Yesaya 29 - Mawu a Mulluku

Ollakiwa wa Yerusalemu

¹ We Ariyele, Ariyele, muzinda oyo Davide atthipellilleeyewo misasa ddakhoto, wookhalla ni otulli. Viviralle muyakha mmodda apaalle miilli, mallapo mattheene a ehakallallo eviralle

² kineerohella ekhoto muzinda wa Ariyele. Sika onaakhalle winlla ni okhupanya nave muzindooyo onaatthattuwe eng'anjo ya nikuwa na mukutho.

³ Kineeromaka misasa mwawaapheella muzindooyo wonanko Davide. Mulluku aneerotthipella misasa ddoollipana ni muzindooyo. Nave kineerowaapheella ni mattattha ni mipanda ddakhoto ni omaka.

⁴ Nave oneerollota ovenyera vatthi onaakuhelliweewevo sika mawaawo eniiweye ovenyera munthupini. Mawaawo enaavenyere vatthi wonanko mutthowa nave eniiweye moonong'ona ovenyera munthupini.

⁵ We Yerusalemu, mulloko wa adanaawo oneeromwareya wonanko nthupi nave echigumula ya akhoto eekuku eneeropallalleya wonanko mallulla oovava. Nave moorurumusa ni moohiteyerella

⁶ Apwiya Amasiva Mattheene eneerewuuvullusa ni ogugudeya, echivomerezi ni onyakulla wuullupalli. Eneeromurumihattho namangalle, namondwe ni mallumi amunllo wawoononga.

⁷ Attheene awaapheella ni oollipana ni muzindooyo vamodda ni mpandiiwa wamasiva eneeromalla wonanko enimalloha.

⁸ Mulloko wa mitundu ddimodda ddittheddene dda athu woohella ekhoto mwaango wa Ziyoni onaakhalle wonanko muthu eettalla analloha achaka koma voovenyani annavolliwave ettalla. Apaallettho wonanko muthu anthona analloha awiryaka koma voovenyani ommilloni onakhallave wummalle.

Athu enavevulla ochenjeza

⁹ Virellellani okhalla ookarangeya! Ddeeriheni nyookha oohoona nave mukhalle oohoona. Mulezele koma muhimuwinrye vinyo nave muhahareye koma muhiwinrye yoowirya yoowalli!

¹⁰ Apwiya yohuukonihani ekhove ddookhwana, yohuukhuneellani miittho, ayo tti anamallotella nave yohuukhuneellani omuruni, ayo tti oollohella.

¹¹ Nave ddeko ddittheddene ddawooneya m'masomphenya ddohiipittheya wonanko mawu a mu nibukhu noomarelliwa. Nibukhu nenno erimi emwinnye muthu mmodda oodduwella weerenga wi aneerenge, olliye aneerollota wi, “Ngiwora, kaambiiwa noomarelliwa.”

¹² Nibukhu nenno erimi emwinnye muthu mmodda oohidduwella weerenga wi eerenge, aneerollota wi, “Ngidduwelle weerenga.”

¹³ Apwiya aallota wi, “Athwaalla enakititimiha miyaano ni vayanonive koma mirima ddiwa ddoorekamellana ni miyaano. Khaddinna mutteko wi ekillapelleke kaambiiwa enahuddiha malamulo a athu wonanko tti malamulwaaka.

¹⁴ Sika kineerovirellella oweerella ddoottikhiniha athu yaayo. Ezeru dda athwiiwa eezeru ddineeromalla nave ochenjera wa athwiiwa oochenjera oneerewiipittha.”

Etiyerello ya muhoollo

¹⁵ Otulli wa athu ayo eniipitthiha maganizwiiwa vamiitthoni va Apwiya, ayo eneera mitteko ddiwa mwiipiphini ni ollota wi, “Ttaani ananoona ni odduwella nineereehu?”

¹⁶ Moorukunusa ddeko ddittheddene. Ethiyo yoopaalleyesesa tti tini, awoopa apaalle olloko? Ethiyo ello yapotokosiwa ttuumulleella ooyipotokosa wi, “Khewaakipotokosille mi”? Ethiyo apaalle ttuumulleella wi, “Khonadduwella oneereewe”?

¹⁷ Vavira enthawi yooyeva, otthako wa Lebanoni oneerotthattuwa emata ya ethaya yaphaama nave emata ya ethaya yaphaama eneerotthattuwa otthako.

¹⁸ Nllapo nenno oohiiwa eneerewiiwa mawu a munibukhuni nave oohoona ayo yakhalla mwiipiphini eneerewoona.

¹⁹ Athu awiiyeviha eneerokhallattho ni ehakallallo mwa Apwiya nave oohoowa eneerohakallalla ekaamba ya Aweella a Israele.

²⁰ Koma eekuku eneerotthollosiwa, awaattheya akhwiiwa eneerothiima nave ookuseya murima ni ddoonanara eneerewoonongiwa.

²¹ Mulluku aneerewaallaka awoottha, oovirikaniha echiweruzo yawoona ni oovelleella omboni wawoottha wi oohilakwa yeeruziwe moohilungama.

²² Sika vano Apwiya ayo yamooponlle Abrahamu enallota dda athu a Yakobo wi, “Alliwa khevevulliwattho nave ekhove ddiwa kheddimorattho ni owulliwa muru.

²³ Yawoona aniiwa variyari viwa, mutteko wa mattaaka, eneerotitimiha nnddina naka naweella. Eneerodduwella wi Aweella a Yakobo tti aweella.

²⁴ Athu ookarangeya eneerophwanya ezeru nave ookhupanya eneerewaakhullella malangizo.”