Yeremiya 8 - Mawu a Mulluku

¹ Apwiya enallota wi, “Va enthawi yeeyo eneerokhumiha mu mahame mwiwa makhuva mamwene a Ayuda ni a enduna ddiwa, a allupa mukutho, a anamallotella ni a athu attheene a mu Yerusalemu.

² Nave eneerewaaneya vanndduwani, vamweerini ni veetheneeri ddittheddene ddooddullu nnddo yaddikondiiwa, enaarumeyella, enaathwara, enaaveka ezeru ni oddillapella. Makhuvaayo khetthukumanihiwa apaalle ovuhellelliwa koma enaatthattuwe manyowa oomwareyella vatthi.

³ Athu attheene oohalla mwa athu a mutundu woonanaroolla, orive weko kiwiikarilleemiwo eneerotthoolla okhwa okhwaranya wi eneerovirellella okhalla ni okumi. Mi Apwiya Amasiva Mattheene koollota.”

Machimo ni ollakiwa

⁴ Apwiya yaakilleella wi kaakohe athwiiwa wi, “Ethiyo muthu iikuha khanavenyattho? Ethiyo muthu ahollowa khahokollowattho?

⁵ Vano kaambiiwa tini athu alla enavirellelliiwa ochimwa ohihokollowattho? Yohummellella ddawoottha, enimakhoota ohokollowattho.

⁶ Kahaapella maaru nave kahiiwa koma kheyaallotillevo ddawoona. Khaavo arive oochimwa oyo oonihalle wi oolapa anallota wi, ‘Kenre tini mi?’ Koma arive muthu anathwara ettilla ddaye wonanko kavalo oothamakella ekhoto.

⁷ Nasekwa annadduwella enthawi yoovava. Mukhunda, neenkhaare ni nikokoko ddinnadduwella enthawiiwa yootimullella olendo. Koma athwaaka khenadduwella malangizwaaka.

⁸ Munaallote mwawiidde wi muri eezeru nave wi mookhalla ni malamulwaaka? Ngoonani vawi malamulwaayo aasinthiwa ni alembi awoottha.

⁹ Athu eezeru eneerowulliwa muru, eneeromalla ezeru nave eneerophariwa. Aakhoota mawu a Apwiya, vano ezeru ddiwa tti ddawiidde?

¹⁰ Sika awariwa kineerewaavelleella wa allopwana amodda, emata ddiwa kineeroddivelleella wa ayo enaavollowe munipuroni mwiwa. Vawi arive muthu, muullupalli ni mung'onong'ono, ookhalla ni eyuuma yoophwanya mwawoottha. Anamallotella ni allupa mukutho, attheene tti awoottha.

¹¹ Ennavolliha makhwata a athwaaka vaddulluve. Nave enallota wi, ‘Murendelle, murendelle,’ koma ohiri murendelle.

¹² Ethiyo yaaweeraka ddoonanara, ennawulliwa muru? Iyaayi, khenawulliwa muru naari vang'ono, khanadduwella naari omoriha ekhove vatthi. Nave sika ekaambiiwa eneerewiikuha wonanko amodda yiikuhelliiwa khalle. Eneerotthollowa va nllapo nno kinaallakeemi. Mi Apwiya koollota.

¹³ “Kaapaalla wi kaatthukumanihe athwaaka wonanko oollima anatthukumanihelleeye ddoohata koma tti wonanko mpesa woohimma echipaso, wonanko muteekho wanamukuyu woohimma namukuyu wawi naari makukhu aanyaalla. Sika vano, koowaakhullella athu eelleto wi yaakhe ellapo.”

¹⁴ Athu enakoha wi, “Kaambiiwa tini nineeriiwa moona okeraatthi? Hankoni attheene vamodda nithawelle o mizinda dda mipanda nakhwelle wenko. Apwiya Mullukwaahu aakamulla mullatu wi noophwanella okhwa aaniwiryiha maaddi anttipwi kaambiiwa nohaachimwella.

¹⁵ Natiyerella murendelle koma ddeko khaddineetenlle phaama. Natiyerella ochira koma nakumanne ni ddawoopihave.

¹⁶ Adaniihu aavollowa khalle mu muzinda wa Dani. Nave ellapo ettheene enimatthukumella ni winlla wa akavalo a adanaayo. Adani enimawa wi yoononge ellapweella ni ddeko ddittheddene nave eneerewoonongattho muzinda ni ddittheddene ddiri mwemmo.

¹⁷ Ngoonani, kinuurumihellani enowa, evilli ddoohiithaneya ni muthu amasenga nave ddineerewuullumani. Mi Apwiya koollota.”

Yeremiya anaamoriwella ethakaraka athwaaye

¹⁸ Okhupanya waka tti woohimalla, murimaaka woofooka.

¹⁹ Ngiiwani winlla wa athwaaka ovenyera o ellapo yawoorekama wi, “Ethiyo Apwiya kheri o Ziyoni? Ethiyo mweniiwa khari wenko?” Apwiya enaakhulla wi, “Kaambiiwa tini enakillikiiwa ni mafanwiiwa navettho ni milluku ddiwa ddeelleto?”

²⁰ Athu enallota wi, “Ohata woomalla, ellimwe yoovira koma khanivulluwalleve.”

²¹ Kinniiwa ovoreya ekaamba ya ddoohoosa dda athwaaka, kinninlla, ethakaraka ddookiphara.

²² Ethiyo o Giliyadi khawuri murete? Ethiyo wenko khawuri allupa murete? Kaambiiwa tini makhwata a athwaaka ehinavolliiwa?