Yesaya 11 - Mawu a Mulluku

Enthambi ya Yese

¹ Enthambi eneerophuwa va nikoto na Yese nave yoophuwa eneerokhuma o misisi ddaye.

² Munepa wa Apwiya onaakhalle va olliye, munepa woovaha ezeru ni wiiwesesa, munepa woovaha malangizo ni masiva, munepa woovaha odduwella ni owoova Apwiya.

³ Nave owoova Apwiya sika enaakhalle ello yoomuhakallalliha. Kheeruzaka mooweha ekhove apaalle ohumullulla voothwarani ddawiiwa.

⁴ Oohoowa aneeroweeruza mweechilungamo, athu shisha a va ellapo yavatthi aneerewaakamullella millatu moohiweha ekhove. Mawu muwano mwaye enaakhalle ekopo yawaallakella oochimwa, mpweya wa vayanoni vaye oneerowiipha oochimwa.

⁵ Echilungamo enaakhalle laambaaye, ororomelleya onaakhalle yoomakella muyuununi mwaye.

⁶ Mumbulu oneerokhalla ni mwaanaankhosa, nanthavi aneerokona ni musaanaapuri, musaanaang'ombe ni mwaanaamukango enaachelleke nimodda, mwaana mung'onong'ono sika anaaddiwehereke.

⁷ Eng'ombe ni echimbalangondo ddinaachelleke vamodda, aniiwa enaakonelleke vamodda, mukango oneerekocha munyepu wonanko eng'ombe.

⁸ Kantchewa aneerekottheella va mulliha wa namarawe, mwaana aneerekovollochiha nnatta omullihani wa evilli oohillumiwa.

⁹ Khavikhalla erive ello yoovoreya apaalle yawoononga va mwaango woopatuleya wa Apwiya. Vawi ellapo yavatthi ettheene eneeroddalla ni waadduwella Apwiya wonanko enyanja enaddallelliiwa ni maaddi.

Ohokollowa wuukaporoni

¹⁰ Nllapo nenno musisi wa Davide enaakhalle embendera wa athu a mitundu ddittheddene. Attheene eneerotthukumana wa olliye nave nipuro naye ninaakhalle na ntitimiho.

¹¹ Nllapo nenno Apwiya eneerottaphurusa mattiiwa waneepiilli wi ewoopolle athwiiwa oohalla o Asiriya, o Iguputo, o Patirosi, o Kushi, o Elamu, o Babiloni, o Hamati ni va ezilumba dda mu enyanja.

¹² Eneerewiimesella embendela mitundu ddittheddene dda athu nave eneerewaatthukumaniha oorimeella a o Israele ni oopallalleya a o Yuda ovenyera o makona matthanu mattheene a ellapo yavatthi.

¹³ Ehache ya Efuremu eneeromalla nave oomuhoosa Yuda eneerewoonongiwa. Efuremu khawattho amukhallella ehache Yuda nave Yuda khawa amukatamiha Efuremu.

¹⁴ Koma Yuda ni Efuremu eneerewaahella ekhoto Afilisti woovollowa nndduwa. Eneerollipana ni Aedomu ni Amowabu nave eneerewaagonjiha Aamoni.

¹⁵ Nave Apwiya eneerowelleelliha tondoro nikuttha na enyanja ya o Iguputo. Eneerottaphurusa nnatta niwa nave eneerewoopiha ephevo yooviha va muhinje wa Yufurate. Sika muhinjooyo oneerokawaneya mu asimihinje mitthanu ni miilli wi athu ellapuwe vawumma.

¹⁶ Nave vineerokhalla musewu muullupalli wawi oohalla o Asiriya yeetemo wonanko Aisraele yavenyeriiwa o Iguputo.