Yesaya 26 - Mawu a Mulluku

Apwiya eneerewaapambaniha athwiiwa

¹ Nllapo nenno athu a mu ellapo ya Yuda eneerewiipa nchipo nawi, “Nookhalla ni muzinda wampanda, Apwiya eneeroteteza mpandiiwa.

² Hullani millako dda muzinda, mutundu woolungama ovollowe mutundu wa athu oororomelleya.

³ Nyu Apwiya, munnavaha murendelle wawoona wa ookeraattheya murima ni awuuroromellani.

⁴ Aroromelleni Apwiya wa enthawi yoohimalla ekaamba yawi Apwiya Mulluku tti nlluku noohimalla.

⁵ Ahaakitthiha ookhalla mu nipuro noowella, Ahoononga muzinda wa masiva, Aawukuha ni owuvokhella vatthi, vanthupini.

⁶ Onnanyingallelliwa vatthi ni manyallo a oohoosiwa ni etotopwa dda oohoowa.”

⁷ Nyu Apwiya, munnallima musewu wa oolungama, munnookolla ettilla ya ooreera murima.

⁸ Ninnathwara ettilla ya malamulwaanyu, nyu Apwiya, ninnuutiyerellani. Ninnapaallesesa wi muupuwelliweke ni wi nnddina nanyu nititimihiweke.

⁹ Murimaaka onnawuupuwellani mahiiyu mattheene, munepaaka muwarimmu onnawaashaashani. Nyu mwaaweeruzaka ellapo yavatthi, attheene ookhallamo ennahuddera echilungamo.

¹⁰ Oonanara mwamweerella ddaphaama khanahudderave echilungamo. Aneera ddoonanara mu ellapo yeechilungamweella, annalephela woonesesa ntitimiho na Apwiya.

¹¹ Nyu Apwiya, mootukhullella muddullu nnatta nanyu wi mwaallake koma alliwa khenoona nnattanno. Athwaayo ewulliwe muru vawoonani mmo munaakondelleenyu athwaanyu. Munllo mwaakharihelleenyu adanaanyu waashellellihe alliwa.

¹² Nyu Apwiya, munnanivaha murendelle, ddittheddene nineereehu ddinavenyera wa nyuwaano.

¹³ Apwiya Mullukwaahu naari nalamulelliwaka ni amodda, khaninapwatha nnddina nimodda koma naanyuve.

¹⁴ Vano alliwa aakhwa, khevenyattho vawi mohaallaka ni waatthollosa khaavottho anawuupuwella

¹⁵ Koma nyu Apwiya, mohoonjerera mutundwaahu, ddawoona, moowunnuwiha. Mohoonjerera ellapwaahu, mohaakhellavo ntitimiho mohunnuwiha malire mattheene.

¹⁶ Nyu Apwiya, va enthawi ya ddoohoosa, athwaanyu yaawaashaashani. Enthawi eyo mwaallakeenyu, yaavekella wa nyuwaano.

¹⁷ Nyu Apwiya, mooninlliha wunchichi wonanko mutthiyana vooyarani.

¹⁸ Hi nahiiwa ovoreya, naahoowa wonanko mutthiyana vooyarani koma khenaaphunre ello. Khenaawiillena ovullusa va ellapo yavatthi, khenaawaagonjihalle athwiiwa.

¹⁹ Athu ookhwa eneerokhallattho ni okumi, miilli ddiwa ddineerovenya. Nyu attheene muri mu mahame, venyani ni wiipa nchipo moohakallalla. Wonanko nikame ninoollowihelliiwa vatthi ohihimulla ddoomella, emoddamoddave yeeyo Apwiya eneerewaavenyiha ookhwa.

Ohokolloselliwa wa Israele

²⁰ Athwaaka, vollowani mpa mwanyu nave mwiiwallelle. Mwiipitthe vang'ono ophiyera osha murima wa Apwiya omanlle.

²¹ Apwiya enimawa ovenyera nko enakhalliiwa wi yaallake athu a va ellapo yavatthi ekaamba ya machimwiiwa. Nikhame nawiithelliwa va ellapo yavatthi neneerewooneya vaweella nave mitembo dda athu awiiphiwa kheddiipitthiheya.