Yesaya 13 - Mawu a Mulluku

Apwiya eneeromullaka Babiloni

¹ Nndda sika ddeko Yesaya mwaana a Amozi oonilleeye m'masomphenya oollota dda Babiloni.

² Tukhullellani muddullu embendera yeekhoto mwaango wawi see ni owiithana nave wuuvelleni matta wi evollowe va millako dda enduna.

³ Mi Apwiya kohaalamula athwaaka oopatuleya. Kohaatthukumaniha akhoto amasiva ni ookota wi ekhalle ezida ddaka ddawaallakella ayo kinaashelleemi murima.

⁴ Ngiiwani otokollolla omwaangoni, ntapha na mulloko wa athu. Ngiiwani othuruma variyari va moomwene nave mitundu dda athu dditthukumanille vamodda. Apwiya Amasiva Mattheene enaakhozekelliha akhotwiiwa ekhoto.

⁵ Alliwa enavenyera o ellapo ddawoorekama, omamallihello wa ellapo. Sika Apwiya ni ezida ddiwa moosha murima wi yoononge ellapo yavatthi ettheene.

⁶ Inllani mookhuwa vawi nllapo na Apwiya nohaatamella nave ninawa ni woononga woovenyera wa Amasiva Mattheene.

⁷ Sika matta mattheene eneerofooka nave murima wa arive muthu oneerotthomowamo.

⁸ Attheene eneerotathilla murima ni wiiwa ovoreya wonanko wa mutthiyana aayaraka. Eneerekowehana mwawoova nave ekhove ddiwa ddineerewooniha woova.

⁹ Ddawoona, nllapo na Apwiya ninimawa, nllapo noohikhalla ni ethakaraka, noosha murima ni nawoopiha. Apwiya enimawa wi etthattuse ellapo yavatthi wi ekhalle echipululu ni owoononga athu oochimwa ookhalla mwemmo.

¹⁰ Vawi etheneeri ddittheddene ddooddullu khaddiwala. Nndduwa nineeroripa vookhumani nave mweeri khowala.

¹¹ Apwiya enallota wi, “Kineerewaallaka athu a ellapo yavatthi ekaamba ya onanara wiwa nave kineerewaallaka oonanara ekaamba ya ochimwa wiwa. Kineeromalliha okota wa athu awiitukhulla nave kineerokitthiha wiitukhulla wa athu eekuku.

¹² Kineeroweeriha athu wi erameke omukhwaranya golide aphaama nave mitundu dda athu oneerorama omukhwaranya golide a o Ofiri.

¹³ Sika kineerotikha muddullu nave ellapo yavatthi eneerosusa vanipuroni viwa ekaamba ya owalli wa mi Apwiya Amasiva Mattheene va nllapo na osha murima waka wawoopiha.

¹⁴ “Sika vano arive muthu aneerohokollweella wa athu oowaniwa nave arive muthu o ellapo yoowaniwa wonanko epaalla ddawaathawa athu oosaya apaallettho wonanko enkhosa ddoohikhalla ni ooddittottha.

¹⁵ Arive muthu anaaphwanyeye aneerohomiwa nave ari muthu anaaphariwe aneerewiiphiwa ni nsupada.

¹⁶ Aniiwa awaamwa eneeronyenyiwa alliwa yoonaka, ddeko dda mpa mwiwa ddineerewaakhiwa nave awariwa eneeropharelliwa.

¹⁷ “Vawi Amedi khenampaalla siliva nave khanahakallalla ni golide kineerewaavenyiha wi ewane ni Ababiloni.

¹⁸ Eneerowiipha asombwe ni miira ddiwa nave kheweerella echifundo naari anamwani awaamwa.

¹⁹ Omwene wa Babiloni wookhalla ni eyuuma okhwaranya moomwene mattheene nave athwiiwa ennawukotella. Koma kineerowoononga muzinda wa Babiloni wonanko mmo kamoonongelleemi Sodomu ni Gomora.

²⁰ Athu khewa ekhallamottho va mibado ddittheddene. Arive Aweeteeta khawa amakawottho musasa wenko nave arive mbusa khawa achihawottho eziweto ddaye.

²¹ Koma enama ddamuhakani sika ddinaakhalleke wenko, enyumba ddineeroddalla ni akuukuru, anthiwatiwa ni anaahe.

²² M'mattatthani mwaye muninlleke akhuddupa, mu enyumba dda mamwene ddooreera muninlleke akhatwe. Ddawoona, enthawi yohaatamella, mallapwiiwa ehanlle vang'ono omalla.”