Yesaya 32 - Mawu a Mulluku

Omwene wa mwene oolungama

¹ Enthawi emodda muhoollo oneerokhalla mwene mmodda oolamulella moolungama navettho enduna ddineerolamulella moolungama.

² Arive muthu mwa alliwa anaakhalle wonanko voothawellavo ephevo apaalle nipuro noomwiipitthellavo namondwe. Enaakhalle wonanko mihinje ddaweeta mu ellapo yawumma apaalle muuthuuchi wa nlluku nuullupalli mu echipululu.

³ Miitthwiiwa eneerekewoona nave maarwiiwa eneerewiiwa.

⁴ Athu amphuma eneerekeweera ddeko mooganiza phaama nave ookukuma eneerekollota moohihollosa ni mwawiiweya.

⁵ Ookarangeya khavahiwa olemu nave oolleka khariiheya.

⁶ Ookarangeya anallota ddookarangeya nave anaganiza ddoonanara. Ddaweera ni ddoollota ddaye tti ddawaanyaambusa Apwiya. Olliye khanaachiha eettalla nave khanaavaha maaddi anthona.

⁷ Oolleka ettilla ddaye tti ddoonanara vawi anaganizella ddeekuku wi aweerelle echiwembu oohoowa voowoottherani naari ehilakwille.

⁸ Koma ooreera murima anaganizella ddaphaama nave anallipihella weera ddaphaama.

Echiweruzo ni ohokolloselliwa olemu

⁹ Nyu atthiyana oohikhupanya erive ello, apellani maaru o nnddo kinalloteemi.

¹⁰ Nyu atthiyana a vamurendelleni, vavira muyakha mmodda, muneerotthukumella ekaamba yawi miteekho ddampesa ddineerolepheleya nave ezipaso kheddooneya.

¹¹ Nyu oohikhupanya erive ello, tthukumellani! Nyu atthiyana a vamurendelleni, halleellani! Rullani ddoowara ddanyu nave makellani eziguduli.

¹² Dduukutheni vakhakaddani mwathakaraka ekaamba yawi emata dda ethaya yaphaama ddampesa ddohoonongeya.

¹³ Miiwa ddoohiyanahiyana ddinamella va ellapo ya athwaaka. Ddawoona, inllellani enyumba ddittheddene nnddo yakhalliiwamo moottaphuwa navettho muzinda oyo waari ni ehakallallo.

¹⁴ Enyumba yoomwene eneerohiyiwa nave muzinda muttheene khokhalla ni athu. Mipanda ddiwa ni nttattha nene ddineerotthattuwa makhungu ophiyera muhoollo. Ninaakhalle nipuro na embizi ni voochihella enkhosa ophiyera muhoollo.

¹⁵ Koma Apwiya eneeronirumihella munepiiwa ovenyera oddullu nave echipululu eneerotthattuwa ellapo ya ethaya yaphaama, emata ddittheddene ddineerewimma ddeko ddinchichi.

¹⁶ Vano orive weko oneerokhalla echilungamo ovenyera o echipululu ophiya o emata dda ethaya yaphaama.

¹⁷ Ekaamba ya yeella, mu ellapo ettheene muneerokhalla murendelle ni omaalleya ophiyera wa enthawi yoohimalla.

¹⁸ Athu a mi Apwiya enaakhalleke mu mizi ddamurendelle, mu enyumba ddoororomelleya ni mwawiithuuwellamo ni oohikhupanyihiha erive ello.

¹⁹ Komave otthako oneerewoonongeya ni marallalla nave muzinda oneerokumulliwa.

²⁰ Oodalisiwa tti nyu vawi muneerekomidda mukhwipi mwa mihinje nave abulu ni eng'ombe ddanyu ddineerekocha virive veko.