Yesaya 22 - Mawu a Mulluku

Ollotella wa dda Yerusalemu

¹ Nngu sika ollotella wa dda ntapo na Masomphenya. Ethiyo yeereyille tti tini wi attheene muwelle vaddullu va enyumba?

² We muzinda wooddalla ni wootokollolla! We muzinda wootokollolla ni woonyakulla. Athwaanyu kheyiiphiwe ni nsupada apaalle ni ekhoto.

³ Oohoollellaanyu attheene yaathawa vamodda nave yaaphariwa ehinavokhe naari muura mmodda. Attheenenyu mwaphwanyeyille mwaaphariwa naari mwaathawille khalle adani eri woorekama.

⁴ Sika vano muhinakiwehaka miyaano, kihiyeni kinlle moovoreyiwa murima. Muheese okikhurumusa murima va dda woonongeya wa athwaaka.

⁵ Nna tti nllapo na ddoohoosa, yoogonjihiwa navettho noovirikana mu ntapo na Masomphenya. Apwiya Mulluku Amasiva Mattheene sika eneerenlle ddenndda. Mipanda ddaakumuwa nave athu yinllella omiyaangoni.

⁶ Akhoto a o Elamu yaawa ewenlle va akavalo, m'mattani mwaari miira ni mipaamba nave akhoto a o Kiri yaari ookhozeka ni ezishango ddiwa.

⁷ Matapwaanyu a ethaya yaphaama yaaddalla ni magareta nave akhoto oowella va akavalo yahiimella owiitthoni wa millako dda muzinda.

⁸ Nave ddittheddene ddoomuteteza Yuda ddahaakhiwa. Nllapo nenno miitthwaanyu yaari va ezida ddakhoto nnddo ddaari mu Enyumba ya Otthako.

⁹ Mwaaphwanya mapuro mamodda musirini dda muzinda wa Yerusalemu eri ookumuwa nave mwaasunga maaddi mu nthiya namuhito.

¹⁰ Mwaheerenga enyumba ddittheddene mu muzinda wa Yerusalemu nave mwaaddikumulla ddimodda wi muphwanye malluku oopotokosella esiri.

¹¹ Variyari va esiri piilli mwaamakavo ehime yoosungellamo maaddi oovenyera o nthiya nakhalle. Koma khamwaaganizalle dda Mulluku oyo eerihalle ddenndda naari vang'ono. Khamwaapwathille dda olliye oyo addikeraatthihalle khalle.

¹² Enthawi yeeyo Apwiya Mulluku Amasiva Mattheene aawiithahanani wi mwinlle ni omoriha minthori, mucheme ni owara eziguduli.

¹³ Koma mwaahakallalla ni weelliwa murima, mwahiipha eng'ombe ni enkhosa, muddittakhunana nave mumuwirya vinyo. Mwaallota wi, “Hankoni niche nave niwirye vawi osiisello nineerokhwa.”

¹⁴ Apwiya Amasiva Mattheene yaakuupullullella vookinong'onellani owaruni wi, “Ddawoona, nguukhululukellani nichimo nenna ophiyera okhwa wanyu.” Mi Apwiya Mulluku Amasiva Mattheene koollota.

Ochenjeziwa wa Shebina

¹⁵ Apwiya Mulluku Amasiva Mattheene yaakilleella wi kiye wa Shebina, kapitawo oowehera enyumba yoomwene, kakohe wi,

¹⁶ “Ethiyo eneerawo tini wuno? Ollipalle murima mwawiidde va wiikatella mahame wuno wiikatella mahame vamwaangoni ni wiisemella moovumellamo m'mallukuni?

¹⁷ We amasiva, Apwiya eneerewuuphara moollipa ni wuuvokha mweekophollo.

¹⁸ Eneerewuutthattusa wonanko mpira nave eneerewuuvokha mu ellapo yuullupalli. We oowulliha muru enyumba ya apwiyaawo, nko onaakhwelleewewo nave magaretaawo onaakotelleewe enaahalle wenkottho.

¹⁹ Eneerewuuvenyihavo va okapitawaawo nave eneerewuukitthiha Voomallihani odindwaawo.”

²⁰ Apwiya yaamulleella Shebina wi, “Nllapo nenno kineeromwiithana oorumeyellaaka Eliyakimu mwaana a Hilikiya.

²¹ Kineeromuwariha mukanjwaawo ni laambaawo ni omvaha olamulellwaawo. Aneerewaalamulella athu attheene mu Yerusalemu ni a mu Yuda wonanko attiitthi.

²² Kineerowinnya makiiyi a olamulello nibanja na Davide. Olliye ahulla khaavo anaawore owalla. Nave awalla khaavo anaawore ohulla.

²³ Kineeromullipiha wonanko ekhomo nave anaakhalle wonanko mpanda woomwene wooriheya o nibanja na attiitthinnya.

²⁴ “Koma abalaaye ni edduullu ddaye enaakhalle katundu oollemella va olliye wonanko ezida ddookichini ddittheddene ddoomakellelliwa va ekhomo.

²⁵ Apwiya Amasiva Mattheene enallota wi nllapo nenno ekhomo yoollipa eneerohateya, eneerotulleya nave eneerewiikuha vatthi. Mi Apwiya koollota.”