Yesaya 1 - Mawu a Mulluku

¹ Masomphenya a Yesaya mwaana a Amozi ayo oonilleeye oollota dda Yuda ni Yerusalemu mu enthawi ya olamulello wa Uziya, Yotamu, Ahazi ni Hezekiya, mamwene a o Yuda.

Mulluku anaahumullulla athwaaye

² Apwiya yaallota wi, “We oddullu, ngiiwa nave we ellapo yavatthi, apella maaru, mi Apwiya kinimallota. Kahaayara anamwani navettho kahaallella koma aakiwukila.

³ Eng'ombe ennamudduwella mwaneena nave bulu annadduwella nko pwinnya anamuchiheeyewo koma Israele khanadduwella. Athwaaka kheniiwa naari vang'ono.”

⁴ We ootulli, mutundu wa athu oochimwa, athu oollemelliwa ni ddoonanara. Muyariwe ovenyera wa athu aweera ddoonanara, anamwani ookeraattheya mu ddoonanara. Mohaahiya Apwiya, moomuvevulla Aweella a Israele, moomureya etulli.

⁵ Ethiyo munaavirellelle ollakiwa ni ohihiya owukila ophiyera niini? Arive muthu muru onimamvoreya nave murimaaye woofooka.

⁶ Ovenyera onnyalloni ophiyera omuruni khaviivo vaphaama koma viri marudda, etthuku ni makhwata makitthi. Makhwateene ttoohihuwiwa, oohimakiwa ni oohihelliwa makhura.

⁷ Ellapwaanyu yootthattuwa ntepe nave mizinda ddanyu ddohoosiwa ni munllo. Alleto ahaakha ellapwaanyu ni woononga erive ello moonaka.

⁸ Mwaana aamutthiyana Ziyoni ahanlle yeekha wonanko musasa wa oowehera emata yampesa, wonanko musasa mu emata yamihawa, wonankottho muzinda wowaapheelliwa ni ekhoto.

⁹ Apwiya Amasiva Mattheene yahinihiyalleke amoddahi ooyeva neerotthollowa wonanko Sodomu ni Gomora.

¹⁰ Vano nyu oolamulella a o Sodomu, iwani mawu a Apwiya. Nyu a o Gomora, apellani maaru nnddo Mullukwaahu anuuhuddiheeyeni.

¹¹ Apwiya enallota wi, “Ethiyo mi kinnapwatha waata wa mikutho ddanyunnddo? Ddookikholla mikutho ddooshellelliha dda anankhoro ankhosa ni dda makhura a enama ddooneneva. Nginapaallattho nikhame na anankhoro a eng'ombe, na anamwanankhosa ni na anankhoro a epuri.

¹² Ethiyo ttaani anuulamulani wi muweekena ddenndda vamiitthoni vaka? Ethiyo ttaani anuurumani wi munyingallenyingalleke mathato a enyumbaaka?

¹³ Muhiweenattho mikutho ddoohikhalla ni mutteko vawi naari mwiisi wa lubani* onnakinanara. Ngivillellana mitthukumano ddanyu ddamavekello apaalle Ehakallallo dda Wooneya wa Mweeri ni dda mallapwaanyu a Sabata. Ngivillella ni mitthukumano ddoonanarihiwa ni machimo.

¹⁴ Miyaano kinniitana ni ehakallallo ddanyu dda wooneya wa mweeri ni mallapwaanyu aweella. Ddiri wonanko katundu oollemella nave koovillella kootopa.

¹⁵ Mwaatukhullellaka muddullu mattaanyu voovekellani, miyaano kineerewiipitthiha ekhovaaka. Naari mwaanjerere mavekellwaanyu mwawiidde, ngipwathawo kaambiiwa mattaanyu yooddalla ni nikhame.

¹⁶ Hapani, ddeelliheni nyookha nave venyihanivoni vamiitthoni vaka mitteko ddanyu ddoonanara. Ddawoona, hiyani weera ddoonanara

¹⁷ nave hudderani weera ddaphaama. Ashaashani echilungamo, akavihereni oopaniwa, atetezeni akhwaadduni ni owiimellella vamullatuni anaamukhwelle.”

¹⁸ Apwiya enallota wi, “Hankoni vano nillote mullatwaanyu vawi naari machimwaanyu eri oofiiresesa, eneereweella mbee, naari efiiralle wonanko nikhame, eneereweella wonanko nthoche.

¹⁹ Mwaarimi mukhonzekille okiiwellella muneerocha ddaphaama va ellapo yavatthi.

²⁰ Koma mwakhoota nave mwawukila, muneerewiiphiwa ni nsupada. Mi Apwiya koollota.”

Muzinda woochimwa

²¹ Ngoonani muzinda olle khalle waari woororomelleya ni woolungama koma vano oneera ddooraruwa. Muzinda olle khalle waari ni athu oolungama koma vano wooddalla ni athu oowiipha akhwiiwa.

²² We Yerusalemu, waari wonanko siliva koma vano wootthattuwa oohikhalla ni mutteko. Waari wonanko vinyo aphaama koma vano tti wonanko vinyo oottakanyihera ni maaddi.

²³ Oohoollellaawo ennawukila nave enniiwanana ni allupaawiiya. Arive muthu annaakhella ddamukaphwani nave annathamakella emphaso. Khanaateteza akhwaadduni nave khanapwatha millatu dda anaamukhwelle.

²⁴ Sika Apwiya Mulluku Amasiva Mattheene, Amasiva a Israele, enallota wi, “We ootulli, oollipana ni miyaano kineerewaatthollosa, adanaaka kineerewaahokollosella ddoonanara.

²⁵ Kineerotukhulla muwonwaaka wi killipane ni weyaano. Kineeroweeka machimwaawo ni waahuwa wonanko enahuwelliiwa murawa.

²⁶ Kineerewaakeraatthihattho aweeruzaawo ni attekweenaawo wonanko khalle. Attekweenaawottho. Vatulli viwa we oneeroromolliwa muzinda woororomelleya ni woolungama.”

²⁷ Apwiya tti oolungama, eneeromoopolla Ziyoni ni arive muthu oolapa m'muzindanimmo.

²⁸ Koma oowukila ni oochimwa enaawoonongelle nimodda. Athu owaahiya Apwiya eneerotthollosiwa.

²⁹ Muneerowulliwa muru ni miteekho dda muthundu ni emata ddoopatuleya nnddo mwatthoollilleenyu wi mullapellekewo moohakallalla.

³⁰ Vawi munaakhalle wonanko muteekho wa muthundu woonyaalla makukhu apaalle emata yoohikhalla ni maaddi.

³¹ Athu amasiva enaakhalle wonanko manasi awumma nave mitteko ddiwa wonanko munllo. Sika athwaayo enaakharelle nimodda ni mitteko ddiwa, oohikhallavo mmodda oowora waathiimihella.