Yesaya 24 - Mawu a Mulluku

Apwiya eneerollaka ellapo yavatthi

¹ Ddawoona, Apwiya eneerewoononga ellapo yavatthi ni oyitthattusa echipululu nave eneeroyinyenyanyenya ni waamwara athu attheene.

² Arive muthu aneerewoona ddoophwanaphwana, monga athu shisha ni allupa mukutho, akaporo aallopwana ni apwiiwa aallopwana, akaporo aatthiyana ni apwiiwa aatthiyana, ookulla ni ookulliha, oopolleya ni oopolleyiha navettho ookongola ni ookongoliha.

³ Ellapo yavatthi eneerewoonongiwa, eneerotthollosiwa. Mi Apwiya koollota.

⁴ Ellapo eniminlla ni onyaalla. Ellapo ettheene yavatthi enimahoowa ni wumma nave athu oovuwa a va ellapo yavatthi aafooka.

⁵ Athu yooripiha ellapo yavatthi voohithwarani malamulo a Mulluku voovevullani mawaaye ni voohiiwellellani echipangano yoohimalla.

⁶ Sika Apwiya aatembelela ellapo yavatthi nave athu ennahoowa ekaamba ya machimwiiwa. Alliwa yoomallihiwa nave oohalla tti ooyeva.

⁷ Mipesa ddinimumma nave vinyo annarama. Arive muthu ahakallalla vano ookhalla ni ethakaraka.

⁸ Winlla wooddivesesa wa asikomiiwa ni onyakulla wa athu oohakallalla woomalla navettho zeze oohakallallihoolle ari ellapo tuu.

⁹ Athu kheniipattho voomuwiryani vinyo, voowiryani ddoowalli ddinnanyuunya muwano mwiwa.

¹⁰ Muzinda woovirikana, wohoonongeya nave erive enyumba yoowalliwa ni loko wawi khaavo anaawore ovollowamo.

¹¹ Athu enimakhuwa m'musewuni ekaamba ya orama wa vinyo. Ohakallalla wuttheewene woomalla khavirittho nave ohakallalla va ellapo yavatthi ettheene.

¹² Muzinda wootthattuwa ntepe nave millako ddiwa ddookumuwa.

¹³ Nndda sika ddineereyelle orive mutundu wa va ellapo yavatthi. Onaakhalle wonanko olivi awuurulla ni mpesa wawuurulla ohata wamalla.

¹⁴ Koma oohallaalle eneerokhuwa ni wiipa nchipo moohakallalla. Athu a woovollowa nndduwa eneerotitimiha wunnuwa wa Apwiya.

¹⁵ Sika nyu a wookhuma nndduwa atitimiheni Apwiya. Athu ookhalla mukhwipi mwa enyanja athokozeni Apwiya Mulluku a Israele.

¹⁶ Ovenyera o ellapo ddawoorekama ninniiwa machipo oomutitimiha, oomuthokoza Oolungama. Koma miyaano kooheruwa, kooheruwa! Otulli wookummellella! Awoottha ennootthave nave woottha wiwa onnoonjerereya.

¹⁷ Nyu athu a va ellapo yavatthi, ddawoopiha, nlliti ni musampha ddinimuutiyerellani.

¹⁸ Arive muthu oothawa onyakulla wa ddawoopihannddo aneeromorella mullitini nave ookhuma munllitinimmo aneeromakiwa m'musamphani. Oddullu oneerohulleya nave matthipello mattheene a ellapo yavatthi eneerotikheya.

¹⁹ Ellapo yavatthi eneeronyenyeya, eneerotthaalla wunchichi ni otikheya mwamasiva.

²⁰ Ellapo yavatthi eneerohahareya wonanko oolezela, eneerotikheya wonanko musasa enthawi ya ephevo yawoopiha. Ellapo yavatthi yoollemelliwa ni ddoonanara ddiwa, eneeromora nave khevenyattho.

²¹ Nllapo nenno Apwiya eneerewaallaka amasiva ooddullu ni mamwene a va ellapo yavatthi.

²² Mulluku aneerewaatthukumaniha mamwene mattheene vamodda wonanko a mundende munllitini. Eneerewaawallella mundende nave vavira enthawi yoorekama eneerollakiwa.

²³ Mweeri oneeronyaalla nave nndduwa nineerowulliwa muru vawi Apwiya Amasiva Mattheene enaakhalle mwene. Eneerolamulella va mwaango wa Ziyoni ni o Yerusalemu nave eneerewooniha ntitimiho niwa vamiitthoni va attekweeniiwa.