Yesaya 36 - Mawu a Mulluku

Aasiriya enamoopopiha Israele

¹ Mu muyakha wa 14 wa omwene wa Hezekiya, mwene a o Yuda, Senakeribu, mwene a o Asiriya, aahella ekhoto mizinda ddittheddene ddamipanda dda o Yuda nave aaddaakha.

² Vatulli viwa mwene a o Asiriya aarumiha endunaaye yuullupalli ovenyera o Lakishi wi eye ni mulloko muullupalli wa akhoto wa Hezekiya o Yerusalemu. Sika enduneeyo yahiimella vakhuviru ni engalande yamaaddi yoovenyera o nthiya na omwaako, vamusewuni muullupalli wooya o emata ya Muthu Eeruso Yaweelliha Ekuwo.

³ Athu araru yaakhuma m'muzindani yakumanana. Athwaalla yaari muullupalli oowehera enyumba yoomwene, nnddina naye Eliyakimu mwaana a Hilikiya, Shebina namalembella ni Yowa mwaana a Asafu ookavihera.

⁴ Enduna ya o Asiriyeelle yahaalleella wi mwamulleelle Hezekiya wi mwene muullupalli a Asiriya anakoha wi, “Ethiyo onaroromella tini?

⁵ Ethiyo onaganiza wi mawaawo ttuuphwanaphwana ni eruso ni masiva avakhotoni? Ethiyo vano onamuroromella aani voowukilani?

⁶ Apaalle onatiyerella wi Iguputo ttuuwuukavihera? Koma nngu tti wonanko ororomella epango yookothowa yawi ttuumuhoma muthu m'mattani vooyeesani mutooto. Mmu sika mwene a o Iguputo anamweerelleeye arive muthu aneesa omuroromella.”

⁷ Enduna ya o Asiriya yaavirellella ollota wi, “Apaalle okilleelle wi munamuroromella Apwiya Mullukwaanyu. Ethiyo khe Apwiya alle mapurwiiwa oollapellamo mafano ni makuwiiwa, Hezekiya addoonongilleeye ni waalleella athu a o Yuda ni a o Yerusalemu wi ellapelleke va nikuwa nimoddave o Yerusalemu?

⁸ Hanko vano nibechellane ni pwiyaaka mwene a o Asiriya. Kineerowinnya akavalo ookwakhwanella 2,000 wawora waaphwanya athu oowellavo.

⁹ Ethiyo ttuumupambana mwawiidde naari mmoddave a enduna dding'onong'ono dda pwiyaaka vawi onaaroromella Aiguputo wi yuuvahe magareta ni athu oowella va akavalo?

¹⁰ Navettho ethiyo khonadduwella wi Apwiya sika ekiwiihalle wuno wi kiyihelle ekhoto ni oyoononga ellapweella? Apwiya sika yakilleellille wi killipanena ni oyoononga ellapweella.”

¹¹ Vano Eliyakimu, Shebina ni Yowa yahaakhulla enduneeyo wi, “Ninuuvekani wi munilleelle mawaalla mu Earamu vawi hiyaano ninniiwa. Koma muhinillotiheke mu Eyuda vawi athu attheene eri vampandanimva enniiwa ellotellweella.”

¹² Koma olliye aallota wi, “Ethiyo munaganiza wi mwenaaka akirumalle wi killote mawu yaalla wa nyuwaanove ni wa mwenaanyu? Khe ddiiddo! Mi kinallotattho ni athu ookhalla vampandimva ayo enaache mashiiwa ni owirya minyeddo ddiwa wonanko munaaweerelle nyu.”

¹³ Vano enduneelle yahiimella ellota mookhuwa mu Eyuda wi, “Ngiiwani mawu a mwene muullupalli, mwene a o Asiriya.

¹⁴ Mwene anallota wi, ‘Muhaakhullelle wi Hezekiya uullekeni vawi khuuvullusani.

¹⁵ Muhaakhullelle wi Hezekiya awoottottheni vawuulleellani wi muroromelle wi Apwiya eneerewuuvullusani nave wi mi mwene a o Asiriya khawaakha muzindaanyu.

¹⁶ Muhimwiiwellelle Hezekiya. Mwene a o Asiriya anuulamulani wi mukhumemo m'muzindanimmo nave mumugonjelle. Mweera ddiiddo arive muthu anaacheke mpesaaye ni namukuyaaye ni owirya maaddi a mu ehimaaye.

¹⁷ Muneereke ddiiddo ophiyera mwene uukusalleni oya o ellapo yoophwanaphwana ni yawinyweella, ellapo ya tirigu ni vinyo, ya buledi ni emata ddampesa.

¹⁸ Sika nyu, muchenjere Hezekiya ahuukarangeyiheni vawuulleellani wi Apwiya eneerewuuvullusani. Mwa milluku dda athu a mitundu ddimodda, ethiyo ookhallavo naari mmodda oyo avullusallevo ellapwaaye wa mwene a o Asiriya?

¹⁹ Ethiyo milluku dda Hamati ni Aripadi ddiri wuuwi? Apaalle milluku dda Sefaravaimu ddiri wuuwi? Ethiyo millukunnddo ddaavullusa muzinda wa Samariya wa pwiyaaka?

²⁰ Ethiyo tti milluku ddiivi mwa milluku ddittheddene dda ellaponndda nnddo ddavullusalle ellapo ddiwa wa mwenaahu wi nyu mweereke Apwiya ttuuvullusa Yerusalemu wa olliye?’ ”

²¹ Koma athu yaarimi ellapo tuu, oohaakhullavo ello ekaamba yawi mwene Hezekiya ahaalamula wi, “Muhimwaakhulle.”

²² Vano Eliyakimu mwaana a Hilikiya muullupalli oowehera enyumba yoomwene, Shebina namalembella ni Yowa mwaana a Asafu ookavihera, yahaahulla ddoowara ddiwa mweethakaraka nave yaaya wa mwene Hezekiya yamulleella ddallotille enduna ya a o Asiriya.