Yesaya 16 - Mawu a Mulluku

Ohalleella wa Mowabu

¹ Amowabu yaarumihe anamwanankhosa wa oolamulella ellapo ovenyera o muzinda wa Shela, voovirella ettilla ya mu echipululu ophiya o mwaango wa Ziyoni.

² Wonanko mmo epallame ddinavavelliiwa nngu ni nngu ddapallallesiwa mumphuruni, emoddamoddave yeeyo atthiyana a o Mowabu enneeteeta o madoko a muhinje wa Arinoni.

³ Enaalleella athu a o Yuda wi, “Munilleelle, mukamulle yawi neere. Nndduwa naphiya va muru munivahe muuthuuchi wookhalla wonanko mahiiyu. Muniipitthihe hiyaano athu awiikarihiwa nave muhinivelleelle hiyaano athu oothawa ekhoto.

⁴ Oothawa ekhoto a o Mowabu ekhalleke variyari vanyu. Mukhalle voovulluwella viwa wa awoonongoolle.” Enthawi enimawa yawi ohoosiwa khokhallavottho, woononga oneeromalla nave oyo aachella matthu va muru aneerovenyamo mwiillaponimmo.

⁵ Vaavo mpando woomwene oneerokeraatthihiwa mwa echikondi yoohisintheya nave mmodda mwa edduullu dda Davide aneerokhallavo moororomelleya. Olliye aneerekeweeruza moolungama ni ollipihella weera ddaphaama.

⁶ Athu a o Yuda enallota wi, “Nohiiwa dda wiitukhulla wa Amowabu vawi enniitukhulla wunchichi. Wiinyarulla wiwa, okota wiwa, osimbwa wiwa ni wiiriiha wiwa, ddittheddene khaddinna mutteko.”

⁷ Sika ahiyeni Amowabu wi yinlle wunchichi, attheenaayo yinllelle mutundwiiwa. Nave yinlle mootathilla murima ekaamba ya makeke a mpesa ayo yaachiiwa o Kiri Haresefi.

⁸ Emata dda o Heshiboni ni emata ddampesa dda o Sibima ddooguga. Khalle mipesa ddaanaalezeliha oolamulella athu a mitundu dda athu ddimodda nave enthambi ddiwa ddaanaphiya o Yazere, o echipululu ni okhopella wa enyanja.

⁹ Ekaamba ya yeella, kiniminlla wonanko mmo eninllella athu a mu muzinda wa Yazere ekaamba ya emata ddampesa dda o Sibima. Nyu athu a o Heshiboni ni Eleyale, kinuunaanihani ni miitthori ekaamba yawi moolephela ophwanya ddoohata ekaamba ya ekhoto eyo yoonongille ddittheddene.

¹⁰ Ohakallalla ni weelliwa murima woohiyiwa o emata dda ethaya yaphaama. Machipo kheniipiwa nave khavirittho mawu ookhuwa mu emata ddampesa. Khaavo anamuwamulla vinyo moovotellamo mpesa nave okhuwa woohakallalla wa enthawi yoohata mpesa woohiyiwa.

¹¹ Sika murimaaka oninlla wunchichi omwinllella Mowabu nave kinniipullella ekaamba ya woonongeya wa Kiriheresi.

¹² Naari Amowabu yiivelleellaka oya o mapurwiiwa oollapellamo ni o enyumba ya milluku ddiwa ophiyera otopa, khephurana ello.

¹³ Mawu yaalla tti alle Apwiya yallotilliiwa khallekhalle dda Mowabu.

¹⁴ Koma vano enallota wi, “Miyakha miraru ddihinamalle moollikana ni mmo aneerengella aganyu, eyuuma ya Mowabu enaakhalle emanlle. Mulloko muullupalli wa athwaaye oneerewoonongeya nave oovulluwa enaakhalle ooyeva ni oofooka.”