Yeremiya 52 - Mawu a Mulluku

Omora wa Yerusalemu

¹ Zedekiya avollowille omwene ari ni miyakha 21 nave alamulelle miyakha khumi ni mmodda o Yerusalemu. Amennya yaari Hamutala, mwaana a Yeremiya a o Libina.

² Zedekiya aheera ddoonanara vamiitthoni va Apwiya wonanko Yehoyakimu.

³ Ekaamba ya ddittheddene ddeereyille o Yerusalemu ni o Yuda, Apwiya yaasha murima wunchichi ophiyera owiikariha athwaayo vamiitthoni viwa. Vano Zedekiya aamuwukila mwene a o Babiloni.

⁴ Sika muyakha waneetthanu ni sese wa omwene wa Zedekiya, mweeri waneekhumi, nllapo naneekhumi na mweeri, Nebukadinezara mwene a o Babiloni aawa ni akhotwaaye attheene wi ehelle ekhoto muzinda wa Yerusalemu. Nave yaawaapheella virive veko ni misasa owaaka mikhuttu ddakhoto.

⁵ Sika muzindooyo wahaapheelliwa muyakha waneekhumi ni mmodda wa omwene wa Zedekiya.

⁶ Vano va nllapo naneetthanu ni sese, mweeri waneesese wa muyakha yooyo, ettalla yunnuwalliiwa wunchichi m'muzindanimmo ophiyera wi athu kheyaarina yoocha,

⁷ mpanda wa muzindooyo waaphovolliwa. Naari Ababiloni yawaapheelle muzindooyo komave akhoto attheene yaathawamo mahiiyu vookhumellani va mullako wa variyari va esiri piilli, vakhuviru ni emata ya mwene. Nave yaathawella o Araba.

⁸ Koma akhoto a Ababiloni yaamuthwara Zedekiya ophiyera yaamphara o matapo a Yeriko nave akhotwaaye yaapallalleya emuhiya.

⁹ Empharille yaamuyaana wa Nebukadinezara mwene a o Babiloni o Ribula mu ellapo ya Hamati nko akamunlleeye mullatwaaye.

¹⁰ Vano mwene a o Babiloni aawiipha anaaye attheene a Zedekiya olliye oonaka o Ribula. Mwene a o Babiloni aaddiiphattho enduna ddittheddene a o Yuda.

¹¹ Vano yaamukhumihamo miittho Zedekiya, emmaka ni onyolo emuyaana o Babiloni. Wenko yaamuvokhella mundende wi akhallemo ophiyera okhwa waye.

Woonongiwa wa enyumba ya Apwiya

¹² Nllapo naneekhumi na mweeri waneetthanu muyakha wa 19 wa omwene wa Nebukadinezara a o Babiloni, Nebuzaradani muullupalli a alonda akhoto aawa o Yerusalemu.

¹³ Nave ahoosa enyumba ya Apwiya, enyumba yoomwene ni enyumba ddimodda ddittheddene dda o Yerusalemu, erive enyumba yuullupalli aayoosa.

¹⁴ Olliye ni akhotwaaye attheene a o Babiloni yaakumulla esiri ddittheddene dda Yerusalemu.

¹⁵ Voomallihella Nebuzaradani, oohoollella a alonda akhoto ahaapharella wuukaporoni o Babiloni athu oohalla m'muzindani, eeruso oohalla ni ayo yiivelleelle wa olliye.

¹⁶ Koma ahaahiya athu amodda oohoowesesa a mwiillaponimmo wi ellimeke emata ddampesa ni emata ddimodda.

¹⁷ Ababiloni yahinttaka apoto, nibeseni namukuwa ni meto ddiwa mu enyumba ya Apwiya ewukusella mukuwa muttheene o Babiloni.

¹⁸ Yaakusattho embale moomorellamo ntuura, mafosholo ddoothimihera enyali, embale ddawoosellamo lubani,* makapu ni ddeko ddittheddene ddamukuwa nnddo ddapharihiwa mutteko o enyumba ya Apwiya.

¹⁹ Muullupalli a alonda akhotoolle aakusattho mabeseni, eziwaya ddoovallella munllo, embale ddoomiddella, ddoohiyavo enyali, embale ddawoosella lubani, makapu ni ddimodda ddittheddene ddagolide ni ddasiliva.

²⁰ Apoto eelli, nibeseni, meto ddiwa ni anankhoro a eng'ombe khumi ni eelli ayo yallipiha ethanki nnddo Solomoni apangelleeye enyumba ya Apwiya ddaari ddoollemella wunchichi.

²¹ Arive opoto aarekamme mamita matthanu ni mararu nave awaapheella mamita matthanu ni hafu. Aakhalla ni mulliha muwari, ahiitivalla eyaalla ddisese.

²² Aakhalla ni muru wamukuwa woorekama mamita meelli, wawaapheelliwa ni ddooreeriha dda ezipaso ddamakangaza.

²³ Ddooreeriha dda ezipaso ddamakangaza 96 sika ddaari ddawooneyella koma ddittheddene vamodda ddaari 100.

Athu a o Yuda enapharelliiwa o Babiloni

²⁴ Sika Nebuzaradani muullupalli a alonda aamuphara Seraya muullupalli a allupa mukutho, Zefaniya, aneepiilli wa muullupalli a mullupa mukutho ni alonda araru a va mullako wa enyumba ya Apwiya.

²⁵ M'muzindanimmo aampharamo akhoto muullupalli ni athu atthanu ni eelli ayo yaari alangizi a mwene. Aampharattho namalembella a akhoto muullupalli oyo aalemba athu mwiillaponimmo navettho attekweene amodda 60 ayo yaari m'muzindammo.

²⁶ Nebuzaradani, muullupalli a alonda akhoto, ahaakusella attheene wa mwene a o Babiloni o Ribula.

²⁷ Nave mwene a o Babiloni aalamula wi ewuukuthe ni owiiphella o Ribula mu echigawo ya Hamati. Sika athu a o Yuda yaaphariwa okaporo waavenyiha mwiillaponi mwiwa.

²⁸ Yaalla tti athu ayo Nebukadinezara aapharilleeye okaporo. Va muyakha waneetthanu ni piilli wa omwenaaye yaari 3,023.

²⁹ Va muyakha wa 18 wa omwenaaye, yaari 832 ovenyera o Yerusalemu.

³⁰ Va muyakha wa 23 wa omwene wa Nebukadinezara, Nebuzaradani muullupalli a alonda akhoto ahaakusa okaporo Ayuda 745. Attheene vamodda ookusiwa okaporo yaari 4,600.

³¹ Va nllapo na 25 na mweeri waneekhumi ni piilli, m'muyakha wa 37 wa okaporo wa Yehoyakini mwene a o Yuda, Evili Merodaki mwene a o Babiloni avollowille wene omwene, aamweerella echifundo Yehoyakini mwene a o Yuda voomukhumihani mundende.

³² Aallotana mweechifundo, amuvaha nipuro noolemu waakhwaranya mamwene mamodda mattheene aariiyena o Babiloni.

³³ Sika Yehoyakini aarulla ddoowara ddaye ddoondende nave nllapo ni nllapo aanacha ni mwene va okumaaye muttheene.

³⁴ Nllapo ni nllapo mwene a o Babiloni aanamuvaha Yehoyakini erive ello apaalleeye ophiyera okhwa waye.