Yesaya 34 - Mawu a Mulluku

Apwiya eneerewaallaka adaniiwa

¹ Nyu athu a mitundu ddittheddene, waani vakhuviru wi mwiiwe! Nyu athu, ellapo ni ddittheddene ddookhalla mwemmo, iwani!

² Vawi Apwiya yohaashella murima athu a mitundu ddittheddene nave yooddinanariwella milloko ddittheddene ddakhoto sika yoosimikiza wi yoonongiwe ni waavelleella wi yiiphiwe.

³ Mitembo dda awiiphiwa enaadditathillelle otte nave ddineerewunta ni wunkha navettho miyaango ddineerofiira ni nikhame.

⁴ Nndduwa, mweeri ni etheneeri ddineeronyenyeya nave oddullu waavenyihiwavo wonanko mwinlli woovillikiwa. Etheneeri ddineerovakareya wonanko makukhu a mpesa apaalle namukuyu.

⁵ Apwiya aakhoza nsupada niwa oddullu nave ninimakittha wi naallake Aedomu, athu ayo esimikizalliiwa wi ewoononge.

⁶ Nsupada na Apwiya noovona nikhame nave noomarelliwa makhura. Nikhame nene tti wonanko na anamwani a enkhosa ni a epuri nave makhureene tti wonanko a apellepetu a anankhoro a enkhosa. Vawi Apwiya aakhalla ni mukutho mu muzinda wa Bozira, sika wi wiiphiwa wa athu anchichi mu o Edomu.

⁷ Enari owaaka anankhoro a eng'ombe dding'onong'ono ni dduullupalli ddineerewiiphiwa. Ellapwiiwa eneerovona nikhame nave ethayiiwa eneeromarelliwa makhura.

⁸ Ella sika enthawi eyo Apwiya eneeriiwa yaahokolloselle adani a Ziyoni ni waateteza athwiiwa.

⁹ Maaddi a mu mihinje dda o Edomu eneerotthattuwa niphuka nave ethaya eneerotthattuwa sulufure. Ellapo ettheene eneerotthattuwa onyoma wamunllo.

¹⁰ Munllooyo oneerokhara otthaana ni mahiiyu nave mwiisi oneerothuwa wa enthawi yoohimalla. Ellapo eneerokhalla echipululu va mibado ni mibado nave khaavo naari mmodda aneetemottho.

¹¹ Mwiillaponimmo munaakhalle aneekhwaambe, anasiniku, akuukuru ni anakhuku. Apwiya eneeroyitthattusa ellapo yooguga ni yoohikhalla ni ello.

¹² Variyari va enduna khaviphwanyeya oovollowa omwene nave oohoollella attheene khekhalla ni mutteko.

¹³ Miiwa ddoohiyanahiyana ddineeromella mu enyumba ddaye ddakhoto ddooteteziwa ni m'mipandani mwaye. Nave ninaakhalle nipuro na akhatwe ni owaniwa wa nthiwatiwa.

¹⁴ Enama ddamuhakani ddineerokumana ni akhuddupa wenko nave mitthowa dineerekewiithanana. Wenko minepa ddoonanara dda mahiiyu ddineerophiya nave ddineerophwanya nipuro nawiithuuwellawo.

¹⁵ Akuukuru eneeromakawo emphuru ddiwa, eneerorellawo mooche, aneerewaattotthollawo asaana ni waawehera phaama. Nave ephangwi ddineerotthukumana wenko piillipiilli.

¹⁶ Ashaashani ni weerenga mu nibukhu na Apwiya. Mwa ddoophatusiwanndda kheyiivo naari emodda enaarame mukhwiiwa. Vawi Apwiya aalamula wi ddikhallelle mwemmo nave Munepiiwa woodditthukumaniha vamodda.

¹⁷ Apwiya aakawa ellapweeyo wa erive enama echigawiiwa. Ellapweeyo enaakhalle yayiwa wa enthawi yoohimalla nave ddinaakhalleke mwemmo va mibado ddiwa ddittheddene.