Yesaya 3 - Mawu a Mulluku

Nampallalla mu Yerusalemu

¹ Vano Apwiya, Mulluku Amasiva Mattheene, ehanlle vakhuviru omwaakha Yerusalemu ni Yuda nirive nikavihero nno athu enaroromelliiwa. Eneerewaakha yoocha ettheene ni maaddi mattheene,

² athu amasiva ni akhoto, oweeruza ni anamallotella, awoombesa ni attekweene,

³ oohoollella akhoto ni athu oovahiwa olemu, alangizi ni amasenga navettho eeruso ya ezitumwa.

⁴ Apwiya eneerewaatthoollella asombwe wi ekhalle mamweniiwa nave anamwani sika enaawaalamulelleke.

⁵ Athu eneerekohoosana, arive muthu omuhoosa mukhwaaye. Asombwe eneerekoweerella epewe attekweene nave athu shisha eneerekewaavevulla oophwanella ovahiwa olemu.

⁶ Enthawi yeeyo muthu aneerekompharella mmbale a mpa mwa attiitthinnya ni omulleella wi, “We wookhalla ni mukanjo sika okhalle oohoollellaahu nave ntepenna nikhalle m'mattani mwawo.”

⁷ Koma vaavo mbalooyo aneerewaakhulla wi, “Iyaayi, miyaano nginapaalla! Ngiwora ochiriha vawi naari mpa mwaka nginna yoocha apaalle yoowara. Muhinakitthoolla wi kikhalle oohoollella a athu!”

⁸ Ddawoona, Yerusalemu animamwareya nave Yuda animakumulliwa ddoollota ni ddaweera dda athu a mwemmo tti ddawaavevulla Apwiya, khenapwatha dda ntitimiho na Apwiya.

⁹ Ennavaanyihiwa ni mooneyello a ekhove ddiwa. Ennachimwa vaweella wonanko athu a o Sodomu, kheniipittha. Otulli wa athu yaalla vawi yooddiithanella weekhiiwa ddoohoosa.

¹⁰ Oodalisiwa tti athu oolungama vawi ddeko ddineeroweetella phaama nave eneerohakallalla ni mitteko dda mattiiwa.

¹¹ Koma otulli wa athu oonanara! Ddeko ddineerewaakatamiha vawi nnddo ekhanlliiwa eweerellaka akhwiiwa ddineerewaahokollweella.

¹² Athwaakanyu, asombwe sika enuuhoosani nave atthiyana sika enuulamulellani. Ha, athwaakanyu, enuuhollosani tti oohoollellaanyu nave enuuvirikanihellani ettilla ddanyu.

Apwiya enaweeruza athwiiwa

¹³ Vano Apwiya aakhonzeka waamba mullatu, aakhozeka khalle wi eweeruze athwiiwa.

¹⁴ Apwiya enawiipa mullatu attekweene ni oohoollella a athwiiwa. Enaahumullulla wi, “Nyu sika moonongille emata yampesa nave enyumba ddanyu ddooddalla ni ddeko ddawaakha ovenyera wa oohoowa.

¹⁵ Ethiyo munaapaneella tini athwaaka? Ethiyo kaambiiwa tti tini munaachelleenyu matthu va muru athwaaka? Mi Apwiya Mulluku Amasiva Mattheene koollota.”

Ochenjeziwa wa atthiyana a o Ziyoni

¹⁶ Apwiya enallota wi, “Atthiyana a o Ziyoni tti awiitukhulla wunchichi, eneeta mathuri eri muddullu nave enaweha moorukunusa miittho. Eneeta mwawiinyarulla nngu yinllihaka ebangili ddiwa dda m'metoni.

¹⁷ Ekaamba ya yeella, mi Apwiya kineerochema mipala miru dda athu a o Ziyoni, meehiiwa mattheene.”

¹⁸ Nllapo nenno Apwiya eneerowaakha ddooreerihella m'metoni, m'muruni ni munikohini,

¹⁹ ogufu, makhoza, ekuwo yookhuneellana ekhove,

²⁰ enduwira, ebangili, malaamba, mabotolo a makhura awunkhella, ezitumwa,

²¹ emphete, echipini,

²² madiresi a vamachellelloni, echipewa, mikanjo, ezikwama,

²³ magalasi awoonellavo ekhove, ddoowara ddabafuta, enduwira ddimodda navettho ekuwo dda m'mathurini.

²⁴ Munipuroni mwa wunkhella onaakhalle wunkha, munipuroni mwa laamba enaamakelle mukwe, munipuroni mwa meehi oopesa phaama enaakhalle ni mipala, munipuroni mwa madiresi oowallamella mutengo enaaware mathumba nave munipuroni mookotella oreera wiwa eneerowulliwa muru.

²⁵ We Yerusalemu, aallopwana eneerewiiphiwa ni nsupada nave amasivaawo enaakhwelle okhotoni.

²⁶ Sika va millako ddawo vineerokhalla winlla nave oneerotthollosiwa ni okeraatthihiwa muthaani mattave.