Yesaya 21 - Mawu a Mulluku

Ollotella dda omora wa Babiloni

¹ Nngu sika ollotella wa dda echipululu ya mukhwipi mwa enyanja. Otulli oneerophiya ovenyera o ellapo yawoopiha wonanko mmo namangalle anoopelleeye ovenyera o echipululu.

² Kohoona masomphenya awoopiha awi awoottha ennootthave nave awaakha ennaakhave. Akhoto a o Elamu, ambani ekhoto! Akhoto a o Mediya, apheellani muzinda! Mi Apwiya kineeromalliha ddookatamiha ddittheddene ddawiille ni Babiloni.

³ Ekaamba ya yeella, nnddo koonilleemi ni wiiwa m'masomphenya ddookoopiha ni okivoreya wonanko mutthiyana aayaraka.

⁴ Murimaaka onimathamaka, kinimatthukumella ni woova nave murendelle wamisikuwa kapaalleemi wootthattuwa yawoopiha.

⁵ Alliwa enapotokosa tebulo ni waanddellella mwinlli. Alliwa enimacha ni owirya. Moorurumusa eniiwa mawu awi, “Nyu akhoto, venyani nave hellani makhura ezishango ddanyu!”

⁶ Vawi Apwiya yaakilleella wi, “Khawe wamuhiyewo mulonda wi alloteke nnddo anooneeye.

⁷ Awoona athu eellieelli oowella va akavalo, va abulu ni va ekamira* mulondooyo akhalle miittho.”

⁸ Vano mulondooyo aakhuwella wi, “Apwiya, otthaana ottheene kinakhalla vanttatthani, mahiiyu mattheene kinakhalla vanipuroni naka owehera.

⁹ Kawoonille athu eellieelli oowella va akavalo. Mmodda athwaayo aallota wi, ‘Oomora, oomora Babiloni. Mafano mattheene a milluku ddaye yoovakareyella vatthi.’ ”

¹⁰ Sika abalaaka Aisraele, nyu awuuputhiwa ni ooveethiwa wonanko tirigu, vano kohuulleellani othenga oyo kiiwalleemi wa Apwiya Amasiva Mattheene, Mulluku a Israele.

Ollotella wa dda Edomu

¹¹ Nngu sika ollotella wa dda Edomu. Mmoddeene anakillotiha mookhuwa ovenyera o Edomu wi, “We mulonda, ethiyo mahiiyu onaamalle niini? We mulonda, ethiyo onaamalle niini mahiiywaalla?”

¹² Mulonda anallota wi, “Onimasa koma oneeroripattho. Wapaalla okohattho, ohokollowe okohe.”

Ollotella wa dda Arabiya

¹³ Nngu sika ollotella wa dda Arabiya. Nyu athu a o Dedani, aweeta vamullokoni ayo mahiiyu munakona mu otthako wa o Arabiya,

¹⁴ mwaavahe maaddi oovolliwa nthona. Nyu athu a o Tema, mwaavahe yoocha athu oothawa ekhoto.

¹⁵ Vawi enathawa masupada oohullullahullulla, miira ddookokakoka navettho ekhoto yawoopiha.

¹⁶ Vano Apwiya yaakilleella wi, “Vihanlle muyakha mmodda moollikana ni mmo aneerengella aganyu nave oriiheya ottheene wa athu a o Kedara oneeromallella.

¹⁷ Mwa athu attheene amasiva a o Kedara ookoka miira, oovulluwa enaakhalle aweerengeyave. Mi Apwiya Mulluku a Israele koollota.”