Yesaya 30 - Mawu a Mulluku

Mwiiwanano woohikhalla ni mutteko wa Yuda ni Iguputo

¹ Apwiya enallota wi, “Otulli wa anamwani ookiwukila mi vaweerani ddawiipangella ohiri dda mi. Enakeraatthiha echipangano yayiwayayiwa oohithwara opaalla waka nave ennavirellella ochimwa.

² Enaya o Iguputo wooveka nikavihero ehikikohille miyaano. Enathawella wa Farao wi aateteze nave enaasha nipuro noovulluwellavo o Iguputo.

³ Koma muneerowulliwa muru ni echitetezo ya Farao navettho ni nipuro noovulluwellavo na o Iguputo.

⁴ Naari enduna ddaye ddiphiyalle khalle o Zowani nave amithengaaye o Hanesi,

⁵ athu attheene a o Yuda eneerowulliwa muru ekaamba ya athu oohikhalla ni muttekwaayo nave oohikhalla ni orive mphuro koma oowulliha muru.”

⁶ Nngu sika ollotella wa dda enama dda mu echipululu yoomwera wi, “Amithenga eneeta mu ellapo yawoopiha mmo muri mikango, evilli ni enowa ddanttipwi ddoovava. Ennaareya abulwiiwa emphaso ddoowallamella mutengo nave eyuumiiwa ennayiwelliha va ekamira* ddiwa oyaana wa mutundu wa athu oyo khowa waakavihera.

⁷ Nikavihero na Iguputo tti etthiruve nave khaninna mutteko. Sika ellapweeyo kooyivaha nnddina nawi, ‘Rahabu, ookhulliwa miino.’ ”

Athu oohiiwellella

⁸ Mulluku aakilleella wi, “Lemba ddenndda va sileti alliwa yoonaka nave waddilembettho mu nibukhu wi muhoollo ddikhalle omboni woohimalla.

⁹ Alla sika athu awaawukila Apwiya, anamwani awoottha ni ookhoota wiiwellella malangizwiiwa.

¹⁰ Ennaalleella oollohella wi, ‘Muhoonettho.’ Ennaalleellattho anamallotella wi, ‘Muhinillotellettho ddawoona koma munilleelle ddooniddivella, munillotelleke ddam'muruni mwanyu.

¹¹ Khaweni nko, oohinitiyella ettilla. Khaninapaalla wiiwattho dda Aweella a Israele.’ ”

¹² Sika ekaambiiwa Aweella a Israele anallota wi, “Mwaavevulla mawaaka, mwaaroromella waanyingallella amodda nave mwaahameella va woottha.

¹³ Sika nichimo nanyunna ninaakhalle wonanko mutthari va esiri yoorekama wawooniha wi eneerokumuwa moorurumusa.

¹⁴ Ddinaakhalle wonanko ophweeya wa epalli ya mitthari khalleve, oohikhallavo naari nivalli nimodda noovallella munllo apaalle noorikella maaddi veehimeni.”

¹⁵ Sika Apwiya Mulluku, Aweella a Israele yaallota wi, “Orukunuwa murima ni ohokollowa ddinaakhalle ovullusa wanyu. Okhurumuwa murima ni ororomelleya sika ddinaakhalle masivaanyu.” Koma mwaakhoota weera ddennddo.

¹⁶ Koma mwaallota wi, “Nineerothamaka va akavalo.” Ddawoona, vano thawanittho! Mwaallotattho wi, “Nineerowella va akavalo oothamakesesa.” Ddawoona, oowiikarihanaayo enaakhallettho oothamakesesa wuukhwaranyani nyuwaano.

¹⁷ Athu 1,000 mwa nyuwaano eneerothawa voomoonani mudani mmodda. Akhoto atthanuve eneerokwakhwanella owiikarihani attheenenyu. Oohalla mwa nyuwaano eneerokhalla wonanko muteekho wa embendera ya va mwanamwaango wonanko echizindikiro ya va mwaango.

¹⁸ Komave Apwiya ennatiyerella oweerellani echifundo alliwa tti ookhonzeka wi yuureerelleni murima ekaamba yawi Apwiya tti Mulluku eechilungamo. Oodalisiwa tti attheene enaaroromella Apwiya.

Apwiya eneerewaadalisa athwiiwa

¹⁹ Ddawoona, nyu athu a o Ziyoni, ookhalla o Yerusalemu, khamwinllattho. Apwiya eneeroweerellani echifundo vawiiwa winlla wanyu nave va enthawi yeeyo aneerowaakhullani.

²⁰ Naari Apwiya yuuvahilleni yoocha ya ddoohoosa ni maaddi a ddookatamiha koma muhuddihaawo khaddiipitthihattho nave oneeromoona ni miitthwaawo.

²¹ Mwaahapuwellaka onnattanatta apaalle onyotthoni, muneerewiiwa otulli wanyu mawu owuutthoonyihellani ettilla awi, “Ettilla tti yeella, muthwareke yeella.”

²² Vaavo muneerokusa mafanwaanyu, mamodda oohuruwelliwa ni siliva nave amodda ni golide nave muneerewaatathilla wonanko ekattha voollotani wi, “Ddivenyevo ddenndda.”

²³ Mwaamiddaka mmiddwaanyu, Apwiya eneerewuurupihellani murimu wi omelle nave muneerohata ddinchichi. Nllapo nenno eziweto ddanyu ddineerophwanya munyepu munchichi.

²⁴ Eng'ombe ni abulu awuukaviherani ollima ddinaache yoocha ya mwiinyu yoorukunuselliwa phaama ni fosholo ni foloko.

²⁵ Va nllapo nno mattattha akhoto a adanaanyu enoonongiwiiwa nave athwiiwa yiiphiwa va orive mwaango muullupalli ni mwanamwaango woorekama vineereweeta mihinje dda maaddi.

²⁶ Mweeri oneerowala wonanko nndduwa nave nndduwa nineerowalesesa wonanko olendo otthanu ni opiilli owala wa nllapo nimodda. Ddenndda ddineereye mvo Apwiya enaamakiiwa ni ovolliha makhwata ayo mwaneeniiwa yaambihalliiwa vawaallakani athwiiwa.

Apwiya eneerewaallaka Asiriya

²⁷ Ngoonani, nnddina na Apwiya ninnooneya ovenyera woorekama. Enooniha osha murima muwari mwa munllo ni mwiisi woottikana. Enallota moowalli nave mawiiwa enaviha wonanko munllo wawoononga.

²⁸ Mpweyiiwa tti wonanko muhinje woosefukella wa maaddi ookomella mukohi. Ennaveetha mitundu ddimodda dda athu ni etthello yawoononga. Ennahiya muwano mukoko wonanko akavalo wi waahollose.

²⁹ Koma muneerohakallalla ni wiipa wonanko muneerelleenyu mahiiyu va ehakallallo yoopatuleya. Muneerohakallalla wonanko athu eneeta yiipaka nipallapata o mwaango wa Apwiya, nlluku na Israele.

³⁰ Apwiya eneerovuwiha mawiiwa awoopiha nave athu eneerewoona nnatta niwa nikitthaka va alliwa ni owalli wawoopiha ni mallumi amunllo wawoononga variyari va ettari, namondwe ni marallalla.

³¹ Aasiriya eneerewoova wunchichi ni mawu a Apwiya vawaarushullani ni ekopwiiwa.

³² Apwiya vawaallakani adani, athwiiwa enaakhalle yiinaka ekoma ni magitala. Apwiya aneena eneerowana ekhoto ni Aasiriya.

³³ Nipuro nawoosella ddeko tti nookhoziwa khalle nno yamukhozelliiwa mwene a o Asiriya. Nipuronno tti noowallamella ni nuullupalli nooddalla ni ekhuni. Sika mpweya wa Apwiya wookhalla wonanko muhinje wa sulufure, oneerokhariha munllooyo.