Yesaya 2 - Mawu a Mulluku

Murendelle woohimalla

¹ Nndda sika ddeko Yesaya mwaana a Amozi oonilleeye m'masomphenya oollota dda Yuda ni Yerusalemu.

² Va mallapo a muhoollo mwaango wa enyumba ya Apwiya oneerotthattusiwa woorekamesesa okhwaranya miyaango ddittheddene. Mitundu ddittheddene dda athu ddineerothamakella omwaangoninko.

³ Athu a mitundu ddinchichi eneeroowa ellotaka wi, “Hankoni niwelle o mwaango wa Apwiya, o enyumba ya Mulluku a Yakobo! Eneeronihuddiha ettilla ddiwa nave nineeteke mwemmo. Vawi o Ziyoni sika onaavenyereke malangizo, o Yerusalemu sika onaakhume mawu a Apwiya.

⁴ Apwiya eneereweeruza variyari va mitundu dda athu, eneeromalliha ohiiwanana variyari va malloko manchichi. Athu eneerohana masupadiiwa wi ekhalle ehipa ni mavakiiwa wi ekhalle ezikwakwa. Mitundu dda athu khaddiwa ddiimesellanattho masupada, khaddiwa ddihudderattho ddoowana ekhoto.

⁵ “Sika vano nyu edduullu dda Yakobo, hankoni neete mu owala wa Apwiya.”

Echiweruzo ekaamba ya ohiiwellella

⁶ Nyu Apwiya, mohaakhoota athwaanyu, edduullu dda Yakobo. Ellapo yooddalla ni athu amasenga a wookhuma nndduwa monga Afilisti nave athu ennathwara makhallello eelleto.

⁷ Ellapo ya athwaanyu yooddalla ni siliva ni golide nave eyuumiiwa tti yoohimalla. Ellapwiiwa yooddallattho ni akavalo nave magaretiiwa akhoto tti ooheerengeya.

⁸ Ellapwiiwa tti yooddalla ni mafano vawi alliwa enallapella ddeko ddoopangiwa ni woopiwa ni mattiiwa.

⁹ Ekaamba ya yeella athu eneeroyevihiwa ni okitthihiwa koma muhaakhululukelle.

¹⁰ Vollowani m'makhunguni, ipitthani m'mallitini wi muthawe owalli wa Apwiya ni masiva a omweniiwa.

¹¹ Wiitukhulla wa athu oneeromalla nave okota wa athu oneerewoonongiwa. Apwiyave sika enaariihiwe nllapo nenno.

¹² Apwiya Amasiva Mattheene aakeraatthiha khalle nllapo nno enaakitthihiiwa attheene ookota, awiitukhulla ni awiinyarulla.

¹³ Eneerewuuha mikunguza ddoorekama ddittheddene dda o Lebanoni nave eneerewuuhattho miteekho dda muthundu ddittheddene dda o Bashani.

¹⁴ Eneerokumulla miyaango ddoorekama ddittheddene ni asimiyaango oorekama attheene.

¹⁵ Eneerokumulla nirive nttattha ni mipanda ddittheddene ddoollipa.

¹⁶ Eneeroddipwiniha esitima ddittheddene dda o Tarishishi ni mabwato mattheene ooreera.

¹⁷ Okota wa athu oneeromalla wiitukhulla wiwa otthewene oneerewoonongiwa. Apwiyave sika enaariihiwe nllapo nenno.

¹⁸ Nave mafano mattheene eneerotthollosiwa.

¹⁹ Athu eneerothawella m'makhunguni ni m'mallitini voothawani owalli wa Apwiya ni masiva a omweniiwa mvo Apwiyaayo enaaphiyiiwa wi yoopopihe ellapo yavatthi.

²⁰ Nllapo nenno athu eneeromutathillella nahuwo ni mullema mafanwiiwa a siliva ni a golide ayo yiipotokoselliiwa wi yaallapelleke.

²¹ Eneerothawella m'makhunguni ni m'mittharini voothawani owalli wa Apwiya ni masiva a omweniiwa mvo Apwiyaayo enaaphiyiiwa wi yoopopihe ellapo yavatthi.

²² Muhimuroromellekettho muthu vawi okumaaye khonallekella omalla. Ethiyo muthu ari ni tini?