Yesaya 23 - Mawu a Mulluku

Ollotella wa dda Tiro

¹ Nngu sika ollotella wa dda Tiro. Nyu aweetiha esitima dda o Tarishishi, inllani mweethakaraka! Muzinda wa Tiro wohoonongeya, khawurittho enyumba apaalle doko. Ddenndda yaddiiwalle voovenyerani o Kitimu.

² Nyu ookhalla mukhwipi mwa enyanja, nyuwaano amalonda a o Sidoni, mweere ellapo tuu! Amithengaanyu yaallapuwa enyanja ni weeta va maaddi manchichi.

³ Mphurwaanyu waari tirigu a o Shihore, ddoohata dda o Nailo nave mwaaneera malonda ni athu a mitundu ddittheddene.

⁴ We Sidoni, muzinda wampanda o enyanja, wulliwa muru ekaamba ya enyanja yoollota wi, “Nginiiweke ovoreya wa oyara nave nginaallelleke anamwani aallopwana apaalle aatthiyana.”

⁵ Nyu ookhalla mukhwipi mwa enyanja, Aiguputo eneerorurumuwa ni woova vawiiwani ddimweereyelle Tiro.

⁶ Thawellani o Tarishishi, inllani mweethakaraka.

⁷ Ethiyo olla tti muzinda wa Tiro woovuwa, wakhallekhalle? Ethiyo olla tti muzinda olle waarumiha athu ollapuwa enyanja yakhalla o ellapo ddimodda?

⁸ Ethiyo ttaani asimikizalle ddenndda wi ddimmorelle Tiro muzinda woomwene oyo amalondiiwa tti enduna ni oovuwa wunchichi va ellapo yavatthi ettheene?

⁹ Apwiya Amasiva Mattheene sika yasimikizalle ddenndda wi emallihe okota waye ni waakitthiha athu attheene oovahiwa olemu a vatthimva.

¹⁰ Nyu athu a o Tarishishi, pallalleyani mwiillaponi mwanyu wonanko muhinje wa Nailo vawi khaavo awuutetezani.

¹¹ Apwiya aattaphurusa nnatta niwa otthoonya enyanja nave yohaatikha moomwene. Yohaalamula a o Kanani wi ekumulle mipanda ddiwa.

¹² Nyu athu a mu muzinda wa Sidoni, nyu oonyingallelliwa, khamuhakallallattho, muneeropaniwa. Naari muthawenlle o Kitimu, wenkottho khamuphwanyawo vawiithuuwella.

¹³ Ngoonani ellapo ya Ababiloni, athwaalla kheyiivottho, yaatthollowa. Aasiriya sika emutthattusalle Tiro wi akhalle nipuro na enama ddawoopiha. Yaamaka mattatthiiwa akhoto, ekumulla mipanda ddiwa nave ewutthattusa ntepe.

¹⁴ Nyu aweetiha esitima a o Tarishishi, inllani mweethakaraka ekaamba yawi muzindaanyu wamipanda wookumulliwa.

¹⁵ Nllapo ninimawa nno Tiro anaatiwalliweeye wa miyakha 70 eyo tti wonanko enthawi ya okumi muttheene wa mwene mmodda. Ddamalla miyakha ddennddo, Tiro anaakhalle wonanko hule awiipiwa nchipo nawi,

¹⁶ “We hule ootiwalliwa, mukuse zezaawo, weeteete m'muzindani. Omwiipe mooddiviha wiipettho machipo wi athu ewuupuwellettho.”

¹⁷ Ddamalla miyakha 70 Apwiya eneereweeravo ello va Tiro. Muzindooyo oneerohokollweella o ganywiiwa akhalle nave eneeroraruwa ni moomwene a ellapo yavatthi ettheene.

¹⁸ Koma mphurweene ni mallivellweene ddinaavelleelliwe wa Apwiya. Kheddisungiwa apaalle ohiyiwa koma ddinaavelleelliwe wa oorumeyella a Apwiya wi ekulle ddoocha ddinchichi ni ddoowara ddooreera.