Yesaya 27 - Mawu a Mulluku

¹ Nllapo nenno Apwiya enaapharihe mutteko nsupada niwa nawiisha, nuullupalli ni namasiva, omullaka Leviyatani,* enowa yoothawa, yoonyimphireya nave eneerewiiphattho enama yawoopiha ya mu enyanja.

² Nllapo nenno Apwiya eneerollota dda ematiiwa yampesa yaphaama wi,

³ “Mi Apwiya sika mulonda a emateeyo, enthawi ddittheddene kinnayihellella. Kinnayiwehera otthaana ni mahiiyu wi ahikhallevo ooyoononga.

⁴ Ngiyinanariwella emataaka yampeseeyo. Miiwa ddoohiyanahiyana ddooneyilleke kaaweerollipanana ni oddoosa munllo moohihiyerera.

⁵ Koma adani a athwaaka yaapaallaka wi kaateteze enaphwanella wiiwanana ni mi dda murendelle. Ddawoona, tti woophwanella wiiwanana ni miyaano dda murendelle.”

⁶ Mallapo enawaayo Yakobo aneerotthipella misisi, Israele aneerophuwa ni ottaphulla malluwa. Ellapo ettheene yavatthi eneeroddalla ni ezipaso ddaye.

⁷ Ethiyo Apwiya yahaallaka Aisraele wonanko yaallakelliiwa adaniiwa? Ethiyo Aisraele yahiiphiwa wonanko yiiphelliwe adaniiwa?

⁸ Apwiya yahaallaka voowiikarihani ni waarumiha wuukaporoni. Yahaaviddeellella ni ephevwiiwa yawoopiha yoovenyera wookhuma nndduwa.

⁹ Sika machimo a Israele eneerokhululukelliwa nave eneerewooniha olapa wawoona vookumullani malluku mattheene a makuwa eelleto ni waatthattusa nthupi nave vano khavikhallattho makuwa eelleto a lubani* ni mafano a Asherimu.

¹⁰ Muzinda wamipanda wootthattuwa ntepe, nipuro noohiyiwa ni nootiwalliwa wonanko echipululu. Wenko eziweto ddinnachawo enthambi dda miteekho ni wiithuuwawo.

¹¹ Enthambi dda miteekho ddumma ennaddikotholla nave atthiyana ennadditota wi ddikhalle ekhuni. Athu yaalla tti oohiiwesesa. Sika oyo aaphatusalle khaamoriwella ethakaraka nave oyo aapangille khaweerella echifundo.

¹² Nyu athu a o Israele, Apwiya eneerewaatthukumaniha athwiiwa mmoddammodda ovenyera o Yufurate ophiya o muhinje wa o Iguputo.

¹³ Nllapo nenno nipallapata nuullupalli nineerewinlla owiithana Aisraele attheene ayo yaari wuukaporoni o Asiriya ni o Iguputo. Alliwa eneeroowa nave eneerewaallapella Apwiya va mwaangwiiwa waweella o Yerusalemu.