Yesaya 17 - Mawu a Mulluku

Ollakiwa wa Damasiko ni Efuremu

¹ Nngu sika ollotella wa dda Damasiko. “Ngoonani, Damasiko khakhallattho muzinda koma anaatthattuwe ntepe.

² Mizinda dda o Asiriya khaddikhalla ni athu wa enthawi yoohimalla. Ddinaakhalle dda eziweto nnddo ddinaakonekemo mwamurendelle.

³ O Efuremu khokhallattho mipanda nave o Damasiko khokhallattho omwene. Oohalla a o Asiriya eneerewaakhiwa olemu wonanko athu a o Israele. Mi Apwiya Amasiva Mattheene koollota.”

⁴ “Nllapo nenno oriiheya wa Yakobo oneeroyevihiwa nave eyuumaaye eneerotthattuwa ohoowa.

⁵ Israele anaakhalle wonanko emata yatirigu emanlle ohatiwa. Anaakhallettho wonanko emata ya mu ntapo na Refaimu athu yamalla omuurulla tirigu.

⁶ Ooyevave sika enaahallewo wonanko vootikhani muteekho wa olivi vawi ddinnahallavo ezipaso piilli apaalle ddiraru va enthambi ddamuddullu apaallettho ddisese apaalle dditthanu va enthambi ddavatthi. Mi Apwiya Mulluku a Israele koollota.”

⁷ Nllapo nenno athu eneeroweha wa Owaaphatusiiwa nave eneerorukunuwella wa Aweella a Israele waashaasha nikavihero.

⁸ Nave kheroromella makuwa yaamakilliiwa weekhiiwa apaalle yaapotokosilliiwa ni mattiiwa naari mafanwiiwa a Asherimu apaalle makuwa awoosellavo lubani.*

⁹ Nllapo nenno mizinda ddamasiva dda Israele ddineerohiyiwa wonanko mizinda dda Aamori ni dda Ahivi nnddo athu yaddihiyalliiwa vawaathawani Aisraele nave ddineerotthattuwa matepe.

¹⁰ Nyu Aisraele, moomutiwalla Mulluku Oovullusaanyu, khemwaaroromenlle nlluku na woothawella wanyu. Munipuroni mwaye mwaallimella emata ddoopatuleya milluku ddeelleto.

¹¹ Naari mweerihalle wi mwallimalleenyunnddo ddunnuwe nllapo nenno apaalle ddikhume malluwa ohinase vaavo komave ddoohata ddanyu ddinaamalle va nllapo na ddoohoosa nave ovoreya wene onaakhalle woohimalla.

Ogonjihiwa wa adani

¹² Otulli! Athu a mitundu ddinchichi ennathiya owaruni wunchichi wonanko onyakulla wa enyanja. Otulli! Athu a mitundu ddimodda ennaturuma wonanko maaddi amasiva.

¹³ Akhoto a mitundu ddimodda ennawa ni othuruma wonanko maaddi manchichi. Koma Apwiya ennaahumullulla nave eneerothawella woorekama. Eneerewiikarihiwa wonanko nthupi noovava ni ephevo va miyaango, wonanko mallulla oovava ni namangalle.

¹⁴ Va enthawi ya misikuwa, ngoonani ddawoopiha! Koma ohinase attheene ennathiima vawi mmu sika ddinaaweereyelliiwa athu ayo enanaakha ddeko. Olla sika otulli wa athu ooniiyera.