.

²⁸ Koma kinnadduwella nko onakhalleewe, erive ello oneereewe ni okishella murima wawo.

²⁹ Ekaamba yawi waakishella murima, wiitukhulla wawo wahiiweya wa miyaano, kineeromedda ephunaawo ni embeza, kineerohiya mukoko muwano mwawo, kineerewuuhokollosella mutulli vooweetihani ettilla waweelleewe.’ ”

Echizindikiro wa Hezekiya

³⁰ Vano Yesaya aamulleella mwene Hezekiya wi, “Echizindikiro ya nnddo ddineereye tti yawi muyakha yoolla munaamuche tirigu animorella muyakha woosiisello aneeromella mwawi ddiiddo. Muyakha woothwarellella muneeromullima ni omuhata tirigu, muneerewaalla miteekho ddampesa ni ocha ezipaso ddene.

³¹ Athu a Yuda ayo enaahalle ddineeroweetella phaama wonanko ddoomella dditthipenlle misisi ddiwa vatthi ni wimma ezipaso.

³² O Yerusalemu oneerovenyera athu oohalla, o mwaango wa Ziyoni oneerovenyera mulloko wa athu oovulluwa, ddawoona, Apwiya Amasiva Mattheene eneereweera ddenndda moohiyavo murima.

³³ Apwiya Amasiva Mattheene enallota dda mwene a o Asiriya wi, Khavollowa mu muzinda yoolla khavokhamo mpaamba naari mmodda akhotwaaye eezishango khephiya vakhuviru ni muzindoolla, khewaapheella ni mukhuttu weekhoto.

³⁴ Aneerohokollweella mutulli, aneereweeta mu ettilla anaaweelleeyemo, khavollowa mu muzinda yoolla, mi Apwiya koollota.

³⁵ Kineerowaakihera ni owuteteza muzindoolla ekaamba ya ntitimiho naka navettho echipanganwaaka ni Davide oorumeyellaaka.”

³⁶ Mungelo a Apwiya aaya o misasa ddakhoto dda Aasiriya awiiphawo akhoto 185,000. Ohinase athu yaawoona akhoto attheenaayo ekhwille, eri millumillu!

³⁷ Vano Senakeribu mwene a o Asiriya aatimulla ahokollweella owaniwa aya akhalla o Nineve.

³⁸ Nllapo nimodda avekellaka mu enyumba ya Nisiroki, mullukwaaye, anaaye eelli, Adrameleki ni Sharezere yaamwiipha ni masupadiiwa ethawella o ellapo ya Ararati. Nave Esarahadoni, mwanaye mmodda aavollowa omwene munipuroni mwaye.