Yesaya 10 - Mawu a Mulluku

¹ Otulli wa athu ayo enakeraatthiha malamulo oohilungama ni olemba ddawaahoosa athu.

² Alliwa ennahollosa malamulo vaweeruzani oohoowa moohilungama. Ennawaakha ddawaaphwanella athwaaka nave ennatthukumaniha dda anaamukhwelle ni owiiyera akhwaadduni.

³ Ethiyo muneereti va nllapo noollaka voophiyani ephevo ya namondwe yoovenyera woorekama? Ethiyo munaathawelle wa aani wi uukavihereni? Ethiyo eyuumaanyu munaahiye wuuwi?

⁴ Khayiivo enaahalle koma ophariwa variyari va athu oophariwa apaalle okhwa variyari va athu awiiphiwa. Komave osha murima wa Apwiya khonaamallelle ekaamba ya ddenndda nave muwonwiiwa tti woottaphurusattaphurusa wi yaallake.

Mwene a o Asiriya monga echida ya Mulluku

⁵ Apwiya enallota wi, “Otulli wa mwene a o Asiriya vawi olliye ari wonanko muwashullo wa osha murima waka ni ekopo ya owallaaka.

⁶ Kinamuruma wa mutundu woohipwatha dda Mulluku nave kinamulamula wi aye wa athu ayo kaananariwelleemi wi atthukumanihe ni waakha eyuumiiwa ettheene ni waanyingallella wonanko matokwi a m'musewuni.”

⁷ Koma mwene a o Asiriya khanadduwella ddenndda nave murimaaye khonaganiza mwawi ddiidda. Vawi murimaaye ori va woononga ni otthollosa mitundu ddinchichi dda athu.

⁸ Olliye anallota wi, “Ethiyo oohoollellaaka attheene akhoto kheri wonanko mamwene?

⁹ Mi koogonjiha mizinda monga Kalino, Karikemishi, Hamati ni Aripadi nave koogonjihattho Samariya ni Damasiko.

¹⁰ Mi kaawiipha mamwene oollapella mafano ayo mafanwiiwa tti uullupalli okhwaranya a o Yerusalemu ni a o Samariya.

¹¹ Ethiyo kamweerenlleemi Samariya ni mafanwaaye, ngini kimweerelle Yerusalemu ni mafanwaaye?”

¹² Apwiya yamalliha muttekwiiwa wowaallaka attheene va mwaango wa Ziyoni ni o Yerusalemu, eneeromullakattho mwene a o Asiriya ekaamba ya okota ni wiitukhulla waye.

¹³ Vawi mwenooyo anallota wi, “Keerille ddenndda ni masivaaka navettho ni ezeru ddaka vawi kinniiwesesa. Koosusa malire a mitundu dda athu nave kohaakha eyuumiiwa vawi kohaakitthiha ayo yaari va mipando dda omwene.

¹⁴ Nnatta naka noophara eyuuma ya athu wonanko muthu anavavullelleeye emphuru ya epallame. Wonanko mmo muthu anatotellelleeye mooche oohiyiwa, emoddamoddave yeeyo miyaano kaayitthukumaniha ellapo yavatthi. Nave kheyaarivo naari epallame emodda yeeseesille otikha muuphello apaalle waatthamiha owanoni apaalle yawinlla teetee.”

¹⁵ Koma Apwiya enallota wi, “Ethiyo kottokwa ttuuwiitukhulla omukhwaranya oyo anatthallana apaalle saha ttuuwiiriiha omukhwaranya oyo anachekella? Valle ekoonda khenamutukhulla muthu koma muthu sika anatukhulla ekoonda.”

¹⁶ Ekaamba ya yeella Apwiya Amasiva Mattheene eneerorumiha ereta ddawoondiha wa akhoto amasiva a o Asiriya. Nave eyuuma ya omwene eneerokhara wonanko munllo nave khethiimiheya.

¹⁷ Mulluku, Owala wa Israele anaakhalle wonanko munllo. Aweella anaakhalle wonanko mallumi amunllo wooshellelliha miiwa ddoohiyanahiyana va nllapo nimodda.

¹⁸ Otthako muullupalli ni ethaya yaphaama ddineerewoonongiwa nave ddinaakhalle wonanko muthu oovoriiwa awoonda.

¹⁹ Nave muutthakoni munaahalle mitteko ddooyeva wunchichi wi naari mwaana ttuuddeerengella.

Ooyeva sika enaahokollowe

²⁰ Nllapo nenno oohalla a o Israele, oovulluwa a mu nibanja na Yakobo kheyaaroromellattho athu yawoonongille koma enaahameelle va Apwiya, Aweella a Israele.

²¹ Oohalla eneerohokollowa, oohalla a mu nibanja na Yakobo, eneerohokollweella wa Mulluku Amasiva.

²² We Israele naari athwaawo yaate wonanko mihava dda onyanja, oohalla ooyeva sika enaahokollowe. Woonongeya woosimikizelliwa, echilungamwiiwa eneerosefukella.

²³ Ddawoona, Apwiya Mulluku Amasiva Mattheene eneerewoononga ellapo ettheene wonanko mmo alamulelleeye.

Ollakiwa wa Asiriya

²⁴ Ekaamba ya yeella, Apwiya Mulluku Amasiva Mattheene enallota wi, “Nyu athwaaka a o Ziyoni, muhiwoove Aasiriya yawuuhoosakani ni ekopo ni owuukuthani ni ekoonda ddiwa wonanko yeerella Aiguputo.

²⁵ Osha murima waka ohanlle vang'ono omalla va nyuwaano koma kineerewaananariwella alliwa ophiyera kiwoonongille.

²⁶ Mi Apwiya Amasiva Mattheene kineerewaawashulla wonanko mmo kaawashullelleemi Amidiyani o nlluku na Orebu. Kineerewaatukhullella ekopwaaka wonanko mmo kaallakelleemi Aiguputo va enyanja valle.

²⁷ Nllapo nenno kineerewuurullani katundu a Aasiriya va mathurini vanyu ni nigoli* niwa munikohini mwanyu nave nigolinno nineerewunttakeya ekaamba ya oneneva.”

Ophiya wa adani

²⁸ Adani aaphiya o Aiyati, aakhwaranya o Migironi nave katundwiiwa emusungalle o Mikimashi.

²⁹ Evirelle va mpata nave ekonne mahiiyu o Geba. Athu a o muzinda wa Rama aatthukumella nave a o Gibea, muzinda wa Saulo, aathawa.

³⁰ Nyu athu a o Galimu, inllani mookhuwa! Nyu athu a o Laisha, apellani maaru! Nyu athu a o Anatoti, akhullani!

³¹ Athu a o Madimena aathawa nave athu a o Gebimu ahiipittha.

³² Ollello adanaayo eniimelle o Nobu, eneerotikha miwono ddiwa owoopopiha athu a o Ziyoni, mwaango wa Yerusalemu.

³³ Koma Apwiya Mulluku Amasiva Mattheene eneerewaaphadda wonanko enthambi dda muteekho. Attekweene eneeromorihiwa nave awiitukhulla aneerokitthihiwa.

³⁴ Apwiya eneerewaaphadda wonanko mmo athu enuuhelliiwa ni kottokwa miteekho dda muutthakoni. Naari miteekho dduullupalli dda o Lebanoni ddineeromora.