Yesaya 15 - Mawu a Mulluku

Mulluku aneeromoononga Mowabu

¹ Nngu sika ollotella wa dda Mowabu. Ekaamba yawi muzinda wa Ari wohoonongiwa mahiiyu mamodda, ellapo ya Mowabu yoomora. Navettho ekaamba yawi muzinda wa Kiri wohoonongiwa mahiiyu mamoddave ellapo ya Mowabu yoomora.

² Athu a o Diboni enawella enyumba ya milluku ddiwa ni mapurwiiwa oollapellamo yinllaka. Athu a o Mowabu eninllella muzinda wa Nebo ni wa Medeba. Orive muru woochemiwa mpala, ereru ddittheddene ddoochemiwa.

³ Athu a m'misewuni ewanre eziguduli, vaddullu va enyumba ni m'mathatoni arive muthu aninlla mookhuwa amorihaka miitthori.

⁴ Athu a o Heshiboni ni a Eleyale eniminlla moollipiha sika mawiiwa enniiweya ophiya o Yahazi. Ekaamba ya yeella, akhoto a o Mowabu eniminlla mookhuwa, aatathilla murima.

⁵ Murimaaka onamwinllella Mowabu. Athwaaye ethawenlle ekhoto o Zowari ni o Egilati Shelishiya. Eneeta yinllaka o mutunda wa o Luhiti, eninlla mookusa murima va musewu wooya o Horonaimu.

⁶ Maaddi aawelleella o muhinje wa Nimurimu, manasi aanyaalla, ahumma nave khaviri munyepu.

⁷ Ekaamba ya yeella, athu enimathawa etukhunlle eyuumiiwa wi ellapuwena na Nnjalle.

⁸ Winlla wiwa onniiweya o ellapo ettheene ya Mowabu naari ovenyera o Egilaimu ophiyera omwera o Beerelimu.

⁹ Maaddi o Diboni aattakanyihereya ni nikhame komave kineerowaana ddoohoosa ddinchichi va Diboni. Kineerowaana mukango wi omuphare arive muthu anaavulluwe o Mowabu ni anaahalle mwiillaponimmo.