Yeremiya 6 - Mawu a Mulluku

Yerusalemu anaapheelliwa ni adani

¹ Nyu athu a o Benjamini thawani, mukhumemo mu Yerusalemu. Opani nipallapata o Tekowa nave imesani embendera o Betehakeremu. Otulli ni woonongeya wuullupalli ddineerewuumorellani ovenyera ompoto.

² Kineerowoononga muzinda wa Ziyoni, muzinda wawooneya phaama ni wooreera.

³ Mamwene eneeroowa ni akhotwiiwa ni otthipella misasa moomwaapheella Yerusalemu nave arive mwene aneerewaatthukumaniha mullokwaaye va yeekha.

⁴ Eneerollota wi, “Khozekani wi muhelle ekhoto muzindoolla! Waawoni niwuhelle ekhoto otthaana vaava!” Koma vano eneerollotattho wi, “Otulli vawi nndduwa nootthettemana nave miithuuchi dda misikuwa ddohaamba orekama!

⁵ Hankoni vano niwuhelle ekhoto mahiiyu, noononge mipanda ddiwa.”

⁶ Apwiya Amasiva Mattheene ahaalamula mamwene mattheenaalla wi, “Uhani miteekho dda mu Yerusalemu nave muzindoolla muwumakelle mikhuttu ddakhoto. Muzinda yoolla tti woophwanella ollakiwa mooddalla ddoohoosa.

⁷ Wonanko mmo ehime enasungelliiwa maaddi, sikattho Yerusalemu anasungelleeye ddoonanara ddaye. Kinniiwa mwa olliye dda echiwonongeko ni ekhoto nave kinnoonattho ereta ni makhwata.

⁸ We Yerusalemu, hudderavo ello wi echikondaaka va weyaano ehimalle nave kihuutthattuse echipululu, ellapo yoohikhallamo athu.”

Owukila wa Israele

⁹ Apwiya Amasiva Mattheene yaallota ni miyaano wi, “Wuurulle ni owaakha ddittheddene athu oohalla a Israele wonanko mmo athu eneerelliiwa voovullullani mpesa o enthambi ddiwa.”

¹⁰ Kahaakhulla wi, “Ethiyo killote ni aani nave kimuchenjeza aani wi iiwe? Maarwiiwa aatiyelleya, khewora wiiwa. Ennaavevulla wunchichi mawu a Apwiya nave khenaapwatha naari vang'ono.

¹¹ Sika ekaambiiwa kooddalla ni osha murima wa Apwiya, ngiwora owusunga.” Vano Apwiya yaallota ni miyaano wi, “Ithellella osha murimanko va anamwani aweeta m'musewuni ni va mutthukumano wa asombwe vawi naari mullopwana ni mwaariye, a embwi ni awuulluvalla wunchichi eneerophariwa.

¹² Enyumba ddiwa ni emata ddiwa ni awariweene ddineerovelleelliwa wa amodda. Ddawoona ni nnatta nakanna kineerewaallaka athu ookhalla mwiillaponimmo. Mi Apwiya koollota

¹³ Vawi arive muthu, muullupalli ni mung'onong'ono, ookhalla ni eyuuma yoophwanya mwawoottha. Anamallotella ni allupa mukutho, attheene tti awoottha.

¹⁴ Ennavolliha makhwata a athwaaka vaddulluve. Nave enallota wi, ‘Murendelle, murendelle,’ koma ohiri murendelle.

¹⁵ Ethiyo yaaweeraka ddoonanara, ennawulliwa muru? Iyaayi, khenawulliwa muru naari vang'ono, khanadduwella naari omoriha ekhove vatthi. Nave sika ekaambiiwa eneerewiikuha wonanko amodda yiikuhelliiwa khalle. Eneerotthollowa va nllapo nno kinaallakeemi. Mi Apwiya koollota.”

Israele anakhoota ettilla ya Apwiya

¹⁶ Apwiya yaallota ni athwiiwa wi, “Imellani va makhullukano nave wehani. Mukohe nko ori ettilla ddakhalle nave nko ori ettilla yaphaama. Vano muhitathille ettilla yaphaameeyo wi mukhalle ni murendelle.” Koma mwaallota wi, “Khaniwa nithwara!”

¹⁷ Kahuuvahani alonda wi yuuchenjezekeni vawinllani nipallapata. Koma mwaallota wi, “Khenaapella maaru.”

¹⁸ Sika Apwiya yaallota wi, “Nyu mitundu dda athu, apellani maaru. Nyu mutthukumanne, dduwellani nnddo ddinaamorelle athwaaka.

¹⁹ Nyu ookhalla va ellapo yavatthi, apellani maaru. Kineerowoononga moollikana ni ddawoottha ddiwa kaambiiwa kheyiiwellenlle mawaaka nave yaakhoota malamulwaaka.

²⁰ Ethiyo kinaaphurevo tini yawaana lubani* noovenyera o Sheba apaalle ddawunkhella ddimodda ddoovenyera o ellapo ddawoorekama? Ngiwa kaakhella mikutho ddiwa ddooshellelliha apaalle ohakallallana ddoovelleella ddiwa.

²¹ Sika vano athu yaalla kineerewaahiyera ddookwakwatuwiha. Makhollo ni anamwaniiwa eneerokhwa, awaattanana ni awaatamanana eneerewoonongeya.”

Adani oovenyera ompoto

²² Apwiya enallota wi, “Ngoonani, athu ovenyera o ellapo ya ompoto enimawa. Mutundu wa athu amasiva wootimulla ovenyera woorekama.

²³ Ekusalle miira ni mavaka, tti athu awumma murima nave khenna echifundo. Enanyakulla wonanko enyanja nave ewenlle va akavalwiiwa okhozekella owana ekhoto ni we Ziyoni.”

²⁴ A o Yerusalemu enaakhulla wi, “Nohiiwa epilliiwa nave masiva aanimallella. Ninimakhupanya ni wiiwa ovoreya wonanko wa mutthiyana vooyarani.

²⁵ Nihaaheye oya omata apaalle weeta vamusewuni vawi adani enimawa ni ekhoto nave nohaapheelliwa ni ddawoopiha.”

²⁶ Apwiya enallota ni athwiiwa wi, “Nyu athwaaka, warani eziguduli nave upuruwani vantuurani. Inllani mwamasiva wonanko muthu anamwinllella mwanaye mmoddave vawi moorurumusa awoononga aneeroowa wi awiipheni.

²⁷ We Yeremiya, kohuutthoolla wi okhalle aweesa mikoko nave oweese athwaaka wi woone makhallellwiiwa.

²⁸ Attheene tti eetiyamaaru oowukila, anawunawu, awumma wonanko mukuwa ni mukoko ni aweera ddoonanara.

²⁹ Eng'anjo yoovarella ni munllo naari muthove waweellihella wooshellella. Sika mutteko waaweelliha khonaphura ello kaambiiwa yoonanara khenavenyavo.

³⁰ Alliwa tti wonanko siliva ootathilliwa vawi Apwiya ahaakhoota.”