Yesaya 14 - Mawu a Mulluku

Ohokollowa wuukaporoni

¹ Apwiya eneereweerella echifundo nibanja na Yakobo, eneerewaatthoollattho Aisraele ni owaakhullella wi ekhallettho mu ellapwiiwa. Athu ayo ehiri Aisraele eneerokhalla nimodda ni ollundellelleyana ni nibanja na Yakobo.

² Athu a mitundu ddimodda eneerewaavelleella o ellapo eyo Apwiya yaavahilliiwa. Wenko athwaayo enaakhalle awaarumeyella monga akaporo, aallopwana ni aatthiyana. Aisraele eneerewaaphara okaporo athu ayo khalle yaari apwiiwa ni waalamulella ayo khalle yaahoosa.

Mwene a o Babiloni mu ellapo ya ookhwa

³ Apwiya eneerewuuvumihani o ddoowaawa, ddoohoosa ni mitteko ddootopiha nnddo athu yuuphariheewani.

⁴ Vano muneeromunyemulla mwene a o Babiloni wi, “Amanlle mwawiidde oohoosa? Amanlle mwawiidde awiitukhulla?

⁵ Apwiya aakotholla muwashullo wa athu oonanara, ahinttaka ekopo yoomwene ya oolamulella.

⁶ Olliye aanalamulella mweekuku ni oddihoosa moohihiyerera mitundu dda athu.

⁷ Vano ellapo yavatthi ettheene yohiithuuwa, yookhurumuwa nave athu enniipa moohakallalla.

⁸ Miteekho dda paini ddinnahakallallella omora wa Babiloni. Nave mikunguza dda o Lebanoni ddinallota wi, ‘Waambeella wamorihiweewe, khaavo awiille wi anuuhe.’

⁹ “We mwene a o Babiloni, ellapo ya ookhwa wuutthukumellella okhozekella okumana ni weyaano waaphiyaka. Yohuuvenyihella minepa dda ookhwa dda oohoollella attheene akhalle a ellapo yavatthi nave ennaweeriha mamwene attheene akhalle ovenya va mipando ddiwa.

¹⁰ Attheenaayo eneerollota nave eneerewuulleella wi, ‘Weyaanottho woomalla masiva wonanko hiyaano! Vano noophwanaphwana!’

¹¹ Oriiheya wawo ni machipo a azezaawo, ddittheddene ddoomalla nave woovollowana o ellapo ya ookhwa. Vano bedaawo tti mapwihi nave yawiikhuneellaawo tti miingu.

¹² “We thanda, mwaana a ohinase, ngoona mmo omorelleewe ovenyera oddullu. We olle agonjiha mitundu dda athu, wohuuhelliwa vatthi.

¹³ M'murimani mwawo waallipihella ddoowella oddullu wi wakeraatthihe mpandwaawo wa omwene vaddullu va etheneeri dda Mulluku wi wakhalle va mwaango wa ompoto nko onatthukumana milluku ddittheddene.

¹⁴ Navettho waaganiza wi oneerowella vaddullu va mirapo wi ophwanaphwane ni Amasiva Mattheene.

¹⁵ Koma wookitthihelliwa o ellapo ya ookhwa, o nlliti noowallamella na vatthi va ellapo.”

¹⁶ Ookhwa yawoona eneerekewuuwehesesa ni waamba oganizera dda weyaano wi, “Ethiyo olla khe olle atthukumelliha ellapo yavatthi ni otikha moomwene?

¹⁷ Ethiyo khe olle atthattusalle ellapo yavatthi echipululu ni okumulla mizinda nave ahaakhullella wi oophariwa ehokollweelle owaniwa?”

¹⁸ Mamwene mattheene a mitundu dda athu enakona mooriiheya, arive muthu mu mahame aayeaaye.

¹⁹ Koma weyaano wootathillelliwa otte wa mahamaawo wonanko enthambi yawunta ni yoonanara. Mutembwaawo woovuhellelleya ni awiiphiwa ayo yahomiwe ni nsupada evokhiwa mu nlliti namalluku nave oneerokhalla wonanko mutembo woonyingallelliwa.

²⁰ Ekaamba yawi wohoononga ellapwaawo ni owiipha athwaawo, khovitthiwa mu mahame mooriiheya. Nave edduullu dda athu aweera ddoonanara kheddiwa dduupuwelliwa naari vang'ono.

²¹ Ekaamba ya machimo a attiitthiiwa, khonzekerani owiipha anamwani a mwenoolla woova wi enaavenye ni waakha ellapo yavatthi ni oyiddalliha ni mizinda.

Mulluku aneeromoononga Babiloni

²² Apwiya Amasiva Mattheene enallota wi, “Kineerowuhella ekhoto muzinda wa Babiloni ni otthollosa nnddina naye ni attheene oohallamo, khavivulluwa anamwani ni edduullu ddene. Mi Apwiya koollota.

²³ Muzindooyo kineerowutthattusa nipuro nookhallamo anasiniku ni ntapo na matokwi. Kineerewuushella ni mushello wawoononga. Mi Apwiya Amasiva Mattheene koollota.”

Mulluku aneerowoononga Aisraele

²⁴ Apwiya Amasiva Mattheene yoollupella wi, “Ddawoona, ddineereweereya wonanko mmo kikeraatthihelleemi nave ddinaakhalle wonanko mmo kisimikizelleemi.

²⁵ Kineerowoononga Aasiriya mu ellapwaaka nave kineerewaanyingallella va miyaango ddaka. Sika athwaaka kineerewaarulla nigoli* nno Aasiriya yaawarihalliiwa, katundu oollemella va mathuriiwa.

²⁶ Nndda sika kikeraatthihalleemi wi ddeereye va ellapo yavatthi ettheene. Nave koottaphurusa nnatta naka wi killake mitundu ddittheddene dda athu.”

²⁷ Vawi Apwiya Amasiva Mattheene sika ekeraatthihalle wi ddenndda ddeereye, ethiyo ttaanittho anaawore waavaanyiha? Nnatta niwa tti noottaphurusa, ethiyo ttaanittho anaawore onihokollosa?

Apwiya eneerowoononga Afilisti

²⁸ Muyakha oyo vakhwille mwene Ahazi, vahiiweya ollotella wawi,

²⁹ “Nyu Afilisti, muhihakallalle vawoonani wi Aasiriya ayo yaari wonanko ekopo yoowuukuthani aatthollowa. Mu mutundu wa enowa shisha muneerokhuma evilli nave mu mutundu wa evilliiyo muneerokhuma enowa yanttipwi yoothamaka wunchichi.

³⁰ “Athu oohoowesesa eneerophwanya yoocha navettho oopaneya eneerokhalla vaphaama. Koma nyu Afilisti kineerowoonongani ni ettalla nave oohalla kineerowiipha.

³¹ “Nyu avamullako, inllani moollipa! Nyu millako, vekani nikavihero mookhuwa! Nyu Afilisti, tthukumellani ni woova! Onani nthupi niri phellaa! Ovenyera ompoto nave va akhoto enaawaayo kheviri awoova.

³² “Ethiyo ninaawaakhulle tini Afilisti? Ninaallote wi, ‘Apwiya aamukeraatthiha Ziyoni nave mu muzinda yoolla athwiiwa oohoosiwa ennaphwanyamo voovulluwellavo.’ ”