Yesaya 20 - Mawu a Mulluku

Echizindikiro ya namallotella eepwillimwinddi

¹ Muyakha mmodda akhoto muullupalli oorumiwa ni Sarigoni, mwene a o Asiriya, aawana ni waakha muzinda wa Ashidodi.

² Enthawi yeeyo Apwiya yaari ellotille khalle oweella mwa Yesaya mwaana a Amozi wi, “Khawe warulle echiguduli muyuununi mwawo ni esapato omanyalloni wawo.” Nave olliye aheera ddennddo, aneeta epwillimwinddive ni oohiwara esapato.

³ Sika muzinda wa Ashidodi waakhiwe, Apwiya yaallota wi, “Yesaya namallotellaaka ookhalla eetaka epwillimwinddive ni oohiwara esapato miyakha miraru ddivirallenndda. Ella sika echizindikiro ni ddoodduwelliha wa Iguputo ni Kushi.

⁴ Mmu sika aneerelle mwene a o Asiriya vawi aneerewaaphara okaporo Aiguputo ni Akushi, asombwe ni awuulluvalla, aneeroweetiha epwillimwinddi ni oohiwara esapato, marwiiwa eri vaweella. Nndda ddineerewaawulliha muru Aiguputo.

⁵ Vano attheene yaroromella ellapo ya Kushi navettho yiitukhulla ekaamba ya ellapo ya Iguputo, eneeromoriwa ethakaraka ni owulliwa muru.

⁶ Nllapo nenno athu ookhalla mukhwipi mwa enyanja eneerollota wi, ‘Ngoonani nnddo ddiweereyelle alle naatiyereehu ni othawellawo wi enikavihere ni onivullusa wa mwene a o Asiriya. Vano ninaavulluwe mwawiidde?’ ”