Yesaya 25 - Mawu a Mulluku

Nchipo nowaathokoza Apwiya

¹ Nyu Apwiya, nyuwaano sika Mullukwaaka, kineerewuuvahani olemu ni otitimiha nnddina nanyu. Moheera ddeko ddoottikhiniha, mookeraatthiha moororomelleya mwasimikizalleenyu khalle.

² Muzindoolle moowutthattusa nipuro namalluku, muzinda wamipanda moowutthattusa ntepe. Enyumba ddamasiva dda adanaahu khe muzindattho, kheddimakiwattho.

³ Ekaamba ya yeella mitundu ddamasiva dda athu ddineerewuutitimihani, m'mizindani dda mitundu ddeekuku athu eneerowoovani.

⁴ Nyu tti voothawella va oohoowa, mpanda wa athu oorama va enthawi ya ddoohoosa. Muri wonanko vawiipitthellavo namondwe, wonanko muuthuuchi wawiithuuwellavo nndduwa. Eekuku eri wonanko namondwe awoopa vasirini,

⁵ wonanko nndduwa mu ellapo ya wumma. Koma munnahiiha onyakulla wa adani, munnahiiha machipo a eekuku wonanko murapo onahiihelliiwa oviha.

Apwiya enakeraatthiha machellello

⁶ Va mwaango wa Ziyoni Apwiya Amasiva Mattheene eneerokeraatthihella mitundu ddittheddene dda athu machellello a ddoocha ddooddiva ni a vinyo aphaama, machellello a enama yoonuna ni a vinyo ooddivesesa.

⁷ Va mwaango yoolla eneeromalliha ethakaraka nnddo ddahuruwenlle mitundu ddittheddene dda athu ni malloko mattheene.

⁸ Apwiya Mulluku eneeromirya okhwa ophiyera wa enthawi yoohimalla, eneerovutta miitthori m'mwiitthoni mwa arive muthu nave eneeromalliha owulliwa muru wa athwiiwa va ellapo yavatthi ettheene. Mi Apwiya koollota.

⁹ Nllapo nenno arive muthu aneerollota wi, “Olla sika Mullukwaahu! Naamuroromella wi aneeronivullusa vawi olliye tti Apwiya. Naamuroromella vano hankoni nihakallalle ni othapella ekaamba yawi oonivullusa.”

Apwiya eneeromullaka Mowabu

¹⁰ Apwiya eneeroteteza mwaangwiiwa ni nnatta niwa koma Amowabu eneeronyingallelliwa wonanko manyowa munllitini.

¹¹ Amowabu eneereweeseesa orukunusa mattiiwa wonanko muthu oosambira. Koma Apwiya eneeromalliha wiitukhulla wiwa navettho eruso ya mattiiwa.

¹² Eneerokumulla mipanda ddiwa ddoorekama, eneeroddikuha ni oddivokhella vatthi, vanthupini.