Yesaya 33 - Mawu a Mulluku

Nivekello na nikavihero

¹ Otulli wa awoononga, we ohinoonongiweke! Otulli wa awoottottha, we ohinoottotthiweke ni arive muthu! We wahiya woononga oneerewoonongiwa nave wahiya woottottha oneerewoottotthiwa.

² Nyu Apwiya, neerelleni echifundo vawi nohuuroromellani. Munaakiheke ni nnatta nanyu namasiva nllapo ni nllapo nave munivulluseke va enthawi ya ddoohoosa.

³ Vookhumihani mawaanyu wonanko ettari mitundu dda athu ddinnathawa nave vootthupulluwani ddinnapallalleya.

⁴ Athu ennatthukumaniha ddawaakha ni oddilluphella wonanko aneerella nazombe.

⁵ Apwiya sika enaariihiwe vawi enakhalla vaddullu va ddittheddene. Nave eneeroddalliha muzinda wa Ziyoni ni echilungamo ni echiweruzo yaphaama.

⁶ Eneerewuuvahani murendelle wookeraattheya va enthawaanyu, ovullusa wuullupalli, odduwella wunchichi ni ezeru ddinchichi vawi owoova Apwiya sika onavaha eyuumayuuma.

⁷ Oollipa murima ennakhuwa omusewuni nave amithenga amurendelle eninlla mweethakaraka.

⁸ M'misewuni dduullupalli muri ellapo tuu vawi khaavo aneetamo. Ezipangano ddootathilliwa, amboni yoovevulliwa navettho khawiivo ovahana olemu.

⁹ Ellapo eniminlla nave ehanlle vang'ono omalla. Otthako wa o Lebanoni woonyaalla nave ntapo naphaama na Sharoni nootthattuwa echipululu nave miteekho dda o Bashani o Karimele ddoovakareya makukhu.

Apwiya enaachenjeza adaniiwa

¹⁰ Apwiya enallota wi, “Vano kineerovenya, kineerewooniha masivaaka nave kineerovahiwa olemu wunchichi.

¹¹ Koma nyu munnakusa erukullu dda yoonanara ni oyara mitteko ddoohikhalla ni mutteko. Ddoovenyera muwano mwanyu ddiri wonanko munllo oyo onaawoonongeni.

¹² Athu a mitundu ddimodda eneerotthollosiwa wonanko miiwa ddoophaddiwa ni woosiwa viikho.

¹³ Nyu attheene awoorekama, ngiiwani nnddo keerilleemi nave nyu attheene avakhuviru, dduwellani masivaaka.”

¹⁴ Athu oochimwa a mu Ziyoni enimoova nave oohipwatha dda Mulluku enimatthukumella. Ennallota wi, “Ethiyo ttaani mwa hi anaawore ovillella ni munllo wawoonongoolla? Ethiyo ttaani mwa hi anaawore okhalla mu munllo woohimalla?”

¹⁵ Anaawore weera ddennddo tti yooyove aneera ddoolungama ni ollota ddawoona, oyo ananariwa ni eyuuma yoophwanya mwawoottottha, oyo anattattha mattaaye wi ahaakhelle ddamukaphwani, oyo anatiyella maarwaaye wi ahiiwe mawu awiiwanana ddoowiipha amodda navettho oyo anaminyalla wi ahoone ddoonanara.

¹⁶ Muthu awi ddiidda aneerokhalla va nipuro nooteteziwa nave woothawella waye onaakhalle o mipanda ddamalluku. Aneerekovahiwa yoocha nave kharamiwaka maaddi.

Ntitimiho na ddamuhoollo

¹⁷ Enthawi yeeyo miitthwaanyu eneeromoona mwene awooneya mooreera nave muneerewoona ellapo yaphaama yooramballalla.

¹⁸ M'murimani mwanyu muneerekoganiza ddawoopiha ddakhalle wi, “Ari wuuwi namalembella? Ari wuuwi ookhomiha musonkho? Ari wuuwi aweerengella mattattha?”

¹⁹ Khamuwa muwoonattho athu eepewaalle, a ellotello yoohidduwanyeya, yeelleto ni yoohiiweya.

²⁰ Ngamooneni Ziyoni, muzinda wa ehakallallo ddahu dda mallapello! Miitthwaanyu eneeromoona Yerusalemu, muzinda wamurendelle, musasa woohitikheya. Ekhomo ddaye khadditulleya nave mikwe ddaye khaddiphaddeya.

²¹ Wenko Apwiya mwa ntitimiho niwa enaakhalle wonanko nipuro na mihinje ni asimihinje. Nave ekallawa ddakhoto khaddiwa ddiphiyawo naari ekallawa dduullupalli khaddiwa ddiphiyawo.

²² Vawi Apwiya sika ooneeruzaahu, Apwiya sika oonilamulellaahu, Apwiya sika mwenaahu nave alliwa sika enaanivulluse.

²³ Mikwe dda ekallawa dda adanaahu ddoottaphuwa wawi khaddiwora ollipiha mulongotiiwa nave embenderiiwa khettaphuruwa. Sika ddawaakha ddahu ddineerewaata wunchichi wawi vookawanani naari oorakalla eneerototavo ello.

²⁴ Khaavo mwiillaponimmo anaallote wi, “Kinimavoriiwa.” Athu attheene a wenko eneerokhululukelliwa machimwiiwa.