Yesaya 19 - Mawu a Mulluku

Ollakiwa wa Iguputo

¹ Nngu sika ollotella wa dda Iguputo. Apwiya aawella va murapo woothamaka oya o Iguputo. Mafano a o Iguputo eneerotthukumella vamiitthoni viwa nave mirima ddiwa ddineerotthomowa ekaamba ya woova.

² Apwiya enallota wi, “Vano kineeroweeriha Aiguputo wi ewaneke anayaayove. Mmbale anaawaneke ni mbalaaye, muzinda onaawaneke ni muzinda mukhwiiwa navettho omwene onaawaneke ni omwene okhwiiwa.

³ Kineerolepheliha ddoolinga dda Aiguputo mwawi eneerotathilla murima nave eneerekoveka ezeru wa mafano, oollota ni minepa, awoombesa ni amanyaka.

⁴ Kineerewaavelleella Aiguputo wa oolamulella eekuku, mwene amasiva aneerewaalamulella. Mi Apwiya Mulluku Amasiva Mattheene koollota.”

⁵ Muhinje wa Nailo oneerowelleella ni wumma tondoro.

⁶ Engalande ddiwa ddineerewunkha nave enthambi ddiwa ddineeroyeva ophiyera wumma. Epango ni mululu ddineeronyaalla

⁷ nave ddoomella ddittheddene dda mukhwipi mwa Nailo ni woohellella wiwa ddineerewumma oohooneyattho.

⁸ Awiipha ehomba oneerokhupanya ni winlla, attheene oomedda ohito wa Nailo eneeromoriwa ethakaraka nave attheene oovokha mathaviiwa m'maaddini eneerewinlla.

⁹ Athu oophara mutteko woopotokosa nthoche navettho athu awoopa ekuwo ddabafuta ddaweella eneerotathilla murima.

¹⁰ Eeruso yawoopa ekuwo eneerewumma muwano nave aganyu eneerovoreyiwa murima.

¹¹ Enduna dda mu muzinda wa Zowani tti ookarangeya nave alangizi eezeru a Farao enaganizera ddoolloddowa. Ethiyo munaawore mwawiidde omulleella Farao voollotani wi, “Mi tti mwaana a eezeru, mwaana a mamwene akhalle?”

¹² We Farao, eezerwaawo eri wuuwi? Ewe wuno mwawaakuva wi odduwelle nnddo Apwiya Amasiva Mattheene esimikizalliiwa ddoomuhumullulla Iguputo.

¹³ Enduna dda o Zowani ddootthattuwa ddookarangeya nave anamwani amamwene a o Memfisi yoollekiwa. Oohoollella a Aiguputo yoovirikaniha ellapwiiwa.

¹⁴ Apwiya ahaavaha munepa woovirikaniha variyari viwa mwawi ennaahollosa Aiguputo mu erive ello eneeriiwa wonanko oolezela ooserenguwa ni marapheywiiwa.

¹⁵ Nave khaavo naari mmodda mu Iguputo oyo aneerevo ello, eeyuuma apaalle oohoowa, oovuwa apaalle ashisha.

Iguputo aneerewaallapella Apwiya

¹⁶ Nllapo nenno Aiguputo enaakhalle wonanko atthiyana. Eneerotthukumella ni woova voowoonani Apwiya Amasiva Mattheene ettaphurusaka nnatta wi yaallake.

¹⁷ Ellapo ya Yuda eneerowoopopiha Aiguputo. Nave enthawi ddittheddene Aiguputo yiiwa dda Yuda eneereke woova ekaamba ya nnddo Apwiya Amasiva Mattheene esimikizalliiwa oweerella.

¹⁸ Nllapo nenno mu ellapo ya Iguputo oneerokhalla mizinda mitthanu ddoollota Eheberi nave athwiiwa eneerollupella wa Apwiya Amasiva Mattheene wi eneerewaallapella. Mmodda mwa mizindannddo onaaromolliweke wi, “Muzinda wa Nndduwa.”

¹⁹ Nllapo nenno muwari mwa ellapo ya Iguputo muneerokhalla nikuwa na Apwiya nave vakhuviru ni malire vineerokhalla nlluku na yawuupuwelliha Apwiya.

²⁰ Nndda ddinaakhalle omboni wooniha wi Apwiya Amasiva Mattheene yookhallamo mu ellapo ya Iguputo. Nave Aiguputo voowinllellani wa Apwiya va ddoohoosa ddiwa, alliwa eneeromurumiha oovullusa wi awaakihe ni waavullusa.

²¹ Vano nllapo nenno Aiguputo eneerewaadduwella Apwiya. Ddawoona, eneerollapella vooheraatthini mukutho ni voovelleellani ddoovelleella navettho eneerekeweera nnddo yallupenlliiwa wa Apwiya.

²² Apwiya eneerewaallaka Aiguputo koma vatulli viwa eneerewaachiriha. Ddawoona, eneerewiiwa ni waachiriha yarukunuwella wa alliwa.

²³ Nllapo nenno vineerokhalla musewu muullupalli ovenyera o Iguputo oya o Asiriya. Aasiriya eneeroweetella Aiguputo navettho Aiguputo eneeroweetella Aasiriya vawi eellaalla enaallapelleke vamodda.

²⁴ Nllapo nenno Israele ni Iguputo ni Asiriya, ellapo ddirarunndda, ddinaakhalle madaliso wa ellapo yavatthi ettheene.

²⁵ Apwiya Amasiva Mattheene eneerewaadalisa wi, “Edalisiwe Aiguputo, athwaaka! Edalisiwe Aasiriya, mutteko wa mattaaka! Edalisiwe Aisraele, yoohallanaaka!”