Yesaya 18 - Mawu a Mulluku

Mulluku aneeromullaka Kushi

¹ Otulli wa athu ookhalla okhopella wa mihinje dda o Kushi nko oniiweya opuphella wa muuphello!

² Ovenyera o ellapweeyo enaaruma amithenga va muhinje wa Nailo ewenlle ekallawa ddamabungwa. Vano muyeewo nyu amithenga awaakuva wa mutundu wa athu oorekama ni awoollowa mwiilli nave awooviwa ni athu avakhuviru ni awoorekama, mutundu wamasiva ni woogonjiha mitundu ddimodda, athu ayo ellapwiiwa tti yookawaneya ni mihinje.

³ Nyu athu attheene a va ellapo yavatthi ni nyu ookeraattheya va ellapo yavattheella, voowellihiwani embendela vaddullu va mwaango muneerewoona nave vawoopiwani nipallapata muneerewiiwa.

⁴ Vawi Apwiya yaakilleella wi, “Ovenyera onipuroni waka kineeroweha vatthi mwawiithaalla wonanko nndduwa ninoopelliiwa enthawi yooviha apaalle mmo nikame ninimmelliiwa mahiiyu va enthawi yoohata.

⁵ Athu ehinaambe ohata malluwa evakareyille nave mpesa waambille wiithwa, alliwa eneerophadda enthambi ni mpeni nave enthambi ddoorapa ddineerovenyihiwavo.

⁶ Mitembo dda akhoto anaahiyere epallame dda m'miyaangoni navettho enama ddawoopiha ddamuhakani. Epallame ddineerottakhuna va enthawi yeellimwe nave enama ddawoopiha ddamuhakani mu eyitta.”

⁷ Va enthawi yeeyo, athu eneerowaana ddoovelleella ddiwa wa Apwiya Amasiva Mattheene. Alla enaakhalle athu oorekama ni awoollowa mwiilli nave awooviwa ni athu avakhuviru ni awoorekama, mutundu wamasiva ni woogonjiha mitundu ddimodda, athu ayo ellapwiiwa tti yookawaneya ni mihinje. Ddoovelleellanndda eneerowaana o mwaango wa Ziyoni, nipuro na nnddina na Apwiya Amasiva Mattheene.