Yeremiya 7 - Mawu a Mulluku

Yeremiya anallalleya mu enyumba ya Apwiya

¹ Mawu a Apwiya yaawa wa Yeremiya wi,

² “Imella va mullako wa enyumba ya Apwiya nave llalleya mawu a Apwiya wa athu attheene a o Yuda ayo enavollowa va mullako wi yaallapelle Apwiya.

³ Apwiya Amasiva Mattheene Mulluku a Israele enuulleellani wi, ‘Musinthe makhallellwaanyu ni ddaweera ddanyu nave kineerowaakhullellani ovirellella okhalla vanipuroninna.

⁴ Muhiroromelleke mawu oolleka vooganizani wi muri vaphaama voollotani wi nipuro nenna tti enyumba ya Apwiya, enyumba ya Apwiya, enyumba ya Apwiya!’

⁵ “Musinthe makhallellwaanyu ni ddaweera ddanyu nave mweerellaneke ddoolungama.

⁶ Muhaahooseke alleto, akhwaadduni apaalle anaamukhwelle. Muhiwiiphe athu oohichimwa va nipuro nenna. Muhillapelleke milluku ddimodda wi muhoonongeye.

⁷ Mwiiwellella mawaaka kineerowaakhullellani wi mukhalle vanipuroni nenna, mu ellapo eyo kaavahilleemi makhollwaanyu wa enthawi yoohimalla.

⁸ “Ngoonani, munnaroromella olleka nko ohinaphuriha ello.

⁹ Munniiya, munniipha, munnararuwa, munnallupella mwawoottha, munnavelleella mikutho wa Baala ni ollapella milluku ddimodda nnddo khalle mwahiddidduwelleenyu.

¹⁰ Vatulli viwa munniimella vamiitthoni vaka mu enyumba eyo enadduwanyeya ni nnddina naka. Munallota wi, ‘Noovulluwa,’ koma munnavirellella weera ddoonanara ddittheddenenndda.

¹¹ Ethiyo munaganiza wi enyumba eyo enadduwanyeya ni nnddina naka tti nipuro nawiipitthamo allupaawiiya? Mwaneenaaka kohoona nnddo muneereenyu. Mi Apwiya koollota.

¹² Khaweni o nipuro na o Shilo nko vawaamba wadduwanyeya ni nnddina naka. Moone nnddo keerilleemi ekaamba ya onanara wa athwaaka Aisraele.

¹³ Mwaheera ddoonanara ddittheddenenndda nave mwaakhoota okiiwellella naari kuullotihalleni moovirellella nave khemwaakhunlle kawiithanilleemini.

¹⁴ Sika nnddo kimweerelleemi Shilo kineereweerattho va enyumba ella yoodduwanyeya ni nnddina naka, nipuro nno munaniroromelleenyu nave nno kuuvahilleemini ni makhollwaanyu.

¹⁵ Kineerowiikarihani vamiitthoni vaka wonanko mmo kawiikarihelleemi abalaanyu attheene, edduullu ddittheddene dda Efuremu. Mi Apwiya koollota.”

Ohiiwellella wa athu

¹⁶ Apwiya yaallota wi, “We Yeremiya, ohaavekellelle athu yaalla, ohaapepeselle wa miyaano apaalle waakhupanyella mookiwatihera kaambiiwa miyaano ngiwiiwellella.

¹⁷ Ethiyo khonoona nnddo ddineereya o Yuda ni m'misewuni dda mu Yerusalemu?

¹⁸ Anamwani enatotella ekhuni, allopwana enaviddeella munllo nave atthiyana enoottowa othu wi emoose buledi wi omuvaha olemu oyo enamweeriiwa mwene aamutthiyana ooddullu. Alliwa enahella mikutho ddaddoowirya wa milluku ddimodda wi ekishihe murima.

¹⁹ Eneesa wi enakikatamiha miyaano koma eniikatamiha weekhiiwa ni wiiwulliha muru.

²⁰ Sika vano Mi Apwiya Mulluku kineerewaallaka wunchichi moosha murima. Osha murima waka oneeromorella va enyumbaaka, athu, enama, miteekho ni mmiddo nave oneerokhara wonanko munllo woohithiimiheya.

²¹ “Apwiya Amasiva Mattheene Mulluku a Israele enallota wi, ‘Mwaanjerere ddoovelleella ddanyu ddooshellelliha va mikutho ddanyu ddimoddannddo nave muttakhune enamiiwa.’

²² Kaakhumihalleemi makhollwaanyu o ellapo ya Iguputo, ngaalamunle wi evelleelleke mikutho ddooshellelliha apaalle mikutho ddimodda.

²³ Koma kaalamunle ello emodda wi, ‘Mwakiiwellella miyaano kineerokhalla Mullukwaanyu nave nyuwaano muneerokhalla athwaaka. Mwiiwellelleke malamulwaaka mattheene wi ddeko ddiweetellekeni phaama.’

²⁴ Koma kheyiiwellenlle naari waapella maaru nave yaavirellella okhalla awumma murima ni oothwara murimiiwa woonanara. Yawehille dda mutulli ohiri ddamuhoollo.

²⁵ Waambeella nllapo makhollwaanyu yakhumalliiwa mu ellapo ya Iguputo ophiyera ollello kookhalla kuurumihellakani amurummwaaka, anamallotella.

²⁶ Koma nyuwaano khemunakiiwellella apaalle opwathawo. Ni mirima ddanyu ddawummannddo moonanara waakhwaranya makhollwaanyu.

²⁷ “Sika we Yeremiya naari waalleelleve mwawiidde ddenndda khewiiwellella. Naari owiithaneve mwawiidde khewaakhulla.

²⁸ Nave sika waalleelle wi mutundwiiwa khoniiwellella mawu a Apwiya Mullukwiiya nave khonapaalla ohumullulliwa. Ororomelleya khonaphwanya nave eyo ehanlle vayanoni viwa tti ddawootthave.”

Machimo aweereya mu ntapo na Mwaana a Hinomu

²⁹ “We Yerusalemu, chema meehaawo nave waatathille. Ipa nchipo nawinlla vaddullu va miyaango, kaambiiwa mi Apwiya koosha murima, ddawoona, kohuuhiya.

³⁰ “Apwiya enallota wi, ‘Athu a o Yuda aheera ddoonanara vamiitthoni vaka, ahiimesa mafanwiiwa oonanara mu enyumba ella enadduwanyeya ni nnddina naka nave aayiripiha.

³¹ Aamaka nipuro noollapellamo o Tofeti, mu ntapo na Mwaana a Hinomu wi yaashellellihekewo anamwaniiwa aallopwana ni aatthiyana. Ddenndda ngaalamunle apaalle oddiganizera naari vang'ono.

³² Sika vano enthawi enimawa mvo nipuronna khaniwa niromolliwattho Tofeti apaalle ntapo na Mwaana a Hinomu koma ntapo na Wiipha vawi eneerovitthiwa mu Tofeti ekaamba yawi khowa ophwanyeyattho nipuro nawaavitthavo.

³³ Vano mitembo dda athu yaalla ddinaakhalle yoocha ya epallame ni enama ddamuhakani nave khavikhalla arive muthu ooddiikara.

³⁴ Khowa wiiweyattho mawu oohakallalla ni oottheya o mizinda dda o Yuda ni o misewu dda mu Yerusalemu. Khawiiweyattho mawu oothapella, a ootthella ni ootthelliwa vawi ellapo eneerotthattuwa otthako.’ ”